މިދިޔަ އެއް އަހަރުގެ ތެރޭގައި، ނަފްސާނީ ސިއްހަތުގެ ހެލްޕްލައިނަށް 3،000 އަށް ވުރެ ގިނަ ކޯލަށް ޖަވާބުދީފައި ވާނެކަމަށް ހެލްތް މިނިސްޓްރީން ބުނެފިއެވެ.
މިނިސްޓްރީން މިއަދު މީޑިއާތަކަށް އާންމު ކުރި ބަޔާނެއްގައި ބުނީ ވޭތުވެ ދިޔަ އެއް އަހަރުގެ ތެރޭގައި ނަފްސާނީ ސިއްހަތުގެ ގައުމީ ހެލްޕްލައިން 1677 އަށް ތިން ހާހަށް ވުރެ ގިނަ ކޯލް ލިބިފައިވާކަމަށެވެ. އަދި މި ކޯލުތަކަށް ޖަވާބު ދީ، ބައެއް ފަރާތްތަކަށް ރިފަރަލް ހަދާފައިވާނެކަމަށް މައުލޫމާތު ދިނެވެ.
މިނިސްޓްރީން ބުނި ގޮތުގައި މި މުއްދަތުގެ ތެރޭގައި 3،651 ފޯނު ކޯލަށް ޖަވާބުދީ 53 މީހަކު ހާއްސަ ފަރުވާއަށް އެހީތެރިކަން ފޯރުކޮށްދެވުނެވެ. އަދި ނަފްސާނީ އެކިއެކި އުނދަގޫ ހުންނަ ފަރާތްތަކަށް ވެސް އެހީތެރިކަން ފޯރުކޮށްދީފައިވާނެކަމަށް ބުންޏެވެ.
މި ހެލްޕްލައިންގެ މަގުސަދަކީ، ދިރިއުޅުމުގައި ދިމާވާ ގޮންޖެހުންތަކުން އަރައިގަތުމުގައި އެހިތެރިވުމާއި، ނަފްސާނީ އެކި އުނދަގޫތައް ކުރިމަތިލަމުންދާ ފަރާތްތަކަށް ފޯނު މެދުވެރިކޮށް ނަފްސާނީ ފުރަތަމަ އެހީ ފޯރުކޮށް ދިނުން އަދި ނަފްސާނީ ދުޅަހެޔޮކަން ކުރިއެރުވުމެވެ.
މީގެ އިތުރުން ދިވެހިރާއްޖޭގެ ނަފްސާނީ ސިއްހަތުތުގެ ގޮންޖެހުންތަކާ ކުރިމަތިލާންޖެހިފައިވާ ފަރާތްތަކަށް އެހީތެރިކަން ފޯރުކޯށްދީ ނަފްސާނީ ގޮތުން އުންދަގޫ ހާލަތްތަކާއި އިހްސާސްތައް ކުރިމަތިވާ ދަނޑިވަޅެއްގައި އެފަރާތްތަކަށް ސައިކޯ ސޯޝަލް ސަޕޯޓްގެ އެހީތެރިކަން ފޯރުކޮށްދީ ވާހަކަތައް ޙިއްސާކުރެވޭނެފަދަ މާހައުލެއް ގާއިމު ކުރުމަކީ ވެސް އަމާޒެކެވެ.
މިދިޔަ އަހަރުގެ ފެބްރުއަރީ މަހު އިފްތިތާހު ކުރި މި ހެލްޕްލައިނުން ނަފްސާނީ ފުރަތަމަ އެހީތެރިކަން ހުރިހާ އުމުރަކަށްވެސް ފޯރުކޮށްދެވޭނެއެވެ. އަދި ނަފްސާނީ ފުރަތަމަ އެހީގެ އިތުރުން އެފަދަ މައްސަލަ ޙައްލުކުރުމުގައި އެހީތެރިވުމާއި، މައުލޫމާތު ފޯރުކޮށްދިނުމާއި ގުޅުންހުރި ޚިދުމަތްތަކަށް ހެދިފައިވާ އުސޫލުތަކުގެ ތެރެއިން ރެފަރަލް ހަދައިދެވޭނެއެވެ.
ނަފްސާނީ ޞިއްޙަތުގެ ޤައުމީ ހެލްޕްލައިނެއް އިފްތިތާޙްކުރުމަކީ ރައީސުލްޖުމުހުރިއްޔާ ޑރ. މުޙައްމަދު މުޢިއްޒުގެ ހަފްތާ 14 ގެ ވަޢުދެކެވެ.
