ޤާނޫނުގެ ވެރިކަމަށް ރުޖޫޢަވުމަށް ދައުލަތުގެ ވެރިންނަށް ކުރީގެ ރައީސް އިބްރާހިމް މުޙައްމަދު ސާލިޙު ގޮވާލައްވައިފިއެވެ.
ކުރީގެ ރައީސް ސާލިޙު އެފަދައިން ގޮވާލެއްވީ އެކްސްގައި ކުރެއްވި ޕޯސްޓެއްގައެވެ. އެގޮތުން އެމަނިކުފާނު ވިދާޅުވީ، މިއަދު މި ފެނިގެންދަނީ ދުސްތޫރީ މައްސަލައެއް ސުޕްރީމް ކޯޓުގައި ކުރިއަށް ދަނިކޮށް އެމައްސަލައަށް ސަރުކާރުގެ އިސްނެގުމުގެ މަތިން ސީދާ ސިޔާސީ ނުފޫޒު ވައްދައި, ހުރިހާ މުއައްސަސާއެއްގެ މުސްތަގިއްލުކަން ނަގާލައި, ފަނޑިޔާރުންނަށް ބިރު ދެއްކުމުގެ ވަރަށް ނާތަހުޒީބު, ހުތުރު ޢަމަލުތަކެއް ކަމަށެވެ.
މި ކަންކަން ހުއްޓާލައި, ޤާނޫނުގެ ވެރިކަމަށް ރުޖޫޢަވުމަށް ދައުލަތުގެ ވެރިންނަށް ގޮވާލައްވާކަމަށްވެސް ސާލިޙު ވިދާޅުވިއެވެ.
ސާލިޙު އިތުރަށް ވިދާޅުވީ، ދިވެހިރާއްޖެ މިވަގުތު މިސްރާބު ޖަހާފަ މިވަނީ ޚުދުމުހުތާރު ވެރިކަމަކާ ދިމާލަށް ކަމަށެވެ. އަދި އެތައް ބައެއްގެ ބުރަ މަސައްކަތުން އެންމެން ހޯދި ޙައްޤުތަކާއި, ތިން ބާރު ވަކިވެފައިވާ ނިޒާމު ޚަރާބުގެ މަގަށް މިގެންދަނީ ރައީސުލްޖުމްހޫރިއްޔާގެ މުށުތެރެއަށް ބާރުތައް އެއް ކުރައްވަންކަމަށްވެސް ވިދާޅުވިއެވެ.
މީގެ އިތުރުން، މި ކަންކަމުގެ ހިތި ނަތީޖާ ތަޙައްމަލު ކުރަން ޖެހޭނީ އާންމު ދިވެހި ރައްޔިތުންކަމަށްވެސް އެމަނިކުފާނު ފާހަގަ ކުރެއްވިއެވެ.
އެމްޑީޕީން މިހާރު ވަނީ އެ ޕާޓީގެ ގައުމީ މަޖިލީހުން 10 ޑިސެމްބަރު 2024 ގައި ފާސްކޮށްފައިވާ ގަރާރާ އެއްގޮތަށް އަމަލުކުރުމަށް ނިންމާފައެވެ. އެއީ މުޅި ވެރިކަމުގެ ނިޒާމު ހައިޖެކް ކުރުމަށް ކޮށްފައިވާ ކަންކަމާ މެދު މެދުކެނޑުމެއްނެތި އިހުތިޖާޖުކޮށް އަޑުއުފުލުންކަމަށް އެ ޕާޓީން ފާހަގަކުރެއެވެ.
