މިއަހަރު ރާއްޖޭގައި އިތުރު އެއްވެސް ތަރައްޤީގެ ޕްރޮޖެކްޓެއް ނުހިންގުމަށް ސަރުކާރުން ވިސްނާކަމުގެ އަޑުއިވެމުންދާކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
ރައްޔިތުންގެ މަޖިލީހުގެ ޖަލްސާގައި ވާހަކަފުޅު ދައްކަވަމުން މެންބަރު މައުރޫފް ވިދާޅުވީ، ޓުއަރިޒަމް ޤާނޫނަށް ހުށަހަޅާފައިވާ އިޞްލާޙުތަކުން ފެންނަނީ އެއްވެސް ސިޔާސަތެއް ނެތި ޤާނޫނުތަކަށް ބަދަލު ގެންނަމުންދާ މަންޒަރު ކަމަށެވެ. އަދި އެކި ނަންނަމުގައި ހީލަތްތެރި ގޮތްތައް މެދުވެރިކޮށް ފައިސާ ޗާޕުކުރުމުގެ މަސައްކަތްތައް ފަތުރުވެރިކަމުގެ ޞިނާޢަތަށް ގެއްލުންވާ ގޮތަށް ކުރަމުންދާކަމަށް އޭނާ ފާހަގަކުރެއްވިއެވެ.
މައުރޫފް އިތުރަށް ވިދާޅުވީ، ދައުލަތް ހިންގަން ނޭނގުމުގެ ސަބަބުން ޤައުމު އިޤްތިޞާދީ ގޮތުން އިނދަޖެހިގެންދާ މަންޒަރު ފެންނަމުންދާ ކަމަށެވެ. ”ރާއްޖެއަށް އަންނަ ފަތުރުވެރިންގެ އަދަދު މަދުނުވާއިރު، އާމްދަނީވެސް ޖުމްލަ ގޮތެއްގައި މަދުވެފައި ނުވާއިރު، ހިންގަން ނޭނގުމުގެ ސަބަބުން ޤައުމުގެ މާލީ ހާލަތު ގޯސްވެގެންދާ މަންޒަރު ފެންނަމުންދަނީ،“ އޭނާ ވިދާޅުވިއެވެ.
މެންބަރު މައުރޫފް ވަރަށް ކަންބޮޑުވުމާއެކު ފާހަގަކުރެއްވީ، ތަރައްޤީގެ މަގުގައި ކުރެވޭ އެއްވެސް މަސައްކަތެއް ފެނިގެން ނުދާކަމަށެވެ. އަދި ފަތުރުވެރިކަމުން ލިބޭ އާމްދަނީއިން ހިންގަންޖެހޭ ހުރިހާ ޕްރޮޖެކްޓުތަކެއް ހުއްޓިފައިވާކަމަށްވެސް އޭނާ ވިދާޅުވިއެވެ.
”މިއަހަރުވެސް އިތުރު ޕްރޮޖެކްޓެއް ދެން ރާއްޖޭގައި ނުހިންގާނެ ވާހަކަ އަޑުއިވެމުންދޭ. އެހެންކަމުން، ކުރިއަށް އޮތްތާނގައި ސަރުކާރުގެ ހިއްސާ އޮންނަ ކުންފުނިތަކަށް މުވައްޒަފުން އިތުރުކޮށްގެން އެމީހުންނަށް ފައިސާ ދީގެން މަސައްކަތްތައް ކުރާ މަންޒަރު ފެންނާނެ،“ މައުރޫފް ވިދާޅުވިއެވެ.
މި ޚަބަރާ ގުޅޭގޮތުން ސަރުކާރުގެ ކަމާބެހޭ ފަރާތްތަކުން އެއްވެސް ބަހެއް އަދި ވިދާޅުވެފައެއް ނުވެއެވެ. ނަމަވެސް، މެންބަރު މައުރޫފްގެ މި ވާހަކަފުޅުތަކުން ރައްޔިތުންގެ މެދުގައި ކަންބޮޑުވުން އުފެދިފައިވާކަން ފާހަގަކުރެވެއެވެ.
