ސިހުރުގެ މައްސަލަތައް ގިނަވެގެން، ހދ ކުޅުދުއްފުށީގައި ކުރިއަށް ގެންދިޔަ އޮޕަރޭޝަނުގެ ތެރެއިން 8 ގެޔަކުން ސިހުރު ހަދާ ތަކެތި ހޯދައިފިއެވެ.
މިކަމާއި ގުޅިގެން ފުލުހުން މައުލޫމާތު ދީފައިވާ ގޮތުގައި ސިހުރު ހަދާ ކަމުގެ ތުހުމަތުގައި ފުލުހުން ބަލައި ފަސް ކުރި 10 ގޭގެ ތެރެއިން 08 ގެއަކުން ފެނުނީ ސިހުރު ހަދަން ބޭނުންކުރާ ޒާތުގެ ލިޔެކިޔުމާއި ފޮތާއި ސިހުރު ހަދަން ބޭނުންކުރާ އެކި ކަހަލަ އާލާތްތަކެވެ.
ފުލުހުން ވަނީ އެތަކެތި ފުލުހުންގެ ބެލުމުގެ ދަށަށް ނަގާފައެވެ. އަދި މި މައްސަލަ ގެންދަނީ އިތުރަށް ތަހުގީގު ކުރަމުންނެވެ.
މި މައްސަލައާއި ގުޅިގެން އަދި މިހާތަނަށް އެއްވެސް މީހަކު ހައްޔަރުކޮށްފައި ނުވާކަން ފާހަގަކޮށްލެވެއެވެ.
ހދ ކުޅުދުއްފުށީގައި ސިހުރު ހަދާކަމުގެ ގިނަ މައްސަލަތަކެއް ފުލުހުންނަށް ވަނީ ހުށައަޅާފައެވެ. މި މަހުން ރ އަތޮޅުގެ ބައެއް ރަށްތަކުންވެސް މި މައްސަލަ ފެންމަތިވެ ފުލުހުން ވަނީ އޮޕަރޭޝަންތަކެއް ކުރިއަށް ގެންގޮސްފައެވެ.
