ކުރިއަށް އޮތް ރަމަޟާން މަހަށް ތައްޔާރުވުމުގެ ގޮތުން ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން އދ. ދަނގެތީގައި 400 ކިލޯވޮޓުގެ އިތުރު ޖަނަރޭޓަރެއް ބަހައްޓައިފިއެވެ.
ސްޓެލްކޯއިން މައުލޫމާތު ދެއްވި ގޮތުގައި، ރަމަޟާން މަހަކީ ކަރަންޓުގެ ބޭނުންކުރުން އެންމެ މައްޗަށް އަރާ މޫސުމަކަށް ވުމާއެކު، ދަނގެތީގެ ރައްޔިތުންނަށް އިތުބާރުހުރި ޚިދުމަތެއް ފޯރުކޮށްދިނުމަށްޓަކައި މި ޖަނަރޭޓަރު ވަނީ ބަހައްޓާފައެވެ. މި ޖަނަރޭޓަރު އިތުރުކުރުމާއެކު ރަށުގެ ކަރަންޓު ޚިދުމަތުގެ ޔަގީންކަން އިތުރުވެގެންދާނެ ކަމަށް އެ ކުންފުނިން ބުނެފައިވެއެވެ.
ހަމައެއާއެކު، ރާއްޖޭގެ އެންމެ ބޮޑު އާބާދީއެއް ދިރިއުޅޭ މާލެ ސަރަހައްދުގައިވެސް ރަމަޟާން މަހަށް ތައްޔާރުވުމުގެ ގޮތުން ސްޓެލްކޯއިން ދަނީ ޚާއްސަ މަސައްކަތްތަކެއް ކުރަމުންނެވެ. އެގޮތުން ހުޅުމާލޭގައި ބިމެއް ހޯދައި، އެ ބިމުގައި އިތުރު ޖަނަރޭޓަރުތަކެއް ބެހެއްޓުމުގެ މަސައްކަތް ވެސް ވަނީ ފަށާފައެވެ.
ސްޓެލްކޯގެ މެނޭޖިންގ ޑިރެކްޓަރ ހުސެއިން ފަހުމީ ވިދާޅުވި ގޮތުގައި، ރަމަޟާން މަސް ދިމާވަނީ ހޫނު މޫސުމާ ކަމަށްވުމާއެކު، މާލޭގައި ހުންނަ ޖަނަރޭޓަރުތަކުގެ ކެޕޭސިޓީ އިތުރުކުރުމަށް ދަނީ މަސައްކަތް ކުރަމުންނެވެ. ހުޅުމާލޭގައި އަލަށް ގާއިމުކުރެވޭ ސައިޓުގައި 17 މެގަވޮޓުގެ 13 އިންޖީނު ބެހެއްޓުމަށް ވަނީ ހަމަޖެހިފައެވެ.
ސްޓެލްކޯއިން ފާހަގަކުރި ގޮތުގައި، މި މަސައްކަތްތަކަކީ ރައްޔިތުންނަށް ފޯރުކޮށްދޭ ކަރަންޓުގެ ޚިދުމަތް އިތުރަށް ހަރުދަނާކޮށް، އިތުބާރުހުރި ޚިދުމަތަކަށް ހެދުމަށް ކުރެވޭ މަސައްކަތްތަކެކެވެ.
