ރާއްޖޭގެ ހާރިޖީ ވަޒީރު ޑރ އަބްދުﷲ ހަލީލް ސްރީލަންކާއަށް ކުރައްވާ ރަސްމީ ދަތުރުފުޅުގައި އެ ގައުމުގެ ރައީސް އަނޫރަ ކުމާރަ ޑިސަނަޔަކެއާއި ބައްދަލުކުރައްވާނެކަމަށް ފޮރިން މިނިސްޓްރީން ބުނެފިއެވެ.
ފޮރިން މިނިސްޓްރީން އާންމުކޮށްފައިވާގޮތުން މިނިސްޓަރ ހަލީލް ސްރީލަންކާއަށް ވަޑައިގަންނަވާނީ މި މަހުގެ 18 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށްކަމަށެވެ. މިއީ އެ ގައުމުގެ މިނިސްޓަރ އޮފް ފޮރިން އެފެއަރޒް ފޮރިން އެމްޕްލޮއިމެންޓް އެންޑް ޓުއަރިޒަމް އެޗް އެމް ވިޖިތާ ހެރާތްގެ ދައުވަތަކަށް ކުރައްވާ ދަތުރެއްކަމަށްވާއިރު މި ދަތުރުފުޅުގައި އެ ގައުމުގެ ރައީސް އަނޫރަ ކުމާރަ އާއިވެސް ބައްދަލުކުރައްވާނެކަން ފާހަގަކޮށްފައިވެއެވެ.
3 ދުވަހުގެ މި ދަތުރުފުޅުގައި މިނިސްޓަރ ހަލީލް އަދި އެ ގައުމުގެ ބޮޑުވަޒީރު ޑރ ހަރީނީ އަމަރަސޫރިޔަވެސް ބައްދަލުކުރައްވާނެއިރު ވިޖިތާ ހެރާތް ދެމެދު ރަސްމީ މަޝްވަރާތައް ކުރިއަށް ގެންދެވުމަށް ކަނޑައެޅިފައިވެއެވެ. އަދި އެ ގައުމުގައި ދިރިއުޅޭ ރާއްޖޭޣެ ރައްޔިތުންނާއިއެކުވެސް ބައްދަލުވުމެއް ބޭއްވުމަށްް ކަނޑައެޅިފައިވާކަން މިނިސްޓްރީން ހާމަކުރިއިރު ރާއްޖެއާއި ލަންކާ ދެމެދު ވިޔަފާރި ގުޅުން ހަރުދަނާކުރެވޭނެ މަގުތައް ހޯއްދެވުމުގެ ގޮތުން އެގައުމުގެ ޕްރައިވެޓް ސެކްޓާރގެ އެކި ފަރާތްތަކާއި ދެމެދުވެސް މަޝްވަރާތައް ކުރިއަށް ގެންދަވާނެއެވެ.
މިނިސްޓަރ ހަލީލްއާއިއެކު މި ދަތުރުފުޅުގައި ފޮރިން ސެކެޓްރީ ފާތިމަތު އިނާޔާ އަދި އެޑިޝަނަލް ސެކެޓްރީ އައިމިނަތު އަބްދުﷲ ދީދީވެސް ބައިވެރިވެވަޑައިގަންނަވާނެއެވެ.
