ގައުމީ ސަލާމަތަށް ނުރައްކާވާ އަމަލުތަކެއްގެ އިންޓެލިޖެންސް މައުލޫމާތު ލިބި ބަލައި ފާސް ކުރަމުން ދަނީ ހައްޔަރު ކުރި މީހުންނާއި ގުޅުން ހުރި ތަންތަންކަމަށް ފުލުހުން ބުނެފިއެވެ.
އިންޓެލިޖެންސް މަައުލޫމާތުތަކެއް ލިބި ކުރިޔަށް ގެންދާ މި އޮޕަރޭޝަނުގެ އިތުރު މައުލޫމާތެއް ފުލުހުން ހިއްސާކޮށްފައި ނުވެއެވެ. އަދި އެފަދަ އޮޕަރޭޝަންތަކެއް ކައުންޓަރ ޓެރަރިޒަމުން ފަަށާފައިވާކަމަށް ބުނެ އާންމު ކުރި ބަޔާން ވަނީ އަނބުރާ ގެންގޮސް ނޫސްވެރިން ތަކުރާރުކޮށް ކުރި އެއްވެސް ސުވާލަކަށް ޖަވާބު ދީފައި ނުވެއެވެ.
މިރޭ އެންމެ ފުރަތަމަ ޖުމްހޫރި މައިދާން ކައިރިން ކަރާ ބަސްތާތަކެއް ލޯޑުކޮށްގެން ދިޔަ ލޮރީއެއް ހުއްޓުވައި ބަލާ ފާސްކުރި އެވެ. އަދި ޕިކަޕު ދުއްވަން އިން މީހާ ފުލުހުންގެ ބެލުމުގެ ދަށަށް ގެންގޮސް އޭނާ ދިރިއުޅޭ ގެ ބަލައި ފާސްކުރި އެވެ.
ދެ ގަޑިއިރަށް ވުރެ ގިނަ އިރު ފުލުހުންނާއި، ސީޓީ އަދި ސިފައިން ހަރަކާތްތެރިވުމަށް ފަހު އޭނާ ހައްޔަރު ކުރި އެވެ.
މީގެއިތުރުން ހެންވޭރު ދަނޑު ސަރަހައްދާއި، ރާޅުގަނޑު ސަރަހައަދު އަދި ޝަބްނަމް މަގާއި، ސެނެހިޔާ ކައިރި ތަނެއްގެ އިތުރުން ހުޅުމާލެ ފޭސް ދޭއްގެ ވިނަރެސް ފްލެޓަކާއި، ފޭސް ދޭއްއިން ފަރުކޮޅަށް ދާ ސަރަހައްދު ބަލައި ފާސްކޮފައި ވެއެވެ.
މައްސަލައިގައި ދެވަނަ މީހާ ހައްޔަރު ކުރީ، ވިނަރެސްއިން ނަމަވެސް ތިން ވަނަ މީހާ ހައްޔަރު ކުރިތަން ސާފެއް ނޫނެވެ. ފުލުހުން ބުނި ގޮތުގައި ބަލާ ފަސްކުރީ ހައްޔަރު ކުރި މީހުންނާއި ގުޅުން ހުރި ތަންތަނެވެ.
މީގެއިތުރުން މާލޭގެ ގްރީންޒޯންތަކުގެ ސެކިއުރިޓީ ފުލުހުން ވަނީ ވަރުގަދަކޮށްފަ އެވެ. އަދި އެކި ސަރަހައްދުތަކުގައި ފުލުހުން ދަނީ ފޯރިމަރަމުންނެވެ.
