އިޤްތިޞާދީ ޙާލަތު ރަނގަޅުކުރުމަށް ސަރުކާރުން އެކިއެކި ފިޔަވަޅުތައް އަޅަމުންދާކަމަށް ބުނެފައިވީ ނަމަވެސް، ޙަޤީޤަތުގައި ފެންނަމުންދަނީ އިޤްތިޞާދު އިތުރަށް ދަށަށްދާ މަންޒަރުކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަޙްމަދު ނާޒިމް ވިދާޅުވެއްޖެއެވެ.
މި ކަންބޮޑުވުން ފާޅުކުރައްވަމުން، އެ މަނިކުފާނު އިތުރަށް ފާހަގަކުރެއްވީ މިހާރުގެ އިޤްތިޞާދީ ސިޔާސަތުތަކުގެ ނަތީޖާ ރައްޔިތުންނަށް ފެންނަމުންދާ ގޮތް ކަންބޮޑުވާ މިންވަރެއްގައި ހުރިކަމެވެ.“
ނާޒިމް މިހެން ވިދާޅުވީ މާލިއްޔަތު ކޮމިޓީން މިއަދު ބޭއްވި ބައްދަލުވުމުގައެވެ.
ސަރުކާރުގެ އިސްލާހީ ފިޔަވަޅުތައް އަޅަމުންދާ ގޮތުގެ ތަފުސީލުތައް މާލިއްޔަތު ކޮމިޓީއިން ހޯދަން ފެންނަކަމަށް ނާޒިމް ވިދާޅުވިއެވެ. އިސްލާހީ މަސައްކަތްތައް ތަންފީޒުކުރުމަށްޓަކައި ފިނޭންސް މިނިސްޓްރީއިން ރިފޯމް ކޮމިޝަނަރެއް އައްޔަންކޮށްފައިވާއިރު، މި މަސައްކަތް ކުރިއަށް ގޮސްފައިވާ ހިސާބު ބަލަން ޖެހޭކަމަށް ވިދާޅުވިއެވެ.
ސަބަބަކީ ސަރުކާރުގެ އިގްތިސާދީ ކަންކަން ރަނގަޅުވަމުންދާތަން ނުފެންނާތީކަމަށް ނާޒިމް ވިދާޅުވިއެވެ. އަދި ހަރަދު ކުޑަވާ މަންޒަރުވެސް ނުފެންނަކަމަށް ނާޒިމް ވިދާޅުވިއެވެ.
އެގޮތުން ފާހަގަކުރެއްވީ ދައުލަތުގެ ސިއްހީ ނިޒާމު، އާސަންދައިގެ ޚަރަދުތަކެވެ. މިދިޔަ އަހަރު އާސަންދައިގެ ޚަރަދު ތިން ބިލިއަން ރުފިޔާއަށް އެރި ކަމަށާއި އެއީ ދައުލަތަށް މިދިޔަ އަހަރު ލިބުނު އާމްދަނީގެ 10 ޕަސެންޓާ ގާތްކުރާ އަދަދެއްކަމަށް ނާޒިމް ވިދާޅުވިއެވެ.
2025 ވަނަ އަހަރުގެ އާމްދަނީ ދަށްވާ ސަބަބުވެސް ސަރުކާރަށް ސާފުކޮށްދެވިފައި ނެތްކަމަށް އޭނާ ވިދާޅުވިއެވެ. ނާޒިމް ވިދާޅުވި ގޮތުގައި އާމްދަނީ ދަށްވި ސަބަބަކީ މިދިޔަ އަހަރުގެ އޮކްޓޯބަރު މަހު ސިނގިރޭޓުގެ އިމްޕޯޓް ޑިއުޓީ ބޮޑުކުމުން، ސިނގިރޭޓު އިމްޕޯޓް ކުރުން މަޑުޖެހިފައިވުމެވެ.
އިތުރު ކުއާޓަރެއްގައި އަނެއްކާވެސް އާމްދަނީ ދަށްވެއްޖެނަމަ އެއީ ވަރަށް ބޮޑު މައްސަލައެއްކަމަށް ފާހަގަކޮށް ނާޒިމް ވިދާޅުވީ ހަރަދު ކުޑަ ކުރުން ނޫން އެހެން ގޮތެއް ނެތްކަމަށެވެ. ނާޒިމް ވިދާޅުވީ ކޮންމެ އަހަރަކުވެސް ފެންނަނީ އެއް ކަންތައްތަކެއް ތަކުރާރުވަމުންދާ މަންޒަރުކަމަށެވެ. އިސްލާހުވާ މަންޒަރު ނުފެންނަކަމަށް ވިދާޅުވިއެވެ.
އަޅުގަނޑުމެން މި ތިބެނީ ވަށުބުރަކަށް އެނބުރި އެނބުރި އަޅުގަނޑުމެންގެ އެއްވެސް ކަމެއް އިސްލާހު ނުވެ.
ނާޒިމް ވިދާޅުވިއެވެ.
ޑޮލަރުގެ މައްސަލަ ހައްލުކުރުމަށް ސަރުކާރުން އަޅާފައިވާ ފިޔަވަޅުތައް ފާހަގަކޮށް ނާޒިމް ވިދާޅުވީ މި ފިޔަވަޅުތައް އެޅި ނަމަވެސް ޚަރަދު ކުޑަ ނުކުރާ ނަމަ ރަނގަޅުވާނެ ގޮތެއް އެއީ ހަމަ ނެތް ގޮތެއްކަމަށެވެ.
