ހަނގުރާމަ ހުއްޓާލުމާއި ގުޅޭގޮތުން އެމެރިކާ އަދި ރަޝިއާ ދެމެދު ކުރިއަށް ގެންދިއުމަށް ކަނޑައެޅިފައިވާ މަޝްވަރާތަކުގައި ޔޫކްރެއިން ނުހިމަނާކަމަށް އެ ގައުމުގެ އޮފިޝަލުން ބުނެފިއެވެ.
ބައިނަލްއަގުވާމީ މީޑިއާތަކުން ރިޕޯޓުކުރާގޮތުން އެމެރިކާ އަދި ރަޝިއާގެ ސަރުކާރުގެ އިސްވެރިންވަނީ އެ ދެގައުމުގެ ދެމެދު ގުޅުން ހަރުދަނާކުރުމުގެ ގޮތުން މަޝްވަރާ ބައްދަލުވުންތަކެއް ކުރިއަށް ގެންދިއުމަށް ނިންމާފައިކަމަށެވެ. އަދި މި ބައްދަލުވުންތަކުގައި ޔޫކްރެއިން ދެމެދު ކުރެވެމުންދާ ހަނގުރާމަ ނިމުމަކަށް ގެނައުމާއި ގުޅޭގޮތުންވެސް މަޝްވަރާކުރުމަށް ކަނޑައެޅިފައިވާކަމަށް ޔޫކްރެއިންގެ އޮފިޝަލުން ނޫސްތަކަށް މައުލޫމާތު ދޭއިރު މިއީ ރަޝިއާއިން ޔޫކްރެއިން ހިފުމަށްޓަކައި މަސައްކަތްތައް ފެށުމަށްފަހު އެމެރިކާ އަދި އެ ގައުމުގެ ދެމެދު ކުރެވޭ އެންމެ ބޮޑު މުއާމަލާތްތައްކަން ފާހަގަކުރެއެވެ.
ސައުދީއަރަބިއްޔާގައި ކުރިއަށް ގެންދިއުމަށް ކަނޑައެޅިފައިވާ މި ބައްދަލުވުމަކީ އެމެރިކާއިން ވޭތުވެދިޔަ އަހަރުތަކުގައި ގެންގުޅެމުން އައިސްފައިވާ ރަޝިއާ އެކަހެރިކޮށްލުމުގެ ސިޔާސަތު ބަދަލުކޮށްލުމަށްޓަކައި އެޅިގެންދާ އެންމެ މުހިންމު އެއް ފިޔަވަޅެވެ. އަދި މިއީ ރަޝިއާގެ ރައީސް ވްލެޑިމިއަރ ޕުޓިންއާއި އެމެރިކާގެ ރައީސް ޑޮނަލްޑް ޓްރަމްޕު ދެމެދު ކުރިއަށް ގެންދިއުމަށް ކަނޑައެޅިފައިވާކަމަށް ބުނަމުންދާ ބައްދަލުވުމާއި ހިސާބަށް ވާސިލުވުމުގެ ގޮތުން ކުރެވެމުންދާ މަސައްކަތްތަކެއްކަމަށް ރިޕޯޓުތަކުން ފާހަގަކުރެއެވެ.
އެމެރިކާއިން ކުއްލި ގޮތަކަށް ހާރިޖީ ސިޔާސަތުތަކަށް ބޮޑެތި ބަދަލުތަކެއް ގެނައުމާއި ގުޅިގެން ޔޫކްރެއިން އަދި އެ ގައުމުގެ އިސް މަދަދުގާރުންދަނީ މަޝްވަރާގެ މޭޒުން ޖާގައެއް ހޯދުމަށްޓަކައި ބޮޑެތި މަސައްކަތްތަކެއް ކުރަމުންނެވެ. ޔޫކްރެއިންއަށް ވާގިވެރިވާ ގައުމުތަކުގެ ދެމެދު ކަންބޮޑުވުންތަކެއް އުފެދިފައިވާ މައިގަނޑު ސަބަބަކީ ހަނގުރާމަ ނިމުމަކަށް ގެނައުމުގައި ޔޫކްރެއިންއަށް ގެއްލުންތަކެއް ވެގެންދިއުމުގެ ފުރުސަތު އޮތް މަގަކުން ކަންކަން ނިމިގެންދިއުމުގެ ފުރުސަތު އޮތުމުންކަމަށް އެކި ފަރާތްތަކުން ޝާއިއުކުރާ ހަބަރުތަކުން ފެނިގެންދެއެވެ. މިކަމާއި ގުޅިގެން ޔޫރަޕިއަން ޔުނިއަންގެ ގައުމުތަކުންވަނީ ކުއްލި ބައްދަލުވުމެއް ބާއްވާފައެވެ.
ރަޝިއާގެ ދައުލަތުގެ މީޑިއާއިންވަނީ އެމެރިކާ ދެމެދު ކުރިއަށް ގެންދިއުމަށްޓަކައި ކަނޑައެޅިފައިވާ ބައްދަލުވުމުގައި ބައިވެރިވުމަށްޓަކައި އެ ގައުމުގެ ފޮރިން މިނިސްޓަރ ސާރގޭ ލެވްރޮވް އަދި ޕުޓިންގެ ފޮރިން އެފެއަރޒް އެޑްވައިޒަރު ޔޫރީ އޫޝަކޮވް ސައުދީއަރަބިއްޔާއަށް ވަޑައިގެންފައިވާކަން ކަށަވަރުކޮށްދީފައެވެ. އަދި މި ބައްދަލުވުމަކީ އެ ދެގައުމުގެ ދެމެދު ކުރިއަށް ގެންދާނެ ބައްދަލުވުމެއްކަމަށާއި އެއްވެސް ޔޫކްރެއިންގެ އޮފިޝަލަކު ނުހިމެނޭނެކަމަށްވެސް ބުނެފައިވެއެވެ. މީޑިއާތަކަށް ހިއްސާކުރެއްވި މެސެޖެއްގައި ޔޫރީ އޫޝަކޮވްވަނީ އެމެރިކާ ދެމެދު އޮތް ގުޅުން ރަނގަޅު ހާލަތަކަށް ގެނައުމުގެ ވަގުތު އައިސް ޖެހިފައިވާކަމަށް ވިދާޅުވެފައެވެ.
