ރައްޔިތުންގެ މަޖިލީހުގެ މެމްބަރުން ސިޔާސީ ޕާޓީ ބަދަލު ކުރުމުން ގޮނޑި ގެއްލޭ ގޮތަށް ގާނޫނުއަސާސީއަށް ގެނައި އިސްލާހު ސައްހައެއް ނޫންކަމަށް ކަނޑައަޅައިދިނުމަށް އެދި ހުށަހަޅާފާއިވާ މައްސަލައިގެ އަޑުއެހުމެއް އަންގާރަ ދުވަހު ސުޕްރީމް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި އެމްޑީޕީންވެސް ތަދައްޚުލުވެފައިވާއިރު، ދައުލަތުން ހޯމަ ދުވަހުގެ އަޑުއެހުމުގައި ހުށަހަޅާފައިވާ އިޖުރާއީ އިއުތިރާޒާ ގުޅޭގޮތުން ވާހަކަ ދެއްކުމަށް ފަނޑިޔާރުން ވަނީ މި އަޑުއެހުމުގައި އެމްޑީޕީއަށް ފުރުސަތުދީފައެވެ.
އެމްޑީޕީގެ ފަރާތުން އެކަމާ ގުޅޭ ނުކުތާތައް ހުށަހެޅުއްވީ އެ ޕާޓީގެ ތަރުޖަމާނު އަނަސް އަބްދުއްސައްތާރުއެވެ.
އަނަސް ވިދާޅުވީ، މި މައްސަލައިގައި އެމްޑީޕީން ތަދައްޚުލުވެފައިވަނީ އެމްޑީޕީއަކީ އެންމެ ދުވަސްވީ އެއް ސިޔާސީ ޕާޓީއަށްވެފައި، މަޖިލީހުގައިވެސް 12 މެމްބަރުން ތަމްސީލު ކުރައްވާތީ، މި މައްސަލައިގައި ޕާޓީގެ މަސްލަޙަތު އޮތްކަމަށް ޤަބޫލު ކުރެވޭތީ ކަމަށެވެ.
އަނަސް ވިދާޅުވީ، މި މައްސަލަ ހުށަހެޅި ފަރާތުން ސުޕްރީމް ކޯޓުގައި ދެއްކެވި ވާހަކަތަކަށް އެމްޑީޕީންވެސް ތާއީދު ކުރާ ކަމަށެވެ. މި އިސްލާޙަކީ ރައްޔިތުންގެ ބާރު ނިގުޅައިގަނެވިގެންދާ ފަދަ އިސްލާޙެއްކަމަށް އަނަސް ވިދާޅުވިއެވެ.
މީގެ އިތުރުން، ދައުލަތުގެ ފަރާތުން ހުށަހެޅި އިޖުރާއީ އިއުތިރާޒާއި ގުޅިގެން މައްސަލަ ހުށަހެޅި ފަރާތުން ދައްކާފައިވާ ވާހަކަތަކަށްވެސް އެމްޑީޕީން ތާއީދު ކުރާކަން ފާހަގަ ކުރައްވައި އަނަސް ވިދާޅުވީ، މި މައްސަލައިގައި ހިމެނޭ މައުލޫއަކީ އައު ވާހަކައެއް ނޫން ކަމަށެވެ.
ދައުލަތުގެ އިއުތިރާޒާ ގުޅޭގޮތުން މި އަޑުއެހުމުގައި ވާހަކަ ދައްކަވަމުން އަލީ ހުސައިން ވިދާޅުވީ، މި މައްސަލައަކީ ސުޕްރީމް ކޯޓުން ބެލޭނެ މައްސަލައެއް ކަމަށާއި، ޤާނޫނުގެ މާނައިގައި ޤާނޫނުއަސާސީވެސް ހިމެނޭނެކަމަށެވެ.
ޤާނޫނުގެ މާނައިގައި ޤާނޫނުއަސާސީ ނުހިމެނޭނެ ގޮތެއް ނޯންނާނެ
ސުޕްރީމް ކޯޓުގައި މި މައްސަލަ ބައްލަވަނީ އެ ކޯޓުގެ 7 ފަނޑިޔާރުންގެ ބެންޗުންނެވެ.
