ރައްޔިތުންގެ މަޖިލީހުގެ މަސައްކަތްތައް ކުރިޔަށް ގެންދިއުމަށް ކަނޑައެޅިފައިވާ ކޮމިޓީތަކުގެ މެމްބަރުންތަކަށް ބަދަލު ގެނައުން ޕާލިމަންޓްރީ ގުރޫޕުުތަކުގައި އަބަދުވެސް ހިނގާކަމަށް ޕީއެންސީގެ ޕީޖީ ލީޑަރު އަދި ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވެއްޖެ އެވެ.
ފަލާހު މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ މާލިއްޔަތު ކޮމިޓީންނާއި، ގައުމީ ސަލާމަތީ ހިދުމަތްތަކާއި ބެހޭ ކޮމިޓީ (241 ކޮމިޓީ) އިން އަޒާން ވަކިކޮށްފައި ވަނިކޮށެވެ. ސުޕްރީމް ކޯޓުގައި މައްސަލައެއް ކުރިޔަށް ދަނިކޮށް، އެއާއި ގުޅޭގޮތަށް ބެންޗުގެ އަދަދަށް ބަދަލު ގެނައުމަށް ހުށަހެޅި ބިލަށް ދެކޮޅު ހަދައި އަޒާން ވަނީ އެއީ ގާނޫނުއަސާސީއާއި ހިލާފު އަމަލެއްކަމަށް ވިދާޅުވެފަ އެވެ.
އެ މައްސަލައިގައި ޕީއެންސީގެ މަޖިލިސް ވަޓްސްއަޕް ގުރޫޕުތަކުން ވެސް އަޒާން ބޭރުކޮށްފައިވާކަމަށް މައުލޫމާތު ލިބެ އެވެ.
ކޮމިޓީތަކުން ބޭރު ކުރި މައްސަލައިގައި އަޒާން ވިދާޅުވީ، އެނާ ބަދަލު ކުރީ ކުރަމުން ގެންދާ އެކި މަސައްކަތްތަކާއި ގުޅުވައިކަމަށެވެ. ހާއްސަކޮށް ކޮރަޕްޝަނާއި ގުޅުން ހުރި ބައެއް މައްސަލަތައް ކުރިޔަށް ގެންދާތީ ޕްރެޝަރާއި ކުރިމަތިވިކަމަށް އަޒާން ވަނީ މީޑީއާތަކަށް ވިދާޅުވެފަ އެވެ.
މީޑިއާތަކުގައި މައްސަލަ ފެންމަތިވުމުން ފަލާހު ކުރެއްވި ޕޯސްޓެއްގައި ވިދާޅުވީ ޕީޖީ ގުރޫޕުގެ އަދަދާއި ކޮމިޓީތަކުގެ އަދަދާއި މެމްބަރުން ކޮމިޓީގެ ހާޒިރީއަށް ދެއްވާ އަހަމިއްޔަތުކަމާއި ކޮމިޓީގެ މަސައްކަތްތަކަށް ދެއްވާ ސަމާލުކަން ފަދަ ކަންކަމުގެ މައްޗަށް ބިނާކޮށް މީގެ ކުރީގެ ދައުރުތަކުގައި ވެސް ބަދަލުތައް ގެނެސްފައިވާކަމަށެވެ. އަދި ކުރިޔަށް އޮތް ތަނުގައި ވެސް އެގޮތުގެ މަތީން ބަދަލުތައް ގެނެވޭނެކަމަށް ފަލާހު ވިދާޅުވި އެވެ.
