މަޖިލީހުގެ ރައީސްކަމުގެ މަގާމުގައި ހުރުމަށް އެއްވެސް ހުރަހެއް ނެތްކަމަށާއި، ފުރިހަމަ މިނިވަންކަން އެބައޮތް ކަމަށް މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
ޓޫރިޒަމް މިނިސްޓަރުކަމުގެ މަގާމުން އަބްދުލްރަހީމްގެ ދަރިކަލުން އިބްރާހީމް ފައިސަލް ވަކިކުރެއްވި ފަހުން ތަފާތު އެކި ފުރުސަތުތަކުގައި އެމްޑީޕީގެ މެންބަރުން ގެންދަވަނީ އެމަނިކުފާނަށް ހަމްދަރުދީވާކަމަށް ވިދާޅުވަމުންނެވެ. އެއީ އަބްދުލްރަހީމްއަށް ސިޔާސީ ގޮތުން ފިއްތުންތަކެއް އެބަހުރިކަމަށް ފާހަގަކޮށެވެ. އެގޮތުން އަބްދުލްރަހީމް ރިޔާސަތުން ބޭރުކުރުމުގެ ފުރުސަތުވެސް އެބައޮތްކަމަށް އެމްޑީޕީއިން ގެންދަނީ ފާހަގަކުރަމުންނެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި މި ވާހަކަ ދެއްކެވީ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމްއެވެ. އަބްދުލްރަހީމްގެ ހާލަތާއި، އެމަނިކުފާނަށް ހުރި ފިއްތުންތައްވެސް އެނގޭކަމަށް މީކާއީލް ވިދާޅުވުމާއިއެކު، އަބްދުލްރަހީމް ވަނީ އެވާހަކަތައް ހުއްޓުވާފައެވެ. އަދި ވިދާޅުވީ މީކާއީލްއަށް އެމަނިކުފާނުގެ ސިއްހީ ހާލަތާއި، ދިރިއުޅުމުގެ ހާލަތުވެސް އެނގިވަޑައި ނުގަންނަވާނެކަމަށެވެ.
އެހެންކަމުން އެކަމަށް އެއްޗެއް ވިދާޅުވުމުގެ ފުރުސަތު ނޯންނާނެކަމަށް އަބްދުލްރަހީމް ވިދާޅުވިއެވެ. އަބްދުލްރަހީމް ވިދާޅުވީ އޭނާ މަޖިލީހުގެ ރިޔާސަތުގައި އިންނަނީ މިނިވަންކަމާއިއެކުކަމަށެވެ.
ރައްޔިތުންނަށް ކަންކަން އޮޅުވާލުމަށް ގަލޮޅު ދެކުނު ދާއިރާގެ މައިކް ބޭނުން ނުކުރެއްވުމަށް ތަކުރާރުކޮށް ދަންނަވަން.
އަބްދުލްރަހީމް ވިދާޅުވިއެވެ.
ރިޔާސަތަށް އެމަނިކުފާނު އިންތިހާބުކޮށްދެއްވީ މަޖިލީހުގެ މެންބަރުންކަމަށާއި، އެ ގޮނޑީގައި އިންނެވުމަށް އެއްވެސް ހުރަހެއް ނެތްކަމަށް އަބްދުލްރަހީމް ވިދާޅުވިއެވެ. ރައްޔިތުންނަށް ކަންކަން އޮޅުވާނުލުމަށް މީކާއީލްގެ އަރިހުން އަބްދުލްރަހީމް އެދިވަޑައިގެންނެވިއެވެ.
އެހެން ނަމަވެސް މީކާއީލް ވަނީ ހަމަ އެ ވާހަކަތައް ތަކުރާރުކުރައްވާފައެވެ. އަދި ވިދާޅުވީ ސަރުކާރުން މަސައްކަތް ކުރަމުންދަނީ މަޖިލީހުގެ ބާރު ކަނޑުވާލުމަށްކަމަށެވެ. މިއީ ދިވެހި ރައްޔިތުންވެސް ދަންނަކަމެއްކަމަށް މީކާއީލް ވިދާޅުވިއެވެ. އަބްދުލްރަހީމް ވަނީ ތަކުރާރުކޮށް މީކާއީލްގެ ވާހަކަ ހުއްޓުވާފައެވެ. އަނެއްކާވެސް މީކާއީލްއަށް މައުޟޫއަށް ބަހުސް ކުރުމަށް ފުރުސަތު ދިން ނަމަވެސް، މައުޟޫއިން ބޭރުން ވާހަކަދައްކަވާތީ މައިކް ވަނީ ކަނޑާލާފައެވެ.
