މި ހަފްތާ ނިމުމުގެ ކުރިޔަށް ގެދޮރުވެރިޔާ ސްކީމްގެ ދަށުން ދޫކޮށްފައިވާ ފްލެޓުތަކުގެ ލިސްޓު އާންމު ކުރައްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ދ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިން މިރޭ މީދޫގައި ކުރިޔަށް ގެންދިޔަ ޖަލްސާގައި ރައީސް ވިދާޅުވީ ސަރުކާރުން ވައުދުވެފައިވާ ކޮންމެ ކަމެއް އަކުރުން އަކުރަށް ތަންފީޒު ވެގެންދާނެކަމަށެވެ. އެގޮތުން ރަށުގެ ހުއްޓިފައި ހުރި މަޝްރޫއުތަކުގެ މަސައްކަތްތައް މި ދެ މަސް ދުވަހުގެ ތެރޭގައި ފެށިގެންދާނެކަމަށް ރައީސް ވިދާޅުވިއެވެ.
ރައީސް ވިދާޅުވީ އެމަނިކުފާނު އަބަދުވެސް މަސައްކަތް ކުރައްވަނީ، ރައްޔިތުން ގާތަށް ގޮސް ކަންބޮޑުވުންތައް އަޑުއަހައި އެއަށް ހައްލު ހޯދައިދިނުމަށް ކަމަށެވެ. ރާއްޖޭގެ ރަށްތަކަށް ދިމާވެފައިވާ އެންމެ ބޮޑު މައްސަލައަކީ ގެދޮރުގެ މައްސަލަކަން ފާހަގަކުރައްވައި ރައީސް ވިދާޅުވީ ސަރުކާރުގެ މެނިފެސްޓޯގައި އެކަމުގެ ހައްލު ހިމަނާފައިވާކަމަށެވެ.
ރައްޔިތުންގެ އުންމީދާއި މިވަގުތު އެންމެ ބޮޑަށް ގުޅިފައިވާ 4000 ފްލެޓާއި ގުޅޭގޮތުން ރައީސް ވިދާޅުވީ ލިސްޓުގައި ހުރި މައްސަލަތައް ކުރިޔަށް އޮތް ދެ ދުވަހެއްގެ ތެރޭގައި ހައްލު ކުރެވޭނެކަމަށެވެ. އަދި އެމަނިކުފާނު ރިޔާސީ ބަޔާނުގައި ވިދާޅުވި ގޮތަށް، ރޯދަ މަހުގެ ކުރިޔަށް ލިސްޓު އާންމު ކުރެވިގެން ދާނެކަމަށް ރައީސް ވިދާޅުވިއެވެ.
ރައީސްގެ ވާހަކަފުޅުގައި ވަނީ، ލިސްޓު އާންމު ކުރުމާއި ގުޅުވައި ބައެއް ފަރާތްތަކުން ސަރުކާރުގެ އިހުލާސްތެރިކަމާއި މެދު ސުވާލު އުފެއްދި ނަމަވެސް އެ ވާހަކަތައް ގަބޫލު ނުކުރުމަށް ރައްޔިތުންގެ ކިބައިން އެދިވަޑައިގެންފައެވެ.
މީގެއިތުރުން ރައީސް ވިދާޅުވީ ބޯހިޔާވަހިކަމުގެ މައްސަލަ ހައްލު ކުރުމަށްޓަކައި އުތުރުތިލަފަޅުން މި އަހަރުގެ ތެރޭގައި 125 ހެކްޓަރުގެ ބިން ހިއްކުމުގެ މަސައްކަތް ފެށިގެންދާނެކަމަށެވެ.
