ރާއްޖެ އާއި ޗައިނާއާ ދެމެދު މިނިވަން ވިޔަފާރީގެ އެއްބަސްވުމުގެ ދަށުން، އެ ގައުމުން އެތެރެ ކުރާ ގިނަ ބާވަތްތަކުގެ މުދަލުން ޑިއުޓީ މައާފުވާއިރު އޭގެ ތެރޭގައި ދުންފަތުގެ ބާވަތްތަކާއި ސިނގިރޭޓު ނުހިމެނޭނެކަމަށް އިކޮނޮމިކް މިނިސްޓަރ މުހައްމަދު ސައީދު ވިދާޅުވެއްޖެއެވެ.
ޗައިނާއާއި ރާއްޖޭގެ ފްރީ ޓްރޭޑު އެގްރިމަންޓަށް އަމަލު ކުރަން ފެށިފަހުން އިމްޕޯޓު ޑިއުޓީއަށް އޭގެ އަސަރުތައް ކުރަމުންދާތީ، އެކަމަށް ވެސް ގިނަ ކަންބޮޑުވުންތައް އެބައޮތެވެ. އެ މައްސަލައިގައި މިނިސްޓަރ ވިދަޅުވެފައި ވަނީ ޖެނުއަރީ މަހު އެފްޓީއޭއަށް އަމަލު ކުރަން ފެށިފަހުން އިމްޕޯޓު ޑިއުޓީން ގެއްލިފައި ވަނީ އެންމެ އިންސައްތައެއްކަމަށެވެ.
އެފްޓީއޭ އެގްރިމެންޓާއި ގުޅޭގޮތުން ރައްޔިތުންގެ މަޖިލީހުގެ މިއަދުގެ ޖަލްސާގައި، މިނިސްޓަރ ސައީދާއި ސުވާލު ކުރެއްވީ ގަލޮޅު އުތުރު ދައިރާގެ މެމްބަރު އިބްރާހިމް މުހައްމަދު (ކުޑޫ) އެވެ. އިބްރާހިމް ސުވާލު ކުރައްވާފައި ވަނީ ޗައިނާ، ރާއްޖެ މިނިވަން ވިޔަފާރީގެ އެއްބަސްވުމުގެ ދަށުން އެ ގައުމުން އިމްޕޯޓު ކުރާ ދުންފަތުގެ ބާވަތްތަކާއި ސިނގިރޭޓުން ޑިއުޓީ ނަގާނެތޯ އެވެ. އަދި ސިނގިރޭޓު އިމްޕޯޓުކޮށްގެން ދައުލަތަށް ލިބޭނެ އާމްދަނީއަށް ކުރާނެ އަސަރާއި އެކަން ފޫބެއްދުމަށް އަޅާނެ ފިޔަވަޅަކީ ކޮބައިތޯ ސުވާލު ކުރެއްވިއެވެ.
ޖަވާބުގައި ފޮނުވި ސިޓީގައި މިނިސްޓަރ ސައީދު ވިދާޅުވީ އެފްޓީއޭގެ ދަށުން ސިނގިރޭޓާއި ދުންފަތުގެ ބާވަތްތަކުން ޑިއުޓީ ނަގާނެކަމަށެވެ. އަދި އެ އާމްދަނީ ބިނާ ވާނީ މިނިސްޓަރ ވިދާޅުވި ގޮތުގައި ޗައިނާއިން ރާއްޖެއަށް ދުންފަތުގެ ބާވަތްތަކައި ސިނގިރޭޓު އިމްޕޯޓު ކުރާ މިންވަރުގެ މައްޗަށްކަމަށް މިނިސްޓަރ ވިދާޅުވިއެވެ.
ދިވެހިރާއްޖެއިން ޗައިނާއާއި އެކު ސޮއިކޮށްފައިވާ މިނިވަން ވިޔަފާރީގެ އެއްބަސްވުމުގެ ދަށުން ދުންފަތުގެ ބާވަތްތަކުން ޑިއުޓީ އިނާޔަތް ދިނުން ވަނީ އިސްތިސްނާކޮށްފައި.. އަދި އެއްބަސްވުމުގެ ދަށުން ސިނގިރޭޓުން ޑިއުޓީ ނަގާނީ ދިވެހިރާއްޖެއަށް އެހެން ގައުމުތަކުން ވެސް ސިނގިރޭޓަށް ޑިއުޓީ ނަގާ ރޭޓުންނެވެ..
މީގެއިތުރުން އިބްރާހިމް ވަނީ އެފްޓީއޭގެ ދަށުން ކަނޑާލެވޭ އިމްޕޯޓު ޑިއުޓީގެ ސަބަބުން ތަކެތީގެ އަގު ބޮޑުތަނުން ހެޔޮވާނެކަމަށް މިނިސްޓަރ ވިދާޅުވެފައިވާކަން ފާހަގަކުރައްވައި ފަސް މިލިއަން ރުފިޔާގެ ގެސްޓްހައުސްއެއް ތަރައްގީ ކުރުމަށް ހަ ލައްކަ ރުފިޔާ އަގުހެޔޮވާނެކަމަށް ދެއްވާފައިވާ މިސާލު އިތުރަށް ތަފްސީލުކޮށްދެއްވުމަށް އެދިވަޑައިގެންފައެވެ. އިބްރާހިމް ވިދާޅުވީ ދައުލަތަށް ލިބޭނެކަމަށް އަންދާޒާ ކުރާ އާމްދަނީ ދަށްކަމަށާއި އެހެންކަމުން އެފްޓީއޭގެ އާމްދަނީ ކޮންމެ ފަސް އަހަރުން އެއް އަހަރު ވަކިން އިމްޕޯޓު ޑިއުޓީން ގެއްލޭނެ އަދަދަކީ ކޮބައިކަން ސާފުކޮށްދިނުމަށް އެދޭކަމަށެވެ.
އެފްޓީއޭއަށް މި އަހަރުގެ ޖެނުއަރީ މަހުން ފެށިގެން އަމަލުކޮށް، އޭގެ ސަބަބުން ރައްޔިތުންނާއި ދައުލަތަށް ލިބޭނެ މަންފާ ތަކުރާރުކޮށް ފާހަގަކުރަމުންދާއިރު އެގްރިމަންޓު މިހާތަނަށް ހާމަނުކުރާ ސަބަބާއި މެދު އިބްރާހިމް ސުވާލު އުފެއްދިއެވެ.
މި ސުވާލަށް މިނިސްޓަރ ސައީދު ވިދާޅުވީ ޑިއުޓީ ބިނާވާނީ އެ ގައުމުން ރާއްޖެއަށް އެތެރެ ކުރާ މުދަލުގެ އަގަށް ކަމަށެވެ. އެހެން ނަމަވެސް އިބްރާހިމްގެ ސުވާލުގައި ވަނީ މުސްތަގުބަލުގައި ހިނގާނެ މުއާމަލާތްތަކެއްކަމަށް ވާތީ އެކަމުގެ ސީދާ އަދަދުތައް ތަފްސީލު ކުރަން ދަތިކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އެގްރިމަންޓަށް އަމަލު ކުރަން ފެށުމާއި އެކު ސަރުކާރުން އެ ކަރުދާސް އާންމުކުރިކަމަށެވެ.
