ގައުމީ ސަލާމަތަށް ނުރައްކާވާ އަމަލުތަކެއް ހިންގަން އުޅޭކަމުގެ ތުހުމަތުގައި ކުރިޔަށް ގެންދާ އޮޕަރޭޝަނުން ބަޔަކު ހައްޔަރުކޮށްފި އެވެ.
މާލޭގެ ސަރަހައްދުގައި ކައުންޓަރ ޓެރަރިޒަމްގެ އޮޕަރޭޝަނަތައް ފަށައި ބަޔާނެއް އާންމު ކުރުމަށް ފަހު ފުލުހުން ވަނީ އިތުރަށް ބަލަން ޖެހޭ ކަންކަން ހުރިކަމަށް ބުނެ ބަޔާން އަނބުރާ ގެންގޮސްފަ އެވެ.
އޭގެ ފަހުން މާލޭގެ އެކި ސަރަހައްދުތައް ބަލައި ފާސް ކުރަމުން ދަނީ ދިފާއީ ބާރުގެ ވެސް އެހީއާއި އެކު އެވެ.
މިރޭގެ އޮޕަރޭޝަނުގައި އެންމެ ފުރަތަމަ ބަލައި ފާސްކުރީ ޖުމްހޫރީ މައިދާން ކައިރިން ކަރާ ބަސްތާތަކެއް ލޯޑުކޮށްގެން ދިޔަ ޕިކަޕެކެވެ.
އެއަށް ފަހު ރާޅުގަނޑު ސަރަހައްދުގައި ހުރި ގެއަކާއި، ޝަބްނަމް ސަރަހައްދު ބަލައި ދަނީ ފަސްކުރަމުންނެވެ. އަދި ހުޅުމާލެ ފޭސް ދޭއްގެ، ވިނަރެސް ފްލެޓުތައް ސަރަހައްދުގައި ވެސް ދަނީ ހަރަކާތްތެރިވަމުންނެވެ. އަދި ފަރުކޮޅު ސަރަހައްދު ވެސް އޭގެ ތެރޭގައި ހިމެނެ އެވެ.
އެގޮތުން ހުޅުމާލެ ދާ ބައެއް ކާރުތަކާއި، އުޅަނދުތައް ބަލައި ފަސްކުރި އެވެ.
މި އޮޕަރޭޝަނާއި ގުޅޭގޮތުން ތަކުރާރުކޮށް ސުވާލު ކުރުމުން ވެސް ފުލުހުން އެއްވެސް ޖަވާބެއް ނުދެއެވެ. އަދި އެނގިފައިވާ ގޮތުން މިހާތަނަަށް 4 މީހަކު ވަނީ ހައްޔަރުކޮށްފަ އެވެ.
މީގެތެރެއިން އެކަކު ހައްޔަރު ކުރީ ވިނަރެސް ފްލެޓަކުންކަމަށް މައުލޫމާތު ލިބެއެވެ.
