އިދިކޮޅު މައިޕާޓީ އެމްޑީޕީން މި ހިނގަމުންދާ ސަރުކާރުގައި ތިއްބެވި ވަޒީރުންގެ އިތުބާރު ނެތްކަމަށް ބުނެ މައްސަލަތައް ހުށަހަޅަމުންދަނީ އެމްޑީޕީގެ ވެރިކަމުގައި ކޮށްފައިވާ ވައްކަމާއި ހިޔާނަތްތައް ފޮރުވުމަށްކަމަށް ރައްޔިތުންގެ މަޖިލީހުގެ މައްޗަންގޮޅީ އުތުރު ދާއިރާގެ މެންބަރު އިބްރާހިމް މުހައްމަދު ވިދާޅުވެއްޖެއެވެ.
ސަންގުޓީވީގެ ޚަބަރަށްފަހު ޕްރޮގްރާމްގައި ވާހަކަ ދައްކަވަމުން މެމްބަރު ވަނީ އެމްޑީޕީން މި ހިނގަމުންދާ ސަރުކާރަށް ޖެއްސުން ކުރުމަށް މަޖިލީހުގެ ތެރޭގައިވެސް އެތައް މަސައްކަތްތަކެއް ކުރަމުންދާކަމަށް ވިދާޅުވެފައެވެ. އެގޮތުން ދާޚިލީ ވަޒީރު އަލީ އިޙްސާންގެ އިތުބާރު ނެތްކަމުގެ މައްސަލައަކީވެސް ހަމަ އެގޮތަށް ހުށަހެޅުނު މައްސަލައެއްކަމަށް މެމްބަރު ވިދާޅުވިއެވެ.
މެމްބަރު ވިދާޅުވީ، އެމްޑީޕީގެ ހަގީގީ ބޭނުމަކީ އެމްޑީޕީގެ ވެރިކަމުގައި ކޮށްފައިވާ ވައްކަންތައް ފޮރުވުން ކަމަށާއި، އޭގެ ތެރޭގައި ޕޮލްކޯ ފްލެޓުތަކާ ގުޅޭ ކޮރަޕްޝަންގެ ތުހުމަތުތައް ހިމެނޭ ކަމަށެވެ.
ކުއްލި މައްސަލަތައް މި ހުށަހަޅުއްވަނީ މީގަ އެންމެ ހަގީގަތުގައި އަޑީގައި މި އޮތީ ކުރީގެ އެޑްމިނިސްޓްރޭޝަނުން، ޚާއްސަ ގޮތެއްގައި ޕޮލްކޯއާއި އެކި ތަންތަނުން ކޮށްފައި ހުރި ޚިޔާނާތުގެ މައްސަލަތަކާ އެކަންކަން ތަހުގީގުކޮށްފާނެތީވެ، މި ބޭފުޅުންގެ ބޭފުޅުން އޭގެ ތެރޭގައި ހިމެނޭތީވެ ވަޒީރުގެ އިތުބާރު ނެތްކަމަށް ނަގަން،
އޭގެ އިތުރުން، މިނިސްޓަރ އިޙްސާންވެސް ގޯހެއް ހެއްދެވުމުން މާފަށް އެދިވަޑައިގެން ރީތި ނަމޫނާ ދައްކަވާފައިވާކަމަށް މެމްބަރު ވިދާޅުވިއެވެ. އެފަދަ ހަރުދަނާ ވަޒީރަކު މި ސަރުކާރުގައި ހުންނެވުމަކަށް އެމްޑީޕީން ބޭނުމެއް ނުވާނެކަމަށް އޭނާ ވިދާޅުވިއެވެ.
ބެސްޓިނެޓް މައްސަލާގައި ކުރީ ސަރުކާރުން އިހުމާލުވި މައްސަލަ އެންޓި ކޮރަޕްޝަން ކޮމިޝަން (އޭސީސީއަށް) ހުށަހަޅުއްވާނެކަމަށް ހޯމް މިނިސްޓަރ އަލީ އިޙްސާން ވަނީ ދާދި ފަހުން މަޖިލީހުގައި ވިދާޅުވެފައެވެ. އެގޮތުން މިނިސްޓަރ އެހެން ވިދާޅުވީ އެމްޑީޕީން ހުށަހަޅާފައިވާ އިތުބާރު ނެތްކަމުގެ މައްސަލައާ ގުޅޭގޮތުން ވާހަކަ ދައްކަވަމުންނެވެ.
މި އެގްރީމެންޓާ ގުޅިގެން 13.7 މިލިއަންގެ އިންވެސްޓްމެންޓެއް ކޮށްފައިވާތީ އެކަމާ ގުޅޭ ތަފްސީލް ހާމަކޮށް އެއްބަސްވުމާ އެއްގޮތަށް ކުރިއަށް ގެންދިއުމަށް އިމިގްރޭޝަނަށް މިދިޔަ ސަރުކާރުގައި އެ ކުންފުނިން ސިޓީ ފޮނުވާފައިވީނަމަވެސް އެ ސިޓީއަށް ސަރުކާރުން ޖަވާބު ދީފައި ނުވާކަމަށް އިޙްސާން ވިދާޅުވިއެވެ.
މީގެ އިތުރުން، މި ކަމުގެ ސަބަބުން ގާނޫނީ މައްސަލަތައް ނިކުތުމުގެ ފުރުސަތު އޮތުމުން ދިވެހި ދައުލަތަށް މާލީ ބުރައެއް އުފުލަން ޖެހިދާނެ ކަމަށް ވިދާޅުވެ އޭރުގެ އިމިގްރޭޝަން ކޮންޓްރޯލަރު އޭރުގެ އެޓާނީ ޖެނެރަލް އިބްރާހިމް ރިއްފަތުގެ ލަފައެއް ހޯދުމަށް އެދިފައިވީނަމަވެސް އެކަމަށް އޭޖީންވެސް ލަފައެއް ދީފައިނުވާކަން އިޙްސާން ފާހަގަ ކުރެއްވިއެވެ.
އޭޖީގެ ލަފާ ނުލިބުމުން، އެކްސްޕެޓް ސިސްޓަމް ބަލަހައްޓަމުން ގެންދިޔަ އޭރުގެ އިކޮނޮމިކް މިނިސްޓަރު ފައްޔާޒް އިސްމާއީލަށް ސިޓީވެސް ފޮނުވާފައިވެއެވެ.
އެންމެ ފަހުން އޭޖީ އޮފީހުން ލަފާ ދީފައިވަނީވެސް ގެއްލުމުގެ ބަދަލު ހޯދަން އެ ކުންފުނީގެ ލޯ ފާމަކުން ސިޓީ ފޮނުވި ފަހުންނެވެ.
މީގެ އިތުރުން، ކުރީގެ ރައީސް އިބްރާހިމް މުހައްމަދު ސޯލިހަށްވެސް އިމިގްރޭޝަނުން ހަމަ އެގޮތަށް ލަފައަކަށް އެދި ސިޓީ ފޮނުވާފައިވާ ކަމަށާއި، ނަމަވެސް ކުރީ ސަރުކާރު ނިމުނުއިރުވެސް އެ ސިޓީއަށް އެއްވެސް ޖަވާބެއް ދީފައިނުވާކަމަށް އިހުސާން ވިދާޅުވިއެވެ.
އިހުސާން ވިދާޅުވީ، މިދިޔަ ސަރުކާރުގައި ވަކީލުން މެދުވެރިކޮށް އެއްބަސްވުމަށް ހަދާނެ ގޮތަކާ މެދު ލިޔެކިޔުން ބަދަލުކޮށްފައިވާ ކަމަށާއި، ބަދަލުގެ ގޮތުގައި 13.7 މިލިއަން ޑޮލަރު ހޯދަން ހުށަހަޅާފައިވާ ކަމަށެވެ. ނަމަވެސް ވެރިކަން ބަދަލުވިއިރުވެސް އެކަމުގައި ގޮތްތަކެއް ނިމިފައެއް ނުވެއެވެ.
އެހެންކަމުން ބެސްޓިނެޓް ކުންފުންޏާ އެކު ހެދި އެއްބަސްވުމާ މެދު ގޮތެއް ނުނިންމައި އެކަމުގައި އިހުމާލުވި ކުރީ ސަރުކާރުގެ ވެރިންގެ މައްސަލަ އެންޓިކޮރަޕްޝަން ކޮމިޝަން (އޭސީސީ) އަށް ހުށަހަޅުއްވާނެ ކަމަށް އިޙްސާން ވިދާޅުވިއެވެ.
އިހުސާން ވިދާޅުވާ ގޮތުގައި އެ ކުންފުނިން ރާއްޖެއަށް ދީފައި އޮތީ ދެ އިހުތިޔާރެކެވެ. އެގޮތުން އެއް ކަމަކީ 13.7 މިލިއަން ޑޮލަރުގެ އެ މީހުންނަށް ގެއްލުމުގެ ބަދަލުގެ ގޮތުގައި ދައްކައި، އަދި ފަހުން 15 އަހަރު ދުވަހަށް ލިބޭ ގެއްލުމުގެ ބަދަލު ދިނުމެވެ.
ދެވަނަ އިހުތިޔާރަކީ އެހެން ހިދުމަތްތަކާއެކުގައި ”ފޮރިން ޕްލޭސްމަންޓް ސިސްޓަމެއް“ ރާއްޖޭގައި ގާއިމުކުރުމެވެ.
އެ ކަންކަން ރަނގަޅަށް ދިރާސާ ކުރުމަށްފަހު، މި ސަރުކާރުން ނިންމީ އެތައް މިލިއަން ޑޮލަރުގެ ބަދަލެއް ނުދީ، އެ ސިސްޓަމް ގާއިމުކުރުމަށެވެ. އާ ސިސްޓަމާއެކު ރާއްޖެއަށް އަންނަ ބިދޭސީ މަސައްކަތްތެރިންގެ އަތުން ލިބޭ ފައިސާ އެތައް ގުނައެއް އިތުރުވާނެ ކަމަށްވެސް އިޙްސާން ވިދާޅުވިއެވެ.
