ވިޒިޓް މޯލްޑިވްސް/މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އާއި ސިންގަޕޫރު އެއާލައިންސް ގުޅިގެން ޗައިނާ މާކެޓަށް އަމާޒުކޮށްގެން ފުރަތަމަ ފެމިލިއަރައިޒޭޝަން ދަތުރު ބާއްވައިފިއެވެ.
މި މަހުގެ 18 އިން 23 އަށް ކުރިޔަށް ގެންދިޔަ މި ދަތުރުގައި ބައިވެރިވި ޗައިނާގެ މީޑިއާގެ ފަރާތްތަކަށް ދަތުރު ހޯސްޓުކޮށްފައިވަނީ ޕުލްމޭން މޯލްޑިވްސް މާމުތާ ރިސޯޓް އަދި ދަ ސްޓޭންޑަރޑް ހުރަވަޅި ރިސޯޓުގައެވެ. މިއީ އެމްއެމްޕީއާރްސީއިން އިސްނަގައިގެން ޗައިނާ މާކެޓުގައި ދިވެހިރާއްޖެއަކީ ލަގްޝަރީ ޓޫރިސްޓް މަންޒިލެއްގެ ގޮތުގައި މި އަހަރު އިޝްތިހާރުކުރާ އެންމެ ފުރަތަމަ ފަހަރެވެ.
އެމްއެމްޕީއާރްސީން މަޢުލޫމާތު ދެއްވި ގޮތުގައި، މި ދަތުރުގެ ތެރެއިން ސިންގަޕޫރު އެއާލައިންސްއާއި ޗައިނީސް ޓްރެވެލް ޓްރޭޑް މީޑިއާ އަދި ކެއޯލްތަކަށް ވަނީ ދިވެހިރާއްޖޭގެ ތަފާތު ސެގްމަންޓްތަކާއި ގެޓަވޭތައް ދައްކާލެވިފައެވެ. ”މި ދަތުރުގެ މައިގަނޑު މަޤްޞަދަކީ ދިވެހިރާއްޖޭގެ ރީތި މަންޒިލަށް ހޭލުންތެރިކަން އިތުރުކޮށް، ދަތުރުގައި ބައިވެރިވި ފަރާތްތަކަށް ފަސްޓްހޭންޑް ތަޖުރިބާއެއް ފޯރުކޮށްދިނުން،“ އެމްއެމްޕީއާރްސީން ވިދާޅުވިއެވެ.
އިތުރަށް އެމްއެމްޕީއާރްސީން ހާމަކުރެއްވި ގޮތުގައި، ޗައިނާ މާކެޓަށް އަމާޒުކޮށްގެން އިތުރު ގިނަ ހަރަކާތްތަކެއް ކުރިޔަށް ގެންދިޔުމަށް ވަނީ ރޭވިފައެވެ. މީގެ ތެރޭގައި ދިވެހިރާއްޖޭގެ ތަފާތު ތަޖުރިބާތައް ދައްކުވައިދޭ ކެމްޕޭންތަކާއި، ޗައިނާގެ މީޑިއާ އަދި ޓްރެވެލް ޓްރޭޑަށް ހާއްސަކޮށްގެން އިތުރު ފެމިލިއަރައިޒޭޝަން ދަތުރުތައް ހިމެނެއެވެ.
މީގެ އިތުރުން، ޗައިނާ-މޯލްޑިވްސް ރޯޑްޝޯއެއް ބޭއްވުމާއި، ޑިޖިޓަލް ކެމްޕެއިންތަކާއި، ޗައިނާގެ ފަތުރުވެރިންނަށް އަމާޒުކޮށްގެން ސޯޝަލް މީޑިއާ ކޮންޓެންޓްތައް ތައްޔާރުކުރުންވެސް ހިމެނޭ ކަމަށް އެމްއެމްޕީއާރްސީން ބުނެފައިވެއެވެ.
