މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ޓެކްސްގެ އަދަދުތައް އަލުން ކަނޑައެޅުމުގައި އަމަލުކުރާނެ އުސޫލު މިއަދު އާންމުކޮށްފިއެވެ. މި އުސޫލު އާންމުކުރުމުގެ މައިގަނޑު މަގުސަދަކީ ޓެކްސް އެޕީލް ޓްރައިބިއުނަލް ނުވަތަ ޝަރުއީ ކޯޓަކުން މީރާއިން ކަނޑައަޅާފައިވާ އަދަދެއް އަލުން ކަނޑައެޅުމަށް ނިންމާ ހާލަތްތަކުގައި އަމަލުކުރާނެ ގޮތް ބަޔާންކުރުމެވެ.
ސަރުކާރުން ގެޒެޓުކޮށްފައިވާ މި އުސޫލުގައިވާ ގޮތުން، ޓެކްސް ނެގުމާބެހޭ ގާނޫނުގެ ދަށުން ކަނޑައަޅާފައިވާ އަދަދެއް އަލުން ކަނޑައަޅާނަމަ، މީރާއިން އެ ގާނޫނަށް ރިއާޔަތްކުރަންޖެހޭނެއެވެ. އަދި ވިޔަފާރި ފައިދާއިން ޓެކްސް ނެގުމަށް ކަނޑައެޅިފައިވާ އަދަދެއް އަލުން ކަނޑައެޅުމުގައި އެކަމަށް ޚާއްސަކޮށް ފަރުމާކޮށްފައިވާ ގާނޫނަށް ބަލަންޖެހޭނެއެވެ.
އުސޫލުގައި ބަޔާންކޮށްފައިވާ ގޮތުން، ޓެކްސް ނެގުމާބެހޭ އިދާރީ ގާނޫނުގެ ދަށުން ކަނޑައަޅާފައިވާ އަދަދެއް އަލުން ކަނޑައެޅުމަށް ޓްރައިބިއުނަލް ނުވަތަ ކޯޓަކުން ނިންމައިފިނަމަ، ޓެކްސްގެ މިންވަރު ކަނޑައެޅުމަށް ބޭނުންވާ ހިސާބުތަކާއި ލިޔެކިއުންތައް ބަލާކަން އެ ނިންމުން ނިންމި ނުވަތަ ހުކުމްކުރި ތާރީޚުގައި ޓެކްސް ދައްކާ ފަރާތަށް އެންގުނީކަމަށް ބެލެވޭނެއެވެ.
މީގެއިތުރުން، ޓެކްސްގެ އަދަދު އަލުން ކަނޑައެޅުމަށް ޓްރައިބިއުނަލްއިން ނިންމާފައިވާ ނިންމުމެއް މަތީ މަރުހަލާގެ ކޯޓަކުން ދަމަހައްޓައިފިނަމަ، ޓެކްސްގެ މިންވަރު ކަނޑައެޅުމަށް ބޭނުންވާ ލިޔެކިއުންތައް ބަލާކަން އަންގާ އެންގުން އެންގި ތާރީޚެއްގެ ގޮތުގައި ބަލާނީ ޓްރައިބިއުނަލްއިން އެ ނިންމުން ނިންމި ތާރީޚުކަމަށް އުސޫލުގައި ބަޔާންކޮށްފައިވެއެވެ.
މި އުސޫލު އާންމުކުރުމާއެކު، ޓެކްސް ދައްކާ ފަރާތްތަކަށާއި މީރާއަށް ޓެކްސްގެ އަދަދުތައް އަލުން ކަނޑައެޅުމުގައި އަމަލުކުރަންޖެހޭ ގޮތް އިތުރަށް ސާފުވެގެންދާނެކަމަށް ބެލެވެއެވެ.
