މެޑިކަލް މާފިިއާއެއް އުފައްދައި ރައްޔިތުންނަށް ދަތި ކުރުމަށްޓަކައި ބަޔަކު ކުރަމުންދާ މަސައްކަތަށް ސަރުކާރުން އެއްވެސް ޖާގައެއް ނުދެއްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
އާސަންދަ ސްކީމްގެ ދަށުން ބޭސް ކަވަރުކުރަމުން އައި ބޭސްތަކެއްގެ ހިދުމަތް ހުއްޓާލާފައިވާކަމަށް ބުނެ ސަރުކާރަށް މިފަހުން ފާޑުކިއުންތައް އަަމާޒުވިއެވެ. އެ ފާޑުކިއުން އަމާޒުވީ ބޭސް އެތެރެކުރުމުގެ ނިޒާމު ހަރުދަނާކުރުމަށް މަސައްކަތްތަކާއި އެކު އެވެ. އެއީ ރާއްޖޭގައި ބޭސް ޓެސްޓު ކުރުން ހަރުދަނާ ކުރުމާއި، ނޭޝަނަލް ހެލްތް ލެބޯޓްރީ އަޕްގްރޭޑްކުރުމާއި އެކު ރާއްޖެއަށް އެތެރެކުރެވޭ ބޭހުގެ ފެންވަރު ކަށަވަރުކުރުމަށް ފިޔަވަޅު އަޅަން ފެށުމުންނެވެ.
އާސަންދައާއި ގުޅުވައި އިދިކޮޅުން ކުރާ ތުހުމަތުތަކަށް ރައީސް މިރޭ ރައްދު ދެއްވާފައި ވަނީ، ދ. އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން މީދޫގެ ރައްޔިތުންނާއި ބައްދަލު ކުރައްވައި ދެއްކެވި ވާހަކަފުޅުގައެވެ.
ބޭހުގެ މައްސަލައިގައި ރައީސް މިރޭ ވިދާޅުވީ، މިއީ ބޮޑު ވިޔަފާރިއެއްކަމަށް ދެކި އެއްހާހާއި ދެ ހާހުގެ އިންސައްތައެއްގެ ފައިދާ ބަޔަކު މީހުން ނަގަމުން ދިޔަކަމަށެވެ. ސަރުކާރުން އެ މައްސަލަ ހައްލު ކުރުމަށް ފިޔަވަޅު އެޅުމާއި އެކު، އެކަމާއި ދެކޮޅަށް ދެން ބަޔަކު މީހުން ފެށި މަސައްކަތަކީ ދަތި ކުރުންކަމަށް ރައީސް ވިދާޅުވިއެވެ.
ރައީސް ވިދާޅުވީ މެޑިކަލް މާފިއާއެއް އުފައްދައި ރައްޔިތުންނަށް އުނދަގޫ ކުރުމުގެ ޖާގައެއް ނުދެއްވާނެކަމަށެވެ. އަދި އަންނަ މާޗު މަހުގެ 15 ގެ ކުރިން އެސެންޝިއަލް ބޭސްތައް ލިބޭނެ އިންތިޒާމުތައް ހަމަޖެހިގެން ދާނެކަމަށް ވިދާޅުވި އެވެ. މި ތާރީހުން ފެށިގެން އަސާސީ ގޮތުން ބޭނުންވާ ހުރިހާ ބޭހެއް އެއްވެސް ދައްޗެއް ނެތި ލިބުމާއި އެކު އޭޕްރިލް މަހާއި އެކު އިތުރު މައްސަލަތައް ހައްލު ކުރެވޭނެކަމަށް ރައީސް ވިދާޅުވި އެވެ.
ރައީސް ވިދާޅުވީ ކުޑަ ބޭސް ފިހާރައެއް ހިންގަމުންދާ މީހާ، އަހަރެއްގެ ތެރޭގައި ބޮޑެތި އެހެން ވިޔަފާރިތައް ފެށިތަން ރައްޔިތުން ދެކެފައިވާނެކަމަށެވެ. އަދި ތަކުރާރުކޮށް ވިދާޅުވީ ސަރުކާރުން މި ފިޔަވަޅު އެޅުމުގެ ޕްރައިވެޓް ސެކްޓަރ އިން ދަތި ކުރުމަށް މަސައްކަތް ކުރި ނަމަވެސް އެ ފުރުސަތު ސަރުކާރުން ނުދޭނެކަމަށެވެ.
އެެންވީމަ އެ ފުރުސަތެއް ސަރުކާރުން ނުދޭނެ.. އެއީ ބޭހުގެ ވިޔަފާރިއަކަސް.. އަދި އެހެން ބަޔަކަސް
އާސަންދައިގެ ނިޒާމަކީ ދެމެހެއްޓެނިވި ގޮތެއްގައި ފެންވަރު ރަނގަޅު ހިދުމަތް ފޯރުކޮށްދޭ ނިޒާމަކަށް ހެދުމަށް ކުރާ މަސައްކަތުގެ ދަށުން 200 އަށް ވުރެ ގިނެ ބޭހެއްގެ އަގު ސަރުކާރުން ވަނީ ކޮންޓްރޯލްކޮށްފައެވެ. އެ ފިޔަވަޅު ސަރުކާރުން އަޅާފައި ވަނީ، ބޭސް ވިއްކުމުގައި ޕްރައިވެޓް ސެކްޓަރ ގެ ބޮޑެތި ގޯސްތައް އުޅޭކަމަށް ވެސް ތުހުމަތުތައް ކުރެވިފައި ވަނިކޮށެވެ.
