ބާރުތައް މުށުތެރެއަށްލާ, ޚުދުމުތާރު ވެރިކަމެއް މި ރާއްޖޭގައި ގާއިމްކުރުމަށް ފުރުސަތު ނުދެއްވުމަށް އެމްޑީޕީގެ ރައީސް އަބްދުﷲ ޝާހިދު ގޮވާލައްވައިފިއެވެ.
ޝާހިދު އެފަދައިން ވިދާޅުވީ ސުޕްރީމް ކޯޓުގެ ބެންޗުގެ އަދަދު މަދުކުރުމަށް ހޮޅުދޫ ދާއިރާގެ ޕީއެންސީ މެމްބަރު އަބްދުއްސައްތާރު މުޙައްމަދު މަޖިލީހަށް ބިލެއް ހުށަހަޅުއްވާފައިވާތީ އެކަމާ ގުޅިގެން ކުރެއްވި ޕޯސްޓެއްގައެވެ.
ޝާހިދު ވިދާޅުވީ، މި ދަނޑިވަޅަކީ ގާނޫނު އަސާސީއަށް ގެނެސްފައިވާ އިސްލާހަކާއި ގުޅުންހުރި ދުސްތޫރީ މައްސަލައެއް ސުޕްރިމް ކޯޓުން ބަލަމުންދާ ދަނޑިވަޅެއް ކަމަށެވެ. އެހެންކަމުން މިފަދަ ދަނޑިވަޅެއްގައި އެ ކޯޓުގެ ބެންޗު ބަދަލުކުރުމަށް ރައީސް ޑރ މުޙައްމަދު މުއިއްޒު ގާނޫނަށް ބަދަލު ގެންނެވުމަކީ ރައީސަކު ޝަރުޢީ ނިޒާމަށް އަމާޒުކޮށް ދޭނެ އެންމެ ބޮޑު ޢުދުވާނީ ހަމަލާކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ، އެކަން ހަރުކަށި އިބާރާތުން ކުށްވެރި ކުރައްވާ ކަމަށެވެ.
ޝާހިދު ވަނީ ދިވެހިރާއްޖެ ބަލައިގެންފައިވާ، ތިންބާރު ވަކިކޮށްފައިވާ ޑިމޮކްރަޓިކް ނިޒާމުގެ މިނިވަންކަން ނެތިކޮށް، ބާރުތައް މުށުތެރެއަށްލާ, ޚުދުމުތާރު ވެރިކަމެއް މި ރާއްޖޭގައި ގާއިމްކުރުމަށް ފުރުސަތު ނުދެއްވުމަށް ގޮވާލައްވާފައެވެ. އެގޮތުން ”ގޮނޑިކޮއްކޮ“ ސުޕްރިމް ކޯޓެއް އުފެއްދުމަށް ރައީސް މުއިއްޒުއަށް ފުރުސަތު ނުދިނުމަށް ރައްޔިތުންގެ މަޖިލިހުގެ އެންމެހާ މެމްބަރުންނަށް ގޮވާލައްވާކަމަށް ޝާހިދު ވިދާޅުވިއެވެ.
ޝާހިދު ވިދާޅުވީ، ޝަރުއީ ދާއިރާއާއި ދެކޮޅަށް ރައީސް މުއިއްޒު މި ހިންގަވާ ބޮޑު ޖަރީމާއާއި ދެކޮޅަށް މުޅި ޝަރުއީ ދާއިރާއާއި, ހުރިހާ ރައްޔިތުން ތެދުވާންޖެހޭނެ ކަމަށެވެ.
މީގެ އިތުރުން، ޚުދުމުޚްތާރު ވެރިކަމަށް ދިވެހި ރައްޔިތުން ޖާގައެއް ނުދޭނެކަމަށްވެސް ޝާހިދު ވިދާޅުވިއެވެ.
