ނިމިދިޔަ އަހަރު ހޭދަކުރަންޖެހުނީ ބޭރުގެ އެކި ފަރާތްތަކާއި ރާއްޖޭގެ އެކި ދިމާތަކުން ނަގާފައިވާ ދަރަނިތައް ދެއްކުމާއި އިގްތިސާދު ހަމައަކަށް އެޅުވުމުގައިކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެއެވެ.
ކުޑަހުވަދޫގެ ރައްޔިތުންނާއި ބައްދަލުކުރައްވައި ވާހަކަދައްކަވަމުން ރައީސް ޑރ މުއިއްޒު ވިދާޅުވީ، މީގެ އަހަރެއްހާ ދުވަސް ކުރިން ކުޑަހުވަދޫއަށް ވަޑައިގެންނެވުމަށް ފުރުސަތު ލިބިވަޑައިގެންނެވިކަމަށެވެ. އަދި އޭރު ގައުމު އޮތް ހާލަތާއި މިހާރު އޮތް ހާލަތާއި ތަފާތުކަމަށާއި ވަރަށް ގިނަކަންކަން ރަނގަޅުކުރެވި ރަނގަޅު މިސްރާބަކަށް ކުރިއަށް ގޮސް ކާމިޔާބުތަކެއް ހާސިލުކުރެވެމުންދާކަމަށް ފާހަގަކުރެއްވިއެވެ.
ރައީސް ވިދާޅުވީ، މީގެ ކުރިން ކުޑަހުވަދޫގެ ރައްޔިތުންނާއި ބައްދަލުކުރެއްވިއިރު ގައުމުގެ އިގްތިސާދު އޮތް ހާލަތާއި މިހާރާއި ވަރަށް ތަފާތުކަމަށެވެ. އެގޮތުން މީގެ ކުރިން ލިބިވަޑައިގެންނެވި ބަޖެޓު އޮތީ ރައްޔިތުންނަށް ބޭނުންވާ ތަރައްގީގެ ކަންކަން ކުރިއަށް ގެންދެވޭނެ ގޮތަކަށް ބައްޓަންކުރެވިފައި ނޫންކަމަށާއި އެއީ އެމްޑީޕީގެ މެޖޯރިޓީ އޮތް 19 ވަނަ މަޖިލީހުން ފާސްކުރި ބަޖެޓެއްކަން ހިއްސާކުރެއްވިއެވެ.
އެމަނިކުފާނު ވިދާޅުވީ، ގާނޫނު އޮންނަ ގޮތުން އައު ބަޔަކު ވެރިކަމާއި ހަވާލުވިނަމަވެސް އެއިރެއްގައި އޮންނަ ސަރުކާރަށް އެންމެ ފަހުގެ ބަޖެޓު ހުށައެޅުމަށް ފުރުސަތު ލިބިގެންދާކަމަށެވެ. އަދި އޭރު އޮތީ އެމްޑީޕީގެ ސަރުކާރުގެ ސުޕާރ މެޖޯރިޓީ އޮތް މަޖިލީހެއްކަމަށްވުމުން އެމަނިކުފާނު ވެވަޑައިގެންނެވި އެއްވެސް ވައުދުފުޅެއް ނުފުއްދޭނެ ގޮތަށް ބަޖެޓު އެކުލަވާލިކަމަށެވެ.
ރައީސް ވިދާޅުވީ، އެ ދުވަސްތަކާ މިއަދުގެ ހާލަތު ތަފާތުކަމަށެވެ. އެގޮތުން މިހާރު މަޖިލީހުގެ ތެރެއިން ސަރުކާރަށް އެއްބާރުލުން ލިބިގެންދާ ގޮތަށް ރައްޔިތުންގެ އެހީތެރިކަމާއިއެކު މެމްބަރުން އައްޔަނުކުރެވިފައިވާކަމަށާއި މިދިޔަ އަހަރުގެ ގިނަ ދުވަސްތައް ހޭދަކުރަންޖެހުނީ ބޭރު ގައުމުތަކުން ނަގާފައިވާ ލޯނުތައް އަނބުރާ ދެއްކުމުގައިކަން ހާމަކުރެއްވިއެވެ.
އެމަނިކުފާނު ވިދާޅުވީ، ރާއްޖޭގެ އެކި އެކި ފަރާތްތަކުގެ އަތުން ނަގާފައިވާ ދަރަނިތައް ދެއްކުމުގެ މަސައްކަތްތައްވެސް ކުރެއްވިކަމަށާއި އެކަންކަމުގެ އިތުރުން އިގްތިސާދު ހަމައަކަށް އެޅުވުމަށްޓަކައިވެސް މަސައްކަތްތައް ކުރިއަށް ގެންދެވިކަމަށް ވިދާޅުވިއެވެ. އެހެންކަމުން ނެރެވިފައިވާ ރަނގަޅު ނަތީޖާތަކުގެ ސަބަބުން އަމަލީގޮތުން ވައުދުފުޅުތައް ފުއްދެވުމުގެ މަސައްކަތްތައް ކުރިއަށް ގެންދެވޭނެ ގޮތަށް މިހާރު ކަންކަން ފަހިވެފައިވާކަމަށެވެ.
