ރަށްތަކުގެ ހުއްޓިފައި ހުރި މަޝްރޫއުތައް ދެ މަސް ތެރޭގައި ފެށޭނެ: ރައީސް

އެކި ސަބަބުތަކާއި ހުރެ ހުއްޓިފައި ހުރި މަޝްރޫއުތައް ކުރިޔަށް އޮތް ދެ މަސް ދުވަހުގެ ތެރޭގައި ފެށިގެންދާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.

ދ. އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން މާއެނބޫދޫއަށް ވަޑައިގެން ރަަށުގެ ރައްޔިތުންނާއި ބައްދަލު ކުރައްވައި ދެއްކެވި ވާހަކަފުޅުގައި ރައީސް މުއިއްޒު ޖުމްލަކޮށް ފާހަގަކުރެެއްވީ ސިޔާސަތުތައް ތަންފީޒު ކުރުމަށް ސަރުކާރުން ކުރަމުންދާ މަސައްކަތްތަކެވެ. ރައީސް ވިދާޅުވީ ސިލްސިލާކޮށް ރަށްތަކަށް ދަތުރު ކުރުމުގެ ބޭނުމަކީ ރައްޔިތުންނާއި ބައްދަލުކޮށް، ރަށްތަކަށް ބޭނުންވެފައިވާ ކަންކަން އަމިއްލަފުޅަށް ބައްދަލު ކުރައްވައި ހައްލު ކުރުން ކަމަށެވެ.

ބޯހިޔާވަހިކަން ހައްލު ކުރުމަށް ގިނަ މަސައްކަތްތައް ކުރަންޖެހޭއިރު، އެކަމަށް އެޅެން އޮތް ފިޔަވަޅަކީ ބިން ހިއްކުންކަމަށް ވާތީ ރިޔާސީ އިންތިހާބުގައި ވައުދުވެވަޑައިގެންފައިވާ ގޮތަށް 30 ހެކްޓަރު ހިއްކުމުގެ މަސައްކަތް ފެށިގެންދާނެކަމަށް ރައީސް ވިދާޅުވިއެވެ. ބޭނުން ވަނީ ރައްޔިތުން އެދޭ ގޮތަށް މަސައްކަތް ކުރުންކަން ފާހަގަކުރައްވައި ރައީސް ވިދާޅުވީ، އެކި ރަށްތަކުގެ ހުރި ހުށަހެޅުންތައް ތަފާތު ކަމަށެވެ.

ފެނާއި ނަރުދަމާ މަޝްރޫއު ކުރިޔަށް ގެންދިއުން… ރައްޔިތުން ބޭނުންވާ ގޮތަށް، އެދޭ ގޮތަށް އަޅުގަނޑުމެން ކަންކަން ކުރިޔަށް ގެންދިއުމަށް ބޭނުން ވަނީ..

ރައީސް ވިދާޅުވީ އެކި ސަބަބުތަކާއި ހުރެ ހުއްޓިފައި ހުރި މަޝްރޫއުތައް މި ދެ މަސް ދުވަހުގެ ތެރޭގައި ފެށިގެންދާނެކަމަށެވެ. ރައީސް ވިދާޅުވީ 2024 ވަނަ އަހަރު އިގްތިސާދީ ގޮތުން ގައުމު އުނދަގޫ ހާލަތެއްގައި އޮތް އިރު، ދެވަނައަށް ދިމާވީ ދައްޗަކީ ބަޖެޓުގެ ތާށިކަން ކަމަށެވެ. އެހެން ނަމަވެސް މި ސަރުކާރުން ހުށަހެޅި ބަޖެޓު ތަންފީޒު ކުރުމުގެ މަސައްކަތް މިހާރު ފެށިފައި ވާތީ ރިޔާސީ ބަޔާނުގައި ދެންނެވި ގޮތަށް މިއީ ތަރައްގީގެ އަހަރަށް ވެގެންދާނެކަމަށް ރައީސް ވިދާޅުވިއެވެ.

ކުރީ ސަރުކާރުގެ މައުޟޫއު ނަންގަވައި ރައީސް ވިދާޅުވީ، ޕްރޮޖެކްޓުތައް ހަވާލުކޮށްފައި ހުރީ އެންމެ ރަނގަޅަށް ނޫންކަމަށެވެ. މަސައްކަތުގެ އެކި ފޭސްތައް، ތަފާތު ކުންފުނިތަކާއި ހަވާލުކޮށްފައި ހުރުމުގެ ސަބަބުން މުޅި ޕްރޮޖެކްޓު އޮތީ ހުއްޓިފައިކަން ރައީސް ވަނީ ފާހަގަކުރައްވާއެވެ.

ރިޔާސީ ބަޔާނުގައި ގައުމު ހިންގުމުގައި ސަރުކާރުން ގެންގުޅޭ ވިސްނުން ހަމަނުއްވާފައިވާއިރު، ރައީސް ވިދާޅުވީ އޭގައި ހުރި ކޮންމެ ވާހަކައެއް ތަންފީޒު ކުރެވޭނެކަމަށެވެ.