ރާއްޖޭގެ އެންމެ ބޮޑު ގޭމިންގ ފެސްޓިވަލް އުރީދޫ ނޭޝަން ގޭމާސް ލޭންޑްގެ ”އަލްޓިމޭޓް ޕްލޭޔާ“ ހޮވުމުގެ ފުރުސަތު އުރީދޫން އެ ކުންފުނީގެ ކަސްޓަމަރުންނަށް ހުޅުވާލައިފިއެވެ.
މި އަހަރުގެ ”އަލްޓިމޭޓް ޕްލޭޔާ“ މަގާމަށް ހައި ގޭމަރުން ނޮމިނޭޓްވެފައިވެއެވެ. އެގޮތުން:
- ހައިޝަމް ވަޙީދު،
- އަޙްމަދު އަޒީން ނަޒީމް،
- ޒަމީލް ޒިހުނީ،
- ރާއިދު ޙަސަން،
- އަޙްމަދު މާހިލް
- ޙަސަން ޝަމްހާން
އުރީދޫއިން ބުނެފައިވަނީ މުބާރާތުގެ އެންމެ މޮޅު ކުޅުންތެރިޔާއަށް 30,000 ރުފިޔާގެ ފައިސާގެ އިނާމެއް ކަނޑައަޅާފައިވެއެވެ. މި އިނާމު ހަވާލުކުރުމަށް ހަމަޖެހިފައިވަނީ ”އުރީދޫ ނޭޝަން އަލްޓިމޭޓް ގޭމިންގ ފެސްޓިވަލް“ ނިންމުމުގެ ރަސްމިއްޔާތުގައެވެ. މި މުބާރާތް ބޭއްވުމަށް ހަމަޖެހިފައިވަނީ އަންނަ ހަފުތާގެ ބުރާސްފަތި ދުވަހުން ފެށިގެން ހުކުރު ދުވަހުގެ ނިޔަލަށެވެ.
ނޮމިނޭޓްވެފައިވާ ގޭމަރުންނަށް ވޯޓު ދިނުމަށް، ވޯޓު ދޭން ބޭނުންވާ ކުޅުންތެރިޔާގެ ނަން ކަނޑައެޅިފައިވާ ކީވޯޑާއެކު 9144495 އަށް އެސްއެމްއެސް ކުރުމަށް އެދިފައި ވެއެވެ. ކޮންމެ އެސްއެމްއެސްއަކަށް 20 ލާރި ޗާޖުކުރެވޭނެއެވެ.
އުރީދޫއިން ބުނެފައިވާ ގޮތުގައި، ވޯޓު ދެވޭނީ ހަމައެކަނި އުރީދޫ ކަސްޓަމަރުންނަށެވެ. ވޯޓުލުމުގެ ފުރުސަތު ހުޅުވާލެވިފައިވަނީ އަންނަ ހަފުތާގެ ބުރާސްފަތި ދުވަހުގެ ރޭ 11:59 އާ ހަމައަށެވެ.
އުރީދޫ ނޭޝަން ގޭމާސް ލޭންޑްގެ އަލްޓިމޭޓް ގޭމިން ފެސްޓިވަލްގެ ގޭމްތައް:
- ޕަބްޖީ މޮބައިލް ޗެމްޕިއަންޝިޕް
- އީއޭއެފްސީ ޗެމްޕއަންޝިޕް
- މޮބައިލް ލެޖެންޑްސް: ބޭންގް ބޭންގް ޗެމްޕިއަންޝިޕް
އުރީދޫން ބުނީ ފޯރިގަދަ މުބާރާތްތަކުގެ އިތުރުން ”އުރީދޫ ނޭޝަން ގޭމާސް ލޭންޑް“ ގައި އެންމެ މޮޅު ކުޅުންތެރިޔާގެ އެވޯޑް ވެސް ހޮވާނެ ކަމަށެވެ. މި ޝަރަފުވެރި އެވޯޑަކީ މި އަހަރުގެ ތެރޭގައި އުރީދޫ ނޭޝަން މުބާރާތްތަކުގައި ވާދަކުރި ފަރާތްތަކުގެ ތެރެއިން އެންމެ މޮޅު ކުޅުމަކާއި ހުނަރު ދައްކުވައި ދީފައިވާ ގޭމަރުގެ އަގު ވަޒަންކޮށް ފާހަގަ ކުރުމުގެ ގޮތުން ދެވޭ އެވޯޑެކެވެ.
އެވޯޑަށް ޝަރުތު ހަމަވާ ކުޅުންތެރިން އިވެލުއޭޓް ކުރަނީ އުރީދޫ ނޭޝަންގެ ޖަޖުން ގެ ޕެނަލާއި އާންމުންގެ ވޯޓުންނެވެ. އެގޮތުން ޖަޖުންގެ 60 ޕަސަންޓާއި އާންމުންގެ އެސްއެމްއެސް ވޯޓުން 40 ޕަސަންޓް އެވޯޑު ދިނުމުގައި ބަލާނެއެވެ.
