ގެދޮރުވެރިޔާ ސްކީމުގެ ދަށުން ދޫކުރުމަށް ނިންމާފައިވާ 4000 ފްލެޓުގެ ކުލީގެ އަގުތަކަށް ބަދަލުގެނެސް، ކުރިން އިއުލާންކޮށްފައިވާ އަގުތައް މަތިކޮށްފިއެވެ. މިކަން މިއަދު އިއުލާންކުރެއްވީ މިނިސްޓަރ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ޑރ. އަބްދުﷲ މުއްތަލިބެވެ.
އިންޑިއާގެ އެގްޒިމް ބޭންކުގެ ލޯނު އެހީގެ ދަށުން ކުރިއަށްދާ މި މަޝްރޫއުގައި، ކުރިން ދެ ކޮޓަރީގެ ފްލެޓަކަށް މަހަކު 5،000 ރުފިޔާގެ ކުލި އަދި 1،000 ރުފިޔާގެ މެއިންޓެނަންސް ފީއެއް ނެގުމަށް ހަމަޖެހިފައިވީ ނަމަވެސް، އަލަށް ކަނޑައަޅާފައިވާ އަގުތަކުގައި ދެ ކޮޓަރީގެ ފްލެޓަކަށް މަހަކު 7،000 ރުފިޔާގެ ކުއްޔާއި 1،000 ރުފިޔާގެ މެއިންޓެނަންސް ފީއެއް ނެގުމަށް ވަނީ ނިންމާފައެވެ. މީގެ އިތުރުން 15،000 ރުފިޔާގެ ޑައުންޕޭމަންޓެއް ދައްކަން ޖެހޭނެއެވެ.
ތިން ކޮޓަރީގެ ފްލެޓުތަކަށް ވެސް އަގު ބޮޑުވެފައިވާއިރު، ކުރިން 7،000 ރުފިޔާގެ ކުއްޔާއި 1،000 ރުފިޔާގެ މެއިންޓެނަންސް ފީ ނެގުމަށް ހަމަޖެހިފައިވީ ނަމަވެސް، މިހާރު ކަނޑައަޅާފައިވަނީ 9،000 ރުފިޔާގެ ކުއްޔާއި 1،500 ރުފިޔާގެ މެއިންޓެނަންސް ފީއެކެވެ. އަދި 25،000 ރުފިޔާގެ ޑައުންޕޭމަންޓެއް ދައްކަން ޖެހޭނެއެވެ.
މިއީ ރައްޔިތުންނަށް ލުއިވާނެ ގޮތަކަށް ސަބްސިޑައިޒްކޮށްގެން ކަނޑައެޅި އަގުތަކެއް ކަމަށާއި އަސްލު އަގުތަކަށް ބަލާއިރު ދެ ކޮޓަރީގެ ފްލެޓަކަށް 9،000 ރުފިޔާ އަދި ތިން ކޮޓަރީގެ ފްލެޓަކަށް 13،000 ރުފިޔާ ނެގުން އެކަށީގެންވާ ކަމަށް މިނިސްޓަރު މުއްތަލިބު ވިދާޅުވިއެވެ.
މި އަގުތަކާ އެކުވެސް ސަރުކާރުގެ ބަޖެޓުން އަހަރަކު 100 މިލިއަން ރުފިޔާ ލޯނު ސަބްސިޑައިޒް ކުރުމަށް ހޭދަވާނެ ކަމަށް މިނިސްޓަރު ވަނީ ހާމަކުރައްވާފައެވެ.
