ސުޕްރީމް ކޯޓުގެ ފަނޑިޔާރުން އެ ބޭފުޅުންގެ ވާޖިބު އަދާކުރެއްވުމުގައި ސާބިތުވެ ތިއްބެވުމަށް އެމްޑީޕީގެ ރައީސް އަބްދުﷲ ޝާހިދު ގޮވާލައްވައިފިއެވެ.
ސުޕްރީމް ކޯޓުގެ ފަނޑިޔާރުންގެ ބެންޗު ހަތަކުން ފަހަކަށް މަދުކުރުމަށް ރައްޔިތުންގެ މަޖިލީހުން ވަނީ ފާސްކޮށްފައެވެ. މިއީ ހޮޅުދޫ ދާއިރާގެ ޕީއެންސީ މެމްބަރު އަބްދުއްސައްތާރު ރާއްޖޭގެ ކޯޓުތަކާ ބެހޭ ގާނޫނަށް ހުށައެޅުއްވި އިސްލާހެވެ. އިސްލާހު ގެނައުމުގެ ބިލް މަޖިލިހުން ފާސްކުރީ ރޯލް ކޯލް ވޯޓަކަށް ގޮސްގެންނެވެ. ސުޕްރީމް ކޯޓުގެ ފަނޑިޔާރުންގެ ބެންޗު ހަތަކުން ފަހަކަށް މަދުކުރުމަށް ފެންނަކަމަށް 68 މެމްބަރުން ވޯޓުދެއްވިއެވެ.
މިކަމާއި ގުޅިގެން ޝާހިދު ވިދާޅުވީ ސަރުކާރުން އަވަސް އަރުވާލައިގެން ފަނޑިޔާރުން މަދުކުރަން ނިންމި ނިންމުމަކީ ގާނޫނާ ޚިލާފަށް ކުރިކަމެއްކަމަށެވެ. ޝާހިދު މިކަންތައް ސިފަކުރެއްވީ ފަނޑިޔާރުންނަށް ނުފޫޒު ފޯރުވުމުގެ ގޮތުގައެވެ.
ސުޕްރީމް ކޯޓުގެ ދެ ފަނޑިޔާރުން ވަކިކޮށް، އެ ކޯޓުގެ ފަނޑިޔާރުންގެ އަދަދު ހަތަކުން ފަހަކަށް ބަދަލު ކުރަން ސަރުކާރުން ހުށަހަޅައި އަވަސް އަރުވާލައިގެން މަޖިލީހުގެ ގަވާއިދާ އަމަލުކުރަމުންއަންނަ އުސޫލުތަކާއި ޚިލާފަށް ފާސްކުރި ބިލު ހިމެނޭނީ ފަނޑިޔާރުންގެ މަސައްކަތާއި ބެހި ނުފޫޒު ފޯރުވުންކަމުގައި.
ޝާހިދު ވިދާޅުވިއެވެ.
ޝާހިދު ގޮވާލެއްވީ ފަނޑިޔާރުންނަށް ގާނޫނުއަސާސީން ހަވާލުކޮށްފައިވާ ވާޖިބު އަދާކުރެއްވުމުގައި ސާބިތުވެ ތިއްބެވުމަށެވެ.
މި ބިލު މަޖިލީހުން ފާސްކޮށްފައިވަނިކޮށް ސުޕްރީމް ކޯޓުގެ ތިން ފަނޑިޔާރަކު ވަނީ ހަމަ އެ ދުވަހު ސަސްޕެންޑްކޮށްފައެވެ. ސަސްޕެންޑްކޮށްފައިވަނީ ފަނޑިޔާރު މަހާޒް އަލީ ޒާހިރު، ފަނޑިޔާރު ޑރ އަޒްމިރަލްދާ ޒާހިރު އަދި ފަނޑިޔާރު ހުސްނުއްސުއޫދު އެވެ.
