ސިޓީތަކާއި ލިޔެކިއުންތައް ފޮނުވުމުގެ ބަދަލުގައި އެމަނިކުފާނު އިސްކުރައްވަނީ ރައްޔިތުންނާއި ބައްދަލު ކުރައްވައި ގާތުން މަސައްކަތް ކުރުމަށްކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ އަތޮޅުތަކަށް ކުރައްވާ ދަތުރުފުޅުގެ ތެރެއިން، ދ. ބަނޑިދޫއަށް ވަޑައިގެން އެ ރަށުގެ ރައްޔިތުންނާއި ބައްދަލު ކުރައްވައި ދެއްކެވި ވާހަކައިގައި ވަނީ ސަރުކާރުގެ ސިޔާސަތުތައް ތަންފީޒު ކުރުމަށް ކުރަމުންދާ މަސައްކަތްތަކާއި ގުޅޭގޮތުން މައުލޫމާތު ދެއްވާފަ އެވެ.
ރައީސް ވިދާޅުވީ ރަށްތަކުގެ އެކި ސިނާއަތްތައް ކުރިއަރުވައި، ތަރައްގީ ގެނައުމަށް ސަރުކާރުން އަބަދުވެސް އެއްބާރުލުން ދެމުން ގެންދާނެކަމަށެވެ.
ބަނޑިދޫގެ މަޝްރޫއުތަކާއި ގުޅޭގޮތުން ރައީސް ވިދާޅުވީ ރަށުގެ އައިސް ޕްލާންޓުގެ މަސައްކަތް ފެށިގެން ދިޔައިރު އެކި ސަބަބުތަކާއި ހުރެ ހުއްޓިފައި ހުރި މަޝްރޫއުތައް މަހެއްހާ ދުވަހުގެ ތެރޭގައި ފެށޭނެކަމަށެވެ. ރަށުގެ ކަންސިލާއި ބައްދަލު ކުރުމުން އެމަނިކުފާނަށް ގިނަ ކަންބޮޑުވުންތައް ލިބިފައިވާކަން ފާހަގަކުރައްވައި ރައީސް ވިދާޅުވީ ރައްޔިތުން ބޭނުންވާ ކަންކަން ގާތުން އޮޅުންފިލުވައި ހައްލު ގެންނަވާނެކަމަށެވެ.
ރައީސް ވިދާޅުވީ ރައްޔިތުންގެ ގާތަށް ގޮސް، މަސައްކަތް ކުރެވުމަކީ އެމަނިކުފާނަށް ލިބޭ އުފަލެއްކަމަށާއި ސިޓީތަކާއި ލިޔެކިއުންތައް ފޮނުވައި މާލޭގައި ހުންނަވައިގެން އެންގުންތައް އެންގެވުމަށް އެމަނިކުފާނު ބޭނުންފުޅު ނުވާކަމަށެވެ.
އަޅުގަނޑަށް ވަރަށް ފަސޭހަވީސް އެގޮތަށް އަމަލު ކުރަން، އެކަމަކު އަޅުގަނޑު ބޭނުމީ ރައްޔިތުންގެ ގާތަށް ގޮސް ކަންކަން އޮޅުންފިލުވުމަށް
ރައީސް ވިދާޅުވީ މީގެ ކުރީގައި އަމަލު ކުރަމުން ދިޔަ ގޮތަށް، މާލޭގެ އޮފީހަކުން ސަރުކާރު ހިންގުމަށް އެމަނުމުފާނު ބޭނުންފުޅު ނުވާކަމަށެވެ.
މީގެއިތުރުން ރައީސް ވިދާޅުވީ މި އަހަރުގެ ތެރޭގައި، ސަރުކާރުން ރާވާފައި ވަނީ ގިނަ މަޝްރޫއުތައް ކުރިޔަށް ގެންދިއުމަށެވެ. އެގޮތުން ބަޖެޓުން ހާއްސަ ސަމާލުކަމެއް ދީފައިވާ ތައުލީމީ ދާއިރާއާއި ސިއްހީ ދާއިރާއާއި ގުޅުން ހުރި މަޝްރޫއުތައް ކުރިޔަށް ދާނެކަމަށް ރައީސް ވިދާޅުވިއެވެ.
ރައީސް ވިދާޅުވި ގޮތުގައި އެމަނިކުފާނު ރައްޔިތުންނަށް އެންމެ ބޮޑަަށް ދޭން ބޭނުންވާ ޔަގީންކަމަކީ ވައުދުތައް ފުއްދުންކަމަށެވެ. ރިޔާސީ ބަޔާނަށް އަލިއަޅުއްވާލައްވައި ރައީސް ވިދާޅުވީ، އެ ޖަލްސާގައި ދެންނެވި ގޮތަށް އިގްތިސާދު ހަމައަކަށް އަޅުވައި ގައުމަށް ހެޔޮ ބަދަލެއް ގެންނާނެކަމަށެވެ.
