މިއަހަރުގެ ރަމަޟާން މަހު މުދާ ދޫކުރުމުގެ މަސައްކަތް ކުރިއަށްދާ ގަޑިތައް މޯލްޑިވްސް ޕޯޓްސް ލިމިޓެޑް (އެމްޕީއެލްއިން) އާންމުކޮށްފިއެވެ.
އެމްޕީއެލްއިން ބޭއްވި ނޫސްވެރިންގެ ބައްދަލުވުމުގައި މި ބަދަލުތަކުގެ ތަފްސީލުތައް ވަނީ ހިއްސާކޮށްފައެވެ. އެގޮތުން އެމްޕީއެލްއިން މައުލޫމާތު ދޭ ގޮތުގައި ޑެލިވަރީ އޯޑަރ އެސައިން ކުރުމުގެ މަސައްކަތް ކުރިއަށްދާނީ ހޮނިހިރު ދުވަހުން ފެށިގެން ބުރާސްފަތި ދުވަހުގެ ހެނދުނު 09:15 އިން މެންދުރު 13:00 އަށް އަދި ރޭގަނޑު 21:15 އިން 22:20 އަށެވެ.
މީގެ އިތުރުން، އާންމު ޚިދުމަތުގެ ދަށުން ކަނޑާ ސަރަޙައްދަށް ގެންދިއުމަށް ނޯޓުކޮށްދެވޭ ކޮންޓެއިނަރުގެ އަދަދަކީ ހޮނިހިރު ދުވަހުން ފެށިގެން ބުރާސްފަތި ދުވަހަށް 150 ޓީއީޔޫއެސްއެވެ. އަދި ބައި ދުވަހެއްނަމަ 100 ޓީއީޔޫއެސްއެވެ.
އެމްޕީއެލްއިން މައުލޫމާތު ދޭ ގޮތުގައި މި ދުވަސްތަކުގައި އޮންލައިންކޮށް ޝިޕްޓިންގ އަށް ރިކުއެސްޓް ކުރަން ފަށާނީ ހެނދުނު 10:00 ގައެވެ. އަދި ނިމޭނީ ޖެހިގެން އަންނަ ދުވަހުގެ ހެނދުނު 09:00 އަށެވެ.
މީގެ އިތުރުންވެސް ބައެއް ޚިދުމަތްތައް ދޭ ގަޑިތަކަށް އެމްޕީއެލްއިން ވަނީ ބަދަލުތައް ގެނެސްފައެވެ.
އެ ކުންފުނިން މައުލޫމާތު ދޭ ގޮތުގައި ރަމަޟާން މަހު މާލޭގެ ކޮމަރޝަލް ބަނދަރުން ކްލިއަރ ކުރާ ހުރިހާ ބާވަތެއްގެ މުދާވެސް ދޫކުރުމަށް ހަމަޖެހިފައިވަނީ ހުކުރު ދުވަސް ފިޔަވައި ޕޯޓް މަސައްކަތްކުރާ ހުރިހާ ދުވަހެއްގެ ހެނދުނު 09:15 އިން 16:00 އަށް އަދި ރޭގަނޑު 21:15 އިން 01:30 އާ ހަމައަށެވެ.
މި ގަޑިތަކާ އެއްގޮތަށް ހުޅުމާލޭ ޓާމިނަލްއިންވެސް ޚިދުމަތް ދެމުންދާނެއެވެ.
މީގެ އިތުރުން، ކުންފުނީގެ މުވައްޒަފުންނަށް ލުއިފަސޭހަ ކުރުމަށްވެސް ބައެއް ކަންކަން ހިމެނިފައިވެއެވެ. އެގޮތުން ކޮންމެ ނަމާދަކަށް ބަންގި ގޮވާ ވަގުތުން ފެށިގެން 20 މިނެޓުގެ ހުސްވަގުތެއް ނަމާދު ކުރުމަށްޓަކައި މުވައްޒަފުންނަށް ދޭނެއެވެ. އަދި އެ 20 މިނެޓަށް ޚިދުމަތްތައްވެސް މެދުކަނޑާލެވޭނެއެވެ.
