ކުރިމަތިވެގެންދިޔަ އިގްތިސާދީ ގޮންޖެހުންތަކުން އަރައިގަތުމުގައި ސްރީލަންކާއިން އަމަލުކޮށްފައިވާގޮތްތަކުން ފިލާވަޅުތައް ލިބިގަތުމަށްޓަކައި ރާއްޖެއިންދަނީ ގާތުން އެ މަސައްކަތްތައް ބަލަމުންކަމަށް ފޮރިން މިނިސްޓަރ ޑރ އަބްދުﷲ ހަލީލް ވިދާޅުވެއްޖެއެވެ.
ސްރީލަންކާއަށް ކުރެއްވި ރަސްމީ ޒިޔާރުގައި ރާއްޖޭގެ ހާރިޖީ ވަޒީރު ޚަލީލް ވަނީ އެ ގައުމުގެ ރައީސް އަނޫރަ ކުމާރަ ޑިސަނަޔަކެއާއި ބައްދަލުކުރައްވާފައެވެ. މި ބައްދަލުވުން ކުރިއަށް ގެންދިޔައީ އެ ގައުމުގެ ރައީސް އޮފީހުގައެވެ. މި ބައްދަލުވުމުގައި މިނިސްޓަރ ޚަލީލް އެ ގައުމުގެ ވެރިކަމަށް އިންތިހާބުވެވަޑައިގެންފައިވުމަށް މަރުހަބާ ވިދާޅުވިއެވެ. އަދި އަންނަމުންދާ ރަނގަޅު ބަދަލުތައް ރާއްޖެއިން ބަލައިގަންނަކަން ހިއްސާކުރެއްވިއިރު އެ ގައުމަށް ކުރިމަތިވެގެންދިޔަ އިގްތިސާދީ ދަތިތަކުން އަރައިގަތުމުގައި އަމަލުކޮށްފައިވާ ގޮތްތައް ގާތުން ބަލައި ފިލާވަޅުތައް ލިބިގަންނަމުންދާކަމަށް ފާހަގަކުރެއްވިއެވެ.
މިިނިސްޓަރ ޚަލީލް ވަނީ ރައީސް އަނޫރަ ކުމާރައަށް ރާއްޖެއަށް ރަސްމީ ދަތުރުފުޅެއްގައި ވަޑައިގަތުމަށް ދައުވަތު ދެއްވާފައިކަމަށްވެސް ރިޕޯޓުތަކުގައިވާއިރު ރާއްޖެއިން އެ ގައުމާއި ދެމެދު ގުޅުންތައް ހަރުދަނާކުރުމަށްޓަކައި ކުރަމުންދާ މަސައްކަތްތަކާއިމެދު ހިތްހަމަޖެހިވަޑައިގަންނަވާކަން ރައީސް އަނޫރަ ހިއްސާކުރެއްވިއެވެ. އަދި ރާއްޖެއާއި ދެމެދު އިތުރަށް ގުޅުން ބަދަހިކުރުމަށްޓަކައި އެ ގައުމުން އަހަމިއްޔަތު ދޭނެކަމުގެ ޔަގީންކަން ދެއްވާފައިވާކަންވެސް ފާހަގަކުރެވެއެވެ.
މި ބައްދަލުވުމުގައި ރާއްޖެއިން ސްރީލަންކާއަށް ކަނޑައަޅާފައިވާ ހައިކޮމިޝަނަރު މަސްއޫދު އިމާދު ބައިވެރިވެވަޑައިގެންނެވިއިރު ފޮރިން ސެކެޓްރީ ފާތިމާތު އިނާޔާގ އިތުރުން އެޑިޝަނަލް ސެކެޓްރީ އައިމިނަތު އަބްދުﷲ ދީދީއާއި އެހެނިހެން އިސް އޮފިޝަލުންނާއި އިއްޒަތްތެރިންވެސް ޝާމިލުވިއެވެ.
