ރައީސް އިބްރާހިމް މުހައްމަދު ސާލިޙްގެ ސަރުކާރުން އާންމުކުރި 4،000 ފްލެޓް ލިބޭ މީހުންގެ ލިސްޓް އަލުން އިވެލުއޭޓް ކުރުމަށްފަހު، ޝަރުތު ހަމަވަނީ 1،820 މީހުންކަމަށް ހައުސިން މިނިސްޓަރު ޑރ. އަބްދުﷲ މުއްތަލިބު މިއަދު ވިދާޅުވެއްޖެއެވެ.
މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވި ގޮތުގައި، ތިން ކޮޓަރީގެ ފްލެޓަށް ޝަރުތު ހަމަވާކަމަށް ކަނޑައަޅާފައިވަނީ 76 ޕޮއިންޓުން މަތިން މާކްސް ލިބޭ ފަރާތްތަކެވެ. އަދި ބާކީވާ ފްލެޓްތައް 75 ޕޮއިންޓު ލިބޭ ފަރާތްތަކުގެ މެދުގައި ގުރުއަތުން ނަގާނެއެވެ. ދެ ކޮޓަރީގެ ފްލެޓަށް ޝަރުތު ހަމަވާނީ 73 ޕޮއިންޓުން މަތިން ލިބޭ ފަރާތްތަކެވެ.
މިނިސްޓަރު ހާމަކުރެއްވި ތަފާސްހިސާބުތަކުން ދައްކާގޮތުގައި، ތިން ކޮޓަރީގެ އެޕާޓްމަންޓަށް 3،721 މީހުން ކުރިމަތިލާފައިވާއިރު، ދެ ކޮޓަރީގެ ފްލެޓްތަކަށް 1،218 މީހުން ކުރިމަތިލާފައިވެއެވެ. އަދި އަލުން ކުރި އިވެލުއޭޝަނުގައި 36 އިންސައްތަ ފޯމުގެ ޕޮއިންޓް ވަނީ ބަދަލުވެފައެވެ. އެހެންނަމަވެސް 64 އިންސައްތަ ފޯމުގެ ޕޮއިންޓަށް އެއްވެސް ބަދަލެއް ނާންނާނެއެވެ.
މަސައްކަތްތައް ކޮށްފައިވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވައުދުވެވަޑައިގެންނެވި ގޮތަށް، އެއްވެސް ރައްޔިތެއްގެ ހައްގަށް އުނިކަމެއް ނާންނާނެހެން، މިނިސްޓަރު ވިދާޅުވިއެވެ.
ކުރީގެ ސަރުކާރުން ފްލެޓް ލިބޭ މީހުންގެ ލިސްޓް އާންމުކުރުމާއެކު، އޭރުގެ ހައުސިން މިނިސްޓްރީއަށް ގޮސް ރައްޔިތުން ވަނީ އިހުތިޖާޖުކޮށްފައެވެ. އަދި ފްލެޓްތައް ދީފައިވަނީ އިންސާފުން ބޭރުންކަމަށް ބުނެ ތުހުމަތުތައް ކުރެވުނެވެ. އެހެންކަމުން މިހާރުގެ ސަރުކާރުން ނިންމީ ފްލެޓް ލިސްޓް އަލުން ރިވިއުކުރުމަށެވެ.
