ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިއްވެވި ރިޔާސީ ބަޔާނާއި ޤައުމުގެ މިހާރުގެ ޙާލަތާ ދެމެދު އެއްވެސް ގުޅުމެއް ނެތްކަމަށް ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ)ގެ ޕާލިމެންޓަރީ ގްރޫޕުގެ ލީޑަރު އިބްރާހީމް ނާޒިލް ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހުގެ ތަޅުމުގައި އޮތީ 2025 ވަނަ އަހަރަށް ރައީސުލްޖުމްހުރިއްޔާ ޑރ މުހައްމަދު މުއިއްޒު އިއްވި ރިޔާސީ ބަޔާނަށް އިދިކޮޅު އެމްޑީޕީއިން ޖަވާބު ދިނުމެވެ.
ރިޔާސީ ބަޔާނަށް ޖަވާބު ދެއްވަމުން ނާޒިލް ވިދާޅުވީ ވިޔަފާރިތައް ކުރިއަރުވާ އިގްތިސާދު ކުރިއަރުވާނެ ގޮތް އެ ރިޔާސީ ބަޔާނުގައި ނެތްކަމަށެވެ.
ރައީސް މުއިއްޒުއަށް ވެރިކަން ހަވާލުކުރިއިރު، މި ގައުމުގެ އިގްތިސާދު އޮތީ ވަރަށް ފުރިހަމައަށްކަމަށާއި، ފަތުރުވެރިކަންވެސް އޮތީ ވަރަށް ފުރިހަމައަށްކަމަށް ނާޒިލް ވިދާޅުވިއެވެ. ނަމަވެސް މި ސަރުކާރުން ވަނީ އިގްތިސާދު އިނދަ ޖައްސާލާފައިކަމަށް ފާހަގަކޮށް ނާޒިލް ވިދާޅުވީ، ޑޮލަރު ހޯދުން ވެފައި އޮތީ މާވަހަރެއް ހޯދުންހާ ދަތިކަމަކަށްވެފައިކަމަށެވެ.
ބައިނަލްއަގުވާމީ ގޮތުން ދިމާވި ދަތިތަކުގެ ސަބަބުން އެމްޑީޕީގެ ސަރުކާރުން ލޯނު ނަގަން ޖެހުނުކަމަށާއި، ނަމަވެސް އިގްތިސާދު ރަނގަޅު ކުރުމުގެ އިސްލާހީ އެޖެންޑާއެއް އެމްޑީޕީގެ އޮތްކަމަށް ފާހަގަކޮށް ނާޒިލް ވިދާޅުވީ ނަމަވެސް މި ސަރުކާރުން ވަނީ އެކަން ހުއްޓާލާފައިކަމަށެވެ. މަޝްރޫއުތައްވެސް ވަނީ ހުއްޓިފައިކަމަށް ނާޒިލް ވިދާޅުވިއެވެ.
ހަރަދުތައް އިތުރުވެގެން ދިޔަ ނަމަވެސް، އާމްދަނީ އިތުރު ނުވާކަމަށް ނާޒިލް ވިދާޅުވިއެވެ. އަދި ވިދާޅުވީ ސަރުކާރުން ފާސްކުރި ބަޖެޓާއި އެއްގޮތަށް ކަންކަން ކުރިއަށް ނުދާކަމަށެވެ. ރާއްޖޭގެ ރޭޓިންތައްވެސް ދަށްވެފައިވާކަމަށް ފާޙަގަކޮށް ނާޒިލް ވިދާޅުވީ، އިގްތިސާދު ރަނގަޅުކުރުމަށް އަޅަން ޖެޙޭ ފިޔަވަޅުތަކަށް ބޭރުގެ ފެހި ސިގްނަލްތައް ލިބިފައިވާކަމަށް ސަރުކާރުން ބުނި ނަމަވެސް، އެ ސިގްނަލްތައް ވެގެން ދިޔައީ ސައިބޯނި ބޮތްކަކަށްކަމަށެވެ. މި ވާހަކަތައް ރިޔާސީ ބަޔާނުގައި ނެތްކަމަށް އޭނާ ވިދާޅުވިއެވެ.
ރިޔާސީ ބަޔާނަށް ނާޒިލް ޖަވާބު ދެއްވަމުން ދިޔައިރު، ޕީއެންސީގެ މެންބަރުން ވަނީ އަޑުގަދަކޮށްފައެވެ. ރިޔާސަތުގައި އިންނަވާ އަބްދުލްރަހީމް ވަނީ ތަކުރާރުކޮށް ގަވާއިދަށް ހުރުމަތްތެރިކޮށް ހިތްތެވުމަށް މެންބަރުންގެ އަރިހުން އެދިވަޑައިގެންފައެވެ.
