ވޭޕު މަނާކުރުމަށް ސަރުކާރުން ގެނައި އިސްލާހަށް ބައިނަލްއަގުވާމީ ޖަމިއްޔާތަކާއި ސިއްހީ މާހިރުން ތައުރީފްކޮށްފިއެވެ.
”މިންޓް“ ކިޔާ ބޭރުގެ ނޫހަކުން ބުނާގޮތުން ސިއްހީ މާހިރުން އަދި މައިންބަފައިން ގުޅިގެން އެކުލަވާލާފައިވާ މަދަނީ ޖަމިއްޔާތަކުންދަނީ ރާއްޖެ އަދި ވިއެޓްނާމުން ވޭޕު މަނާކޮށްފައިވުމަށް ތައުރީފްކުރަމުންނެވެ. އެގޮތުން އެއީ ނިކޮޓިން އެޑިކްޝަނުން ޒުވާނުން ސަލާމަތްކުރުމަށްޓަކައި އެޅިފައިވާ މުހިންމު ފިޔަވަޅެއްގެ ގޮތުގައި ދެކޭކަމަށް ފާހަގަކޮށްފައިވެއެވެ. ރާއްޖޭގެ ނިންމުމަށް ތާއީދުކޮށް ތައުރީފްކުރަމުންދާ ޖަމިއްޔާތަކުގެ ތެރޭގައި ”މަދާސް އަގެއިންސްޓް ވޭޕިންގް“ ހިމެނެއެވެ. އެ ޖަމިއްޔާއަކީ ޒުވާނުން އީސިނގިރޭޓާއި ދުރުކުރުމަށްޓަކައި ވަރުގަދަ ފިޔަވަޅުތައް އެޅުމަށް ގޮވާލައި ވޭޕުކުރުމާއި ދެކޮޅަށް ބައިނަލްއަގުވާމީ މައިދާނުގައި ވަކާލާތުކުރަމުންދާ ޖަމިއްޔާއެކެވެ.
މިފަހުން ވިއެޓްނާމުގެ ސަރުކާރުންވެސް ވަނީ ހަރުކަށި ފިޔަވަޅުތަކެއް އެޅުމަށް ނިންމާފައެވެ. އޭގެ ތެރޭގައި އެ ގައުމުގެ ފައިސާއިން 2 މިލިއަންގެ ޖޫރިމަނާއެއް ކުރުން ހިމެނޭއިރު އިމްޕޯޓުކުރުމާއި ވިއްކުން އަދި އުފެއްދުމުގެ މަސައްކަތްތަކުގައި ޝާމިލުވެ އުޅޭކަމަށް ފާހަގަކުރެވިއްޖެ ނަމަ އެމީހަކާއިމެދު މިއަށްވުރެވެސް ހަރުކަށި ފިޔަވަޅުތަކެއް އެޅުމަށް ކަނޑައެޅިފައިވެއެވެ. އެފަދަ މީހުން އެ ގައުމުގެ 3 ބިލިއަނުން ޖޫރިމަނާކުރުމުގެ ފުރުސަތު އޮތްއިރު 15 އަހަރުގެ ޖަލު ހުކުމަކާއި ކުރިމަތިލާން ޖެހުންވެސް އެކަށީގެންވާކަމަށް ރިޕޯޓުތަކުން ފާހަގަކުރެއެވެ.
ރައީސް ޑރ މުހައްމަދު މުއިއްޒުވެސް ވަނީ މިފަދަ މުހިންމު ފިޔަވަޅުތަކެއް ތަންފީޒުކުރަން ފަށާފައެވެ. އެމަނިކުފާނު މި މަސައްކަތްތައް ތަރުތީބުކުރެއްވީ ފިޔަވަހިތަކަށް ބަހާލައިގެން ވިޔަފާރިތަކަށް ގެއްލުން ކުޑަވާނެ އިންތިޒާމުތައް ހަމަޖެއްސުމަށް ފުރުސަތު ދެއްވައިގެންނެވެ. އެގޮތުން އެންމެ ފުރަތަމަ އިމްޕޯޓުކުރުން މަނާކުރެވިގެންދިޔައިރު ދެވަނަ ފިޔަވަހީގެ ދަށުން ވިއްކުމާއި ގެންގުޅުން އަދި ބެހުންވެސް މަނާކުރެވިފައިވެއެވެ.
އިންޑިއާގެ މަލްޓި ސްޕެޝަލިޓީ ޓާޝަރީ ހޮސްޕިޓަލެއްކަމަށްވާ ފޯރޓިސް ހެލްތް ކެއަރގެ ޑޮކްޓަރެއް އެ ގައުމުގެ ނޫސްތަކަށް މައުލޫމާތު ދެއްވާފައިވާއިގޮތުން އީސިނގިރޭޓުގައި ހުންނަ ނިކޮޓީންއަކީ ހަލުވިކޮށް ލޭގެ ޒަރިއްޔާއިން ހަށިގަނޑުގައި އެކުލެވިގެންދާ އެއްޗެކެވެ. އަދި އެކަމުގެ ސަބަބުން ޑޯޕަމިން އުފައްދަން ފެށިގެންދާކަމަށާއި އެހެންކަމުން އެޑިކްޝަން ދެމެހެއްޓުމަށް ބާރުއެޅިގެންދާކަމަށެވެ.
ސިއްހީ ބައެއް މާހިރުން ބުނާގޮތުން ބޭންކޮށްގެން އެކަނި ހައްލުތައް ލިބިގެން ނުދާކަމަށެވެ. އެހެންކަމުން ވޭޕު ފަދަ އާލާތްތައް ބޭނުންކުރަން ފެށުމުގެ ކުރިން އެކަމުން ރައްކައުތެރިކުރުމަށްޓަކައި ފިޔަވަޅުތައް އެޅުމާއި އާންމުން އެކަމުގެ ނުރައްކާތަކަށް ހޭލުންތެރިކުރުމަށްވެސް ފިޔަވަޅުތައް އަޅަންޖެހެއެވެ. އަދި މިފަދަ ގެއްލުންދެނިވި ތަކެއްޗާއި ޒުވާނުން ދުރުހެލިވެ ތިބޭކަން ކަށަވަރުކުރުމަށްޓަކައި ތަންފީޒީ މަސައްކަތްތައްވެސް އެކަށީގެންވާ ގޮތެއްގެ މަތިން ކުރެވެން ޖެހޭކަމަށް ފާހަގަކޮށްފައިވެއެވެ.
ރާއްޖެއަކީ ވޭޕު މަނާކޮށްފައިވާ 33 ގައުމުން އެއް ގައުމެވެ. މީގެ ތެރޭގައި ނިއުޒިލޭންޑް ނޯތުކޮރެއާ ބްރެޒިލް ހިމެނެއެވެ. އަދި 87 ގައުމަކުން މިވަގުތު އީސިނގިރޭޓު ރެގިއުލޭޓްކުރުމުގެ މަސައްކަތްތައް ކުރަމުންދާކަމަށްވެސް ރިޕޯޓުތަކުން ފާހަގަކުރެއެވެ. މަދަނީ ޖަމިއްޔާތަކުންވަނީ ރާއްޖެއާއި ވިއެޓްނާމުން އަޅާފައިވާ ފިޔަވަޅުތަކަށް ތައުރީފްކޮށްފައެވެ.
ދުނިޔޭގެ ސިއްހަތު ޖަމިއްޔާއިންވެސްވަނީ ޒުވާނުންގެ ތެރޭގައި އީސިނގިރޭޓު ބޭނުންކުރެވޭ މިންގަނޑުތައް އިތުރުވަމުންދިއުމާއިމެދު ކަންބޮޑުވުން ފާޅުކޮށްފައެވެ. އެގޮތުން ގިނަ ގައުމުތަކެއްގައި ހަރު އުމުރުފުރާގެ މީހުންނަށްވުރެ ޒުވާނުންގެ ތެރޭގައި ވޭޕުކުރެވޭ މިންވަރުތައް އިތުރުވެފައިވާކަމަށް ބުނާއިރު އަވަސް ފިޔަވަޅުތަކެއް ނާޅާނަމަ އަދަދުތައް އިތުރުވެގެންދާ ރޭޓުތަކަށް ބެލުމުން ބޮޑެތި ސިއްހީ ނުރައްކާތަކެއް ކުރިމަތިވުމުގެ ފުރުސަތު އޮތްކަމަށް ބުނެފައިވެއެވެ.
