ހެޔޮ އެދޭ ފަރާތްތަކުން ދޭ ފައިސާ ޒަކާތު ހައުސްއަށް ލިބިގަތުމުގެ ނިޒާމު ޤާއިމު ކުރުމަށް މޯލްޑިވްސް އިންލެންޑް ރެވެނިއު އޮތޯރިޓީ، މީރާއާއި ބައްދަލުކުރައްވާ މަޝްވަރާކުރައްވައިފިއެވެ.
ސަދަގާތާއި ހައިރާތާއި މިސްކިތް އެޅުމާއި ގުރުއާން މަރުކަޒުތައް ގާއިމުކުރުމަށް ހެޔޮ އެދޭ ފަރާތްތަކުން ދޭ ފައިސާއާއި ގުޅޭގޮތުން އޮތް ބައްދަލުވުމެކެވެ. އެގޮތުން މި ބައްދަލުވުވުމުގައި އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދާއި މީރާގެ ޑިރެކްޓަރ ޖެނެރަލް ހަސަން ޒަރީރު ވަނީ ބައިވެރިވެވަޑައިގެންފައެވެ.
މި ނިޒާމު ގާއިމު ކުރުމާއި ގުޅޭގޮތުން މިނިސްޓަރ ވިދާޅުވީ ދިވެހިރާއްޖޭގެ ޒަކާތު ހައުސްއަށް މުދަލު ޒަކާތުގެ ފައިސާގެ އިތުރުން ސަދަގާތާއި ހައިރާތާއި ހިބައާއި މި ނޫން ވެސް ހެޔޮކަންކަމަށް ހޭދަކުރަން ދެވޭ ފައިސާ ޖަމާކުރެވޭނެ ނިޒާމެއް އަންނަ ހަފްތާގައި ޤާއިމު ކުރެވިގެންދާނެކަމަށެވެ. މި ނިޒާމުގެ ބޭނުމަކީ ރާއްޖޭގެ ރައްޔިތުން ހެޔޮކަންކަމަށް ކުރާ ހޭދަ ރާއްޖޭގައި ބޭނުންޖެހިފައިވާ ދާއިރާތަކަށް ހޭދަކުރުމުގެ ނިޒާމެއް އުފެއްދުންކަމަށް މިނިސްޓަރ ވިދާޅުވި އެވެ.
ޝަހީމް ވިދާޅުވީ، ހެޔޮކަންކަމަށް ހޭދަކުރުމުގެ ޙާޖަތު ރާއްޖޭގައި ވަރަށް ބޮޑަށް އޮތް ހިނދު، ރާއްޖޭގެ މުޖުތަމައު ހެޔޮ ގޮތުގައި ބިނާކުރަން އިސްކަން ދިނުން މުހިންމުކަމަށެވެ. އެގޮތުން ވަރަށް ގިނަ ރަށް ރަށަށް މިސްކިތްތަކާއި ގުރުއާން ކުލާސްތަކާއި އެތަންތަނަށް ބޭނުންވާ ވަސީލަތްތައް ހޯދަން ޖެހިފައިވާކަމަށާއި ރާއްޖޭގެ ޒަކާތު ހައުސް ތަރައްޤީ ކުރަމުން މިދަނީ އިސްލާމީ ދުނިޔޭގެ ނަމޫނާ ޒަކާތުގެ އިދާރާއެއްކަމުގައިވާ ކުވައިތު ޒަކާތު ހައުސް ނަމޫނަ އަކަށް ބަލައިގެންކަމަށެވެ.
