ރާއްޖެ ޓްރާންސްޕޯޓް ލިންކް (އާރުޓީއެލް) އިން ހިލޭ ދަތުރުކުރެވޭ ”ސްމާޓް ކާޑެއް“ ވިއްކާ ކަމަށް ބުނެ ފޭސްބުކް ޕޭޖެއް މެދުވެރިކޮށް ސްކޭމެއް ހިންގަމުންދާކަމަށް އެމްޓީސީސީއިން ބުނެފިއެވެ.
އެމްޓީސީސީއިން ވަނީ މިކަމަށް ސަމާލުވުމަށް އެދިފައެވެ.
މިކަމާއި ގުޅިގެން ނެރުން ނޫސް ބަޔާނުގައި އެމްޓީސީސީއިން ބުނީ ސޯޝަލް މީޑިއާގެ ޕްލެޓްފޯމްތަކުގައި އެކި ފަރާތްތަކުގެ ނަމުގައި ހިންގާ ސްކޭމްތައް އިތުރުވަމުންދާކަމަށެވެ. އެ ކުންފުނިން ދެމުން ގެންދާ އާރުޓީއެލް ހިދުމަތާއި ގުޅިގެން މިފަދަ ކަމެއް ހިންގަމުންދާކަން ފާހަގަވެފައިވާކަމަށް ބުންޏެވެ.
”މޯލްޑިވްސް ޕަބްލިކް ޓްރާންސްޕޯޓް“ގެ ނަމުގައި ހިންގާ ފޭސްބުކް ޕޭޖަކުން ދަނީ އާރްޓީއެލް މެދުވެރިކޮށް ތިން މަސްދުވަސް ވަންދެން ހިލޭ ދަތުރުކުރުމަށް މަގުފަހިކޮށްދޭނެ ކަމަށް ބުނާ ”ސްމާޓް ކާޑެއް ”ވިއްކުމުގެ މަސައްކަތްކުރަމުންކަމަށް އެމްޓީސީސީއިން ބުންޏެވެ.
އެއީ އެމްޓީސީސީ އާއި އާރުޓީއެލްއާ ވެސް އެއްވެސް ގުޅުމެއް ނެތް ކަމެއްކަމަށް އެމްޓީސީސީން ބުންޏެވެ.
އެ ކުންފުނީގެ ފަރާތުން އެއްވެސް ހިދުމަތެއް ތައާރަފުކުރަނީކަމަށްވާނަމަ، އެކަމެއް ރަސްމީކޮށް ފެށުމުގެ ކުރިން ކުންފުނީގެ އޮފިޝަލް ސޯޝަލް މީޑިއާ އަދި އެހެނިހެން މީޑިއާ ޗެނަލްތަކުން އެކަމުގެ މައުލޫމާތު ހިއްސާކުރާނެކަމަށް އެމްޓީސީސީއިން ބުންޏެވެ.
އެ ކުންފުންޏަށް ރައްޔިތުން ކުރާ އިތުބާރުގެ ބޭނުން ނަހަމަ ގޮތުގައި ހިފައި، ނުހައްގުން ފައިސާ ހޯދުމަށް ކުރާ މި ކަހަލަ ނާތަހުޒީބު އަމަލުތައް ހަރުކަށި އިބާރާތުން ކުށްވެރިކުރާކަމަށް އެމްޓީސީސީއިން ބުންޏެވެ.
