ޝަރުޢީ ދާއިރާގެ މިނިވަންކަމަށް ނުރައްކާވާ ގޮތަށް ސަރުކާރުން ފަނޑިޔާރުންގެ އަދަދު މަދުކުރަން މަސައްކަތް ކުރަމުންދާ ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.
އެކްސް މެދުވެރިކޮށް ފައްޔާޒް ހާމަކުރެއްވި ގޮތުގައި، ޖުޑީޝަރީ ރިފޯމްގެ ދަށުން އެންމެ ފާހަގަކޮށްލެވޭ ކާމިޔާބީއަކީ 2019 އަދި 2020 ގައި ސުޕްރީމް ކޯޓުގެ ބެންޗަށް ގެނެވުނު ބަދަލުތަކެވެ. އެހެންނަމަވެސް މިހާރު ކުރިއަށްދާ މަސައްކަތަކީ ނުރަނގަޅު، ބޭއިންސާފު އަމަލެއްގެ ގޮތުގައި ސިފަކުރައްވައި، އެކަމުގައި ބައިވެރިނުވުމަށް އިލްތިމާސް ކުރެއްވިއެވެ.
ޑިމޮކްރަސީއާއި ޝަރުޢީ ދާއިރާގެ މިނިވަންކަން ނެގެހެއްޓުމަށްޓަކައި މުޅި ޝަރުޢީ ދާއިރާއިން މިކަމާ ދެކޮޅަށް އަޑުއުފުލުމަށް ފައްޔާޒް ގޮވާލެއްވިއެވެ. މިއީ ޤައުމުގެ ޑިމޮކްރެޓިކް ހަޔާތުގައި ފަހަތަށް އެޅޭ ނުރައްކާތެރި ފިޔަވަޅެއްކަމަށް އޭނާ ވިދާޅުވިއެވެ.
ސުޕްރީމް ކޯޓަށް ދުސްތޫރީ މައްސަލަ ހުށަހެޅުމާ ގުޅިގެން، ފަނޑިޔާރުންނަށް ބިރުދެއްކުމާއި، އިންޒާރުދިނުމަށްފަހު، މިހާރު ފަނޑިޔާރުންގެ އަދަދު މަދުކުރުމަށް މަސައްކަތްކުރަމުންދާކަމަށް ފައްޔާޒް ފާހަގަކުރެއްވިއެވެ. ސަރުކާރުގެ މި އަމަލުތަކަކީ ސުޕްރީމް ކޯޓުގެ ބާރުތައް އެއްކޮށް ނިގުޅައިގަތުމަށް ކުރެވޭ މަސައްކަތެއްގެ ގޮތުގައި ދެކެވަޑައިގަންނަވައެވެ.
ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމުގެ ބިލު މަޖިލީހަށް ހުށަހެޅިފައިވާއިރު، އިދިކޮޅު ފަރާތްތަކާއި އެމްޑީޕީގެ އިސް މެންބަރުން މިކަމާ ދެކޮޅަށް ވަކާލާތުކުރަމުން ގެންދެއެވެ. މި މައްސަލައާ ގުޅުވައި، ޕާޓީ ބަދަލުކުރުމުން މެންބަރުންގެ ގޮނޑި ގެއްލޭގޮތަށް ގާނޫޏުއަސާސީއަށް ގެނެސްފައިވާ އިސްލާހުގެ ސައްހަކަން ކަނޑައެޅުމަށް އެދި ކެންދޫ ދާއިރާގެ ކުރީގެ މެންބަރު އަލީ ހުސެއިން ވަނީ ސުޕްރީމް ކޯޓަށް މައްސަލައެއް ހުށަހަޅުއްވާފައެވެ.
