ނެޝަނަލް ފުޑް ސޭފްޓީ އެންޑް ކޮލިޓީ ބޯޑުގެ ހިންގާ ގަވައިދު އާންމުކޮށް ގެޒެޓުކޮށްފި އެވެ.
ބޯޑު މެމްބަރުންގެ މައިގަނޑު މަސްއޫލިއްޔަތުތަކުގެ ތެރޭގައި ހިމެނެނީ، ކާބޯތަކެތީގެ ފެންވަރާއި ސިއްހީ ރައްކާތެރިކަން ކަށަވަރު ކުރުމާއި ގުޅޭގޮތުންނާއި ކާބޯތަކެއްޗަކީ ސިއްހަތަށް ފައިދާ ހުރި ތަކެތިކަމުގައި ކަށަވަރުކުރުމާއި ގުޅޭގޮތުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އަށް ލަފައާއި އިރުޝާދާއި ފަންނީ ލަފާ ފޯރުކޮށްދިނުމެވެ. އަދި ގާނޫނު ތަންފީޒު ކުރުމުގައި ދިމާވާ ގޮންޖެހުންތަކަށް ހައްލު ހޯދުމުގައި އޮތޯރިޓީއަށް ލަފާދިނުން ހިމެނެއެވެ.
ނެޝަނަލް ފުޑް ސޭފްޓީ އެންޑް ކޮލިޓީ ބޯޑުގެ ހިންގާ ގަވައިދު އެކުލަވާލާފައި ވަނީ ކާބޯތަކެތި ރައްކާތެރި ކުރުމުގެ ގާނޫނުގެ ދަށުންނެވެ. މި ގަވައިދުގެ މަގްސަދަކީ ބޮޑުގެ ހިންގުމަށާއި ބޯޑުގެ މަސްއޫލިއްޔަތު ފުރިހަމައަށް އަދާކުރުމަށާއި ބޯޑުން ނިންމަން ޖެހޭ ނިންމުންތައް ނިންމުމަށްޓަކައި ބޯޑުގެ ބައްދަލުވުންތައް ބޭއްވުމާއި އެ ބައްދަލުވުންތައް ހިންގުމާއި އެ ބައްދަލުވުންތަކުގައި ނިންމާ ކަންކަން ނިންމުމުގައި އަމަލު ކުރާނެ ގޮތުގެ އުސޫލުތައް ކަނޑައަޅައި ބަޔާން ކުރުމެވެ.
ބޯޑުގެ މަސްއޫލިއްޔަތެއްކަމަށް ގަވައިދުގައި ބުނެފައި ވަނީ ކާބޯތަކެތީގެ ފެންވަރާއި ސިއްހީ ތައްކާތެރިކަން ކަށަވަރު ކުރުމާއި ގުޅޭގޮތުންނާއި ކާބޯތަކެއްޗަކީ ސިއްހަތަށް ފައިދާ ހުރި ތަކެތިކަމުގައި ކަށަވަރު ކުރުމާއި ގުޅޭގޮތުން އޮތޯރިޓީއަށް ލަފައާއި އިރުޝާދާއި އެހީތެރިކަން ފޯރުކޮށްދިނުމެވެ.
މީއާއި އެކު ގާނޫނު ތަންފީޒު ކުރުމުގައި ދިމާވާ ގޮންޖެހުންތަކަށް ހައްލު ހޯދުމުގައި އޮތޯރިޓީއށް ލަފާ ދޭން ޖެހޭނީ ބޯޑުންނެވެ.
ނެޝަނަލް ފުޑް ސޭފްޓި އެންޑް ކޮލިޓީ ބޯޑު އެކުލަވާލާފައި ވަނީ ޑިރެކްޓަރ ޖެނެރަލްއާއި، ހެލްތް މިނިސްޓަރ ކަނޑައަޅުއްވާ އިސް މުވައްޒަފެއްގެ އިތުރުން، ކާބޯތަކެތީގެ ސަލާމަތާއި ރައްކާތެރިކަމާއި ގުޅޭ ކަންކަމުގައި މަސައްކަތް ކުރާ އޮތޯރިޓިގެ އިސްވެރިޔާއެވެ.
މި ބޯޑުގައި ކާބޯތަކެތީގެ ޒަރިއްޔާއިން ޖެހޭ ބަލިތައް ދެނެގަތުމުގައި ހެލްތް ޕްރޮޓެކްޝަން އޭޖެންސީގައި މަސައްކަތް ކުރާ ފަންނީ މުވައްޒަފަކާއި، އިގްތިސާދީ ސިޔާސަތުތައް ކަނޑައެޅުމުގެ މަސްއޫލިއްޔަތު އޭރަކު ހަވާލުކޮށްފައިވާ އިސް މުވައްޒަފެއް ހުންނަންވާނެ އެވެ. އަދި ފުޑް ސައިންސްގެ މާހިރެއް ބޯޑުގައި ހިމަނަން ޖެހޭއިރު އެއީ ސަރުކަރުގެ އިދާރާއެއްގައި މަސައްކަތް ކުރާ މުވައްޒަފެއްކަމުގައި ވެގެން ނުވާނެއެވެ.
ޑިރެކްޓަރ ޖެނެރަލް ފިޔަވައި ބޯޑަށް އައްޔަނު ކުރާ މެމބަރުންގެ އަދަދަކީ ފަސް އަހަރެވެ.
ގަވައިދު ބުނާ ގޮތުގައި ބޯޑުގެ އެއްވެސް މެމްބަރަކީ ކާބޯތަކެތީގެ ހިދުމަތް ދޭ ވިޔަފާރިވެރިއެއް ނުވަތަ އެފަދަ ވިޔަފާރިއަކާއި އެއްވެސް މަސްލަހަތެއް އޮތް ފަރާތެއްކަމުގައި ވެގެން ނުވާނެއެވެ. އަދި ބޯޑުގެ އެއްވެސް މެމްބަރެއް މަސްލަހަތު ފުށުއަރާ މައްސަލައަކާއި ގުޅޭގޮތުން ކުރެވޭ އެއްވެސް މަޝްވަރާއެއްގައި ބައިވެރިވެ އެފަދަ މައްސަލައެއްގައި ނަގާ ވޯޓެއްގައި ބައިވެރިވެގެން ނުވާނެއެވެ.
މީގެއިތުރުން ގަވައިދުގައި ވަނީ ބޯޑަށް އައްޔަނު ކުރާ މެމްބަރުން ވަކި ކުރާނީ މިނިސްޓަރުކަމަށެވެ. މެމްބަރަކު ވަކކުރަން ބޭނުންވެއްޖެ ނަމަ ލިޔެކިއުމަކުން އެކަން މެމްބަރަށް އަންގަން ވާނެއެވެ.
