ދައުލަތުން ބޮޑު އަގެއް ދީގެން ހަދާފައިވާ އިއްޒުއްދީން ފާލަން، ނިމިދިޔަ ސަރުކާރުގެ ދައުރުގައި އެއްވެސް ވަރަކަށް މެއިންޓެއިން ނުކުރުމުގެ ސަބަބުން އެއްކޮށް ހަލާކުވެފައިވާ ކަމަށް ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބު ވިދާޅުވެއްޖެއެވެ.
އިއްޒުއްދީން ފާލަން މަރާމާތަށްފަހު ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ މުއްތަލިބު ވިދާޅުވި ގޮތުގައި، މިހާރު މި ފާލަން ޑިޒައިންކޮށްފައިވަނީ ކުރީގެ ރައީސް މުހައްމަދު އަމީންގެ ދުވަސްވަރު ފާލަން ހުރި ގޮތަށެވެ. އަދި 2015 ވަނަ އަހަރާ ހަމައަށް އައިއިރު މި ފާލަން ވަނީ ޒަމާނީ ފެންވަރެއްގައި ތަރައްގީކުރެވިފައެވެ.
”2018 ވަނަ އަހަރުގެ ފަހުން ފަސް އަހަރު ވޭތުވެގެން ދިޔައީ އެތަނަށް އެއްވެސް ވަރަކަށް އަޅާލުމެއް ނެތި. މަރާމާތުގެ މަސައްކަތްތައްވެސް ކުރިއަށް ގެންގޮސްފައެއް ނުވޭ،“ މިނިސްޓަރ މުއްތަލިބު ވިދާޅުވިއެވެ.
މިނިސްޓަރ އިތުރަށް ވިދާޅުވި ގޮތުގައި، ދަގަނޑުން ބިނާކޮށްފައިވާ މި ފާލަން ބެލެހެއްޓުމަކީ ވަރަށް މުހިންމު ކަމެކެވެ. ނަމަވެސް މި ސަރުކާރުން ވެރިކަމާ ހަވާލުވިއިރު ފާލަން ހުރީ ވަރަށް ގޯސް ހާލަތެއްގައެވެ. އަދި ފާލަމުގެ ދަގަނޑުން ހަދާފައިވާ ބައިތައް ވެއްޓި، ރައްޔިތުންނަށް ނުރައްކާވެދާނެ ކަމަށް ފެންނާތީ، އަވަހަށް ރޫޅާލުމަށް އެމްޓީސީސީއަށް އަންގާފައިވާ ކަމަށް ވިދާޅުވިއެވެ.
މިނިސްޓަރ މުއްތަލިބު ފާހަގަކުރެއްވި ގޮތުގައި، ފާލަން ރޫޅާލަން ޖެހުނީ ރައީސް ޑރ. މުހައްމަދު މުއިއްޒުގެ އިރުޝާދުގެ މަތިން، ރައްޔިތުންގެ ސަލާމަތާއި ރައްކާތެރިކަމަށް އިސްކަންދީގެންނެވެ.
