ސަރުކާރުން އަންގައިގެން މޯލްޑިވްސް މޮނިޓަރީ އޮތޯރިޓީ (އެމްއެމްއޭ) އިން 15 ބިލިއަން ރުފިޔާ ޗާޕްކިރަން އުޅޭކަމަށް އެމްޑީޕީގެ ސަރުކާރުގެ ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
އެމްޑީޕީގެ އިކޮނޮމިކް ކޮމިޓީން ބޭއްވި ނޫސްވެރިންގެ ބައްދަލުވުމުގައި އަމީރު ވިދާޅުވީ ސަރުކާރުން އަންގައިގެން 15 ބިލިއަން ޗާޕު ކުރަން އެމްއެމްއޭއިން ނިންމާފައިވާކަމުގެ މައުލޫމާތު ލިބިވަޑައިގެންފައިވާކަމަށެވެ. އަމީރު ވިދާޅުވީ އޭނާއަށް އެނގިފައިވާ ގޮތުގައި އެމްއެމްއޭއިން 15 ބިލިއަން ރުފިޔާއަށް 22 ހެކްޓަރުގެ ބިމެއް އެޗްޑީސީން ހުޅުމާލެއިން ގަތުމަށް ނިންމާފައިވާ ކަމަށެވެ. 22 އަކަފޫޓުގެ ބިމުން ބޭނުންކުރެވޭ އަކަފޫޓަކަށް 10 ހާސް ރުފިޔާއަށް ވުރެ ބޮޑު ކަމަށް ލަފާކުރެވޭ ކަމަށް އަމީރު ވިދާޅުވިއެވެ.
އަމީރު ވިދާޅުވީ 22 ހެކްޓަރު ގަތުމަށް ބޭނުންވާ ފައިސާ އެމްއެމްއޭއިން ޗާޕްކުރަން ނިންމާފައިވާކަމަށް ޔަގީންކުރެވޭ ކަމަށެވެ. އޭގ ސަބަބުން ރާއްޖެގެ އިގްތިސާދީ ހަމަޖެހުން ނަގާލައި އިގްތިސާދަށް އިޔާދަ ނުކުރެވޭ ވަރުގެ ގެއްލުންތަކެއް ލިބޭނެ ކަމަށް އަމީރު ވިދާޅުވިއެވެ. އަމީރު ވިދާޅުވީ އޭގެ ސަބަބުން ތަކެތީގެ އަގު އިންތިހާއަށް މަތިވެ އިންފްލޭޝަން މަތިވެގެން ދާނެ ކަމަށާއި އަދި ދިވެހިރުފިޔާ ބަލިކަށިވެ ރާއްޖޭގައި އެކްސްޗޭންޖް ރޭޓް މަތިވެ ގޯސް އަސަރުތަކެއް ކުރާނެ ކަމަށެވެ.
”އޭގެއިތުރުން އިންޓްރެސްޓް ރޭޓް މައްޗަށްގޮސް އަޅުގަނޑުމެންނަށް ދިވެހި ވިޔަފާރިވެރިންނަށްވެސް އަމިއްލަ ފަރުދުންނަށްވެސް ބޭންކުތަކުން ލޯނު ލިބުމަށް ދަތިވެ ދިވެހި ހުރިހާ ރައްޔިތުންނަށްވެސް މީގެ ސަބަބުން މާލީ މުސްތަގުބަލަށް ނުރައްކާވާނެ ކަމަށް އެބަ ޔަގީން ކުރެވޭ. ސަރުކާރުން އެމްއެމްއޭއަށް މަޖުބޫރުކުރަނީ އަސްލު އެމްއެމްއޭގެ އޯރިޓީގެ މައިގަނޑު މެންޑޭތާއި ހިލާފުވެ އަދި ސަރުކާރުގެ ސިޔާސީ ފައިދާއަށް ރާއްޖޭގެ އިގްތިސާދު ބޮޑު ކާރިސާއެއްގެ ތުންފަތް މައްޗަށް މި ވައްޓާލެވެނީ“
އަމީރު ވިދާޅުވީ މިދިޔަ 1 އަހަރުގެ ތެރޭގައިވެސް ސަރުކާރު ފެއިލް ވެފައިވާކަން ރައްޔިތުންނަށް އެނގޭކަމަށެވެ. ސަރުކާރަށް ފައިސާ ބޭނުންވާ ކަމަށާއި، ބޭރުން ހިލޭ އެހީގެ ގޮތުގައިވެސް އަދި ބޭރުން ކޮންސެޝަނަލް ފައިނޭންސްގެ ގޮތުގައި ލޯނުގެ ގޮތުގައިވެސް އަދި އެހެނިހެން ގޮތްގޮތުންވެސް މިހާތަނަށް ސަރުކާރަށް އެންމެނ ޑޮލަރެއްވެސް ހޯދިފައި ނުވާ ކަމަށް އަމީރު ވިދާޅުވިއެވެ. އަދި ރާއްޖޭގެ އެތެރޭގެ މާކެޓުން ހޯދުނުގޮތަކަށް ސަރުކާރަށް ފައިސާ ހޯދަން އުޅޭ މައިގަނޑު ސަބަބަކީވެސް އެއީ ކަމަށް އަމީރު ވިދާޅުވިއެވެ.
އަމީރު ވިދާޅުވީ ސަރުކާރުން މިދިޔަ އަހަރު ސަރުކާރުން ބަޖެޓު މެނޭޖުކޮށްފައި ވަނީ ސަރުކާރުގެ ކުންފުނިތަކުގެ ކޭޝް ފުލޯ ބޭނުންކޮށްގެނާއި ބޭންކް އޮފް މޯލްޑިވްސްއިން ޓްރެޝަރީ ބިލަށް އިންވެސްތްކޮށްގެންނާއި، އާއްމުކޮށް އިންވެސްޓުކުރާ މިންވަރަށް ވުރެ ބޮޑުކޮށް އިންވެސްޓްކޮށްގެން ކަމަށް މިދިޔަ ދުވަސްތަކުގައި އެމްޑީޕީން ފާހަގަކޮށްފައިވާނެ ކަމަށެވެ. އަމީރު ވިދާޅުވީ މިހާރު ޑޮމެސްޓިކް މާކެޓުންވެސް ފައިސާ ހޯދަން ސަރުކާރަށް ދަތިވީ ކަމަށެވެ.
މީގެއިތުރަށް ރައީސް ޑރ. މުހައްމަދު މުއިއްޒު ފައިސާ ޕްރިންޓް ނުކުރަން ވައުދުވެވަޑައިގެންފައި ވުމުން އާ ގޮތަކަށް ފައިސާ ޗާފުކޮށްގެން ފައިސާ ހޯދުމުގެ މަގެއް ހޯދައިފައިވާ ކަމަށްވެސް އަމީރު ވަނީ ވިދާޅުވެފައެވެ.
