48 މީހުން ދަތުރުކުރި ”ހުވަން“ ލޯންޗު އަޑިއަށްދިޔަ ހާދިސާގައި ފުލުހުން ދެއްކި ނަމޫނާއަށް ދާޚިލީ ވަޒީރު އަލީ އިޙްސާން ތައުރީފު ކުރައްވައިފިއެވެ.
އެކްސްގައި ކުރެއްވި ޕޯސްޓެއްގައި ވަޒީރު އިޙްސާން ވިދާޅުވީ، ރާޅުތަކުގެ ތެރޭގައި މީހުން ސަލާމަތްކުރުމުގައި އަމިއްލަ ފުރާނައަށް ބެލުމެއްނެތި ދިވެހި ފުލުން ހިއްވަރާއި ކެރުމާއި ސާބިތުކަން ދައްކުވައިދީފައިވާ ކަމަށެވެ.
އެކަމަކީ ފުލުހުންގެ މުއައްސަސާއަށް ޒިންމާވާ ވަޒީރުގެ ހައިސިއްޔަތުން ފަހުރުވެރިވެވަޑައިގަންނަވާ ކަމެއްކަމަށްވެސް ވަޒީރު ވިދާޅުވިއެވެ. އެހެންކަމުން އެ އޮޕަރޭޝަންގައި ބައިވެރިވި ފުލުހުންނަށް އަދި މުޅި ފުލުހުންގެ މުއައްސަސާއަށް ހިފެހެއްޓުމެއްނެތް ޝުކުރާއި ތަޢުރީފު އަދާކުރައްވާކަމަށް އިޙްސާން ވިދާޅުވިއެވެ.
އިޙްސާން ވަނީ މިއީ ޤައުމީ ހިދުމަތުގައި ނަފްސަށްވުރެ ދިވެހި ޤައުމު އިސްކުރުމުގެ ފުރިހަމަ ނަމޫނާއެއްކަމަށްވެސް ވިދާޅުވެފައެވެ.
ގަދަ ކަނޑުގެ ބިޔަ ރާޅުތަކުގެ ތެރޭގައި މީހުން ސަލާމަތްކުރުމުގައި އަމިއްލަ ފުރާނައަށް ބެލުމެއްނެތި ދިވެހި ފުލުން ދެއްކެވި ހިއްވަރާއި ކެރުމާއި ސާބިތުކަމަކީ ފުލުހުންގެ މުއައްސަސާއަށް ޒިއްމާވާ ވަޒީރުގެ ހައިސިއްޔަތުން އަޅުގަނޑު ފަހުރުވެރިކަމާއިއެކު އެ އޮޕަރޭޝަންގައި ބައިވެރިވި ފުލުހުންނަށް އަދި މުޅި ފުލުހުންގެ މުއައްސަސާއަށް ހިފެހެއްޓުމެއްނެތް ޝުކުރާއި ތަޢުރީފު އަދާކުރާކަމެއް
ފުލުހުންގެ މުއައްސަސާއިން މައުލޫމާތު ދީފައިވާގޮތުން ހުވަން ގެ ނަން ދެވިފައިވާ ލޯންޗެއް މާލެއިން ދިގުރަށަށް ދަތުރުކުރަމުންދަނިކޮށް ދިމާވި ހާދިސާއެއްގެ ސަބަބުން ފެތެމުންދާކަމުގެ މައުލޫމާތު އެ މުއައްސަސާއަށް ލިބިފައިވަނީ އާދިއްތަ ދުވަހުގެ ހެނދުނު 7:57 ގައެވެ. މި އުޅަނދުގައި އެވަގުތު 45 ފަސިންޖަރުންގެ އިތުރުން ކުރޫއިންގެ ގޮތުގައި 3 މީހަކު ތިބިކަމަށްވެސް ފާހަގަކޮށްފައިވެއެވެ.
މި މައުލޫމާތުތައް ލިބުމާއިއެކު އެމެޖެންސީ ރެސްޕޮންސް ޓީމުތައް ވަގުތުން ފޮނުވިކަމަށާއި އެފިޔަވަޅުތަކުގެ ސަބަބުން 4 ކުޑަކުދިންވެސް ހިމެނޭގޮތަށް ދަތުރުކުރަމުންދިޔަ އެންމެން ސަލާމަތްކުރެވިފައިވެއެވެ. ފަސިންޖަރުންނާއި ކުރޫއިންވެސް ދިގުރަށަށް ގެންގޮސްފައިވާއިރު އެންމެންގެވެސް ސިއްހީ ހާލަތު ރަނގަޅުކަމަށް މައުލޫމާތު ދީފައިވެއެވެ.
މި ހާދިސާ ދިމާވުމަށް މެދުވެރިވި ސަބަބު ބެލުމަށްޓަކައި ތަހުގީގުތަކެއް ކުރިއަށްދާކަން އެ މުއައްސަސާއިން ހާމަކޮށްފައިވާއިރު ރެސްކިއު މަސައްކަތްތަކުގައި ހަރަކާތްތެރިވި ޓީމުގެ އިތުރުން އެހީތެރިކަން ފޯރުކޮށްދިން އެންމެހާ ފަރާތްތަކަށްވެސް އެ މުއައްސަސާއިންވަނީ ތައުރީފްކޮށްފައެވެ.
