ދޭދޭ ގައުމުތަކުގެ މެދުގައި ވެވޭ އެއްބަސްވުންތައް އާންމުކުރެވެނީ، ދެ ގައުމުން އެއްބަސްވާ ގޮތުގެ މަތިންކަމަށް އިކޮނޮމިކް މިނިސްޓަރ އަހުމަދު ސައީދު ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވެފައިވަނީ މިއަދު ރައްޔިތުންގެ މަޖިލީހުގައި ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ލިޔުމުން ކުރެއްވި ސުވާލަކަށް ޖަވާބު ދެއްވަމުންނެވެ. މެންބަރުގެ ސުވާލުގައި ޗައިނާ-ރާއްޖެ މިނިވަން ވިޔަފާރި އެގްރިމެންޓްގެ ދަށުން އިމްޕޯޓް ޑިއުޓީ ކަނޑާލުމުން ދައުލަތަށް ލިބޭ އާމްދަނީ މަދުވާނެކަމުގެ ކަންބޮޑުވުން ފާޅުކުރައްވާފައިވެއެވެ.
މިނިސްޓަރ ސައީދު ވިދާޅުވި ގޮތުގައި، ”ޗައިނާއިން ދިވެހިރާއްޖެއަށް އިމްޕޯޓް ކުރާ މުދަލުގެ ޑިއުޓީ ބިނާވާނީ އެ ގައުމުން ދިވެހިރާއްޖެއަށް އެތެރެކުރެވޭ މުދަލުގެ އަގަށް“ ކަމަށެވެ. އަދި މުސްތަގުބަލުގައި ހިނގާނެ މުއާމަލާތްތަކުގެ ސީދާ އަދަދުތައް އެނގޭނީ އެ މުއާމަލާތްތައް ހިނގުމުންކަމަށްވެސް އޭނާ ވިދާޅުވިއެވެ.
އެފްޓީއޭ އެއްބަސްވުމާ ގުޅޭގޮތުން މިނިސްޓަރ އިތުރަށް ވިދާޅުވި ގޮތުގައި، ދިވެހިރާއްޖެއިން ޗައިނާއާއެކު ވެފައިވާ ފްރީ ޓްރޭޑް އެގްރީމެންޓަށް އަމަލުކުރަން ފެށުމާއެކު، މި އެއްބަސްވުން ވަނީ އާންމުކޮށްފައެވެ.
މެންބަރު އިބްރާހީމް ފާހަގަކުރެއްވި ގޮތުގައި، އެފްޓީއޭގެ ސަބަބުން 5 މިލިއަން ރުފިޔާގެ ގެސްޓް ހައުސްއެއް އިމާރާތްކުރުމުގެ އަގުން 5 ނުވަތަ 6 ލައްކަ ރުފިޔާ ކުޑަވާނެކަމަށް ސަރުކާރުން ވިދާޅުވެފައިވާ ކަމަށާއި، މިކަމުގެ ސަބަބުން ދައުލަތަށް ލިބޭ އާމްދަނީ މަދުވާނެކަން ޔަގީންކަމަށެވެ.
