ފުލުހުންނާއި ސިފައިން ގުޅިގެން ގައުމީ ސަލާމަތަށް ނުރައްކާ ހުރި އަމަލުތަކެއްގެ މައްސަލައިގައި އޮޕަރޭޝަންތަކެއް ކުރިޔަށް ގެންދިޔަ ނަމަވެސް، އެއްވެސް ނުރައްކަލެއް ނެތްކަމަށް ސަރުކާރުން ބުނެފި އެވެ.
ގައުމީ ސަލާމަތަށް ނުރައްކާ އަމަލުތަކެއް ހިންގަން އުޅޭކަމުގެ އިންޓެލިޖެންސް މައުލޫމާތުތަކެއް ލިބި ފުލުހުންނާއި ސިފައިން ގުޅިގެން ކުއްލި އޮޕަރޭޝަނެއް ފެށީ ރޭގެ ވަގުތެއްގަ އެވެ. މި އޮޕަރޭޝަނުގައި ކައުންޓަރ ޓެރަރިޒަމްގެ އޮފިސަރުން ހަރަކާތްތެރިވެ، މާލޭގެ ގިނަ ސަރަހައްދުތަކެއް ބަލައި ފާސްކުރި އެވެ.
މި މައްސަލައިގައި ފޮރިން މިނިސްޓްރީން އާންމު ކުރި، ކުރު ބަޔާނެއްގައި ބުނީ އިންޓެލިޖެންސަށް ލިބުނު މައުލޫމާތަކާއި ގުޅިގެން ގައުމީ ސަލާމަތާއި ރައްކާތެރިކަމަށް ކުރިޔަށް ގެންދާ އޮޕަރޭޝަނުގައި މިވަގުތު އެއްވެސް ނުރައްކަލެއް ނެތްކަމަށެވެ. އަދި ރޭގެ އޮޕަރޭޝަނުން ތިން މީހަކު ހައްޔަރުކޮށް، އެކި ސަރަހައްދުތަކާއި ވެހިކަލްތައް ފާސްކުރިކަމަށް ބުންޏެވެ.
ބަޔާނުގައި ބުނެފައި ވަނީ އާންމު ރައްޔިތުން ކަންބޮޑުވާން ޖެހޭކަމެއް ނެތްކަމަށެވެ.
ރޭ އޮޕަރޭޝަން އެންމެ ފުރަތަމަ ފަށައި، ޖުމްހޫރީ މައިދާން ސަރަހައްދުން ފުލުހުން ދެ ލޮރީއެއް ބަލައި ފާސްކުރި އެވެ. އަދި އެތަނުން ދެވަނަ ޕިކަޕުގައި ކަރާ ބަސްތާތަކެއް ލޯޑުކޮށްފައި ހުރިއިރު ގިނަ އިރުތަކެއް ވަންދެން އެ ޕިކަޕު ހުއްޓުވައި މުޅި ޕިކަޕު ސްކްރީމް ކުރި އެވެ. އެއަށް ފަހު ޕިކަޕު ދުއްވަން އިން މީހާ ފުލުހުންގެ ބެލުމުގެ ދަށުން ގެންދިޔައި އޭނާ ދިރިއުޅެމުން ދިޔަ ގެއަށެވެ.
ދެ ގަޑިއިރަށް ވުރެ ގިނަ އިރު ފުލުހުންނާއި ސިފައިން އެ ގޭގައި ހަރަކާތްތެރިވުމަށް ފަހު އޭނާ ހައްޔަރު ކުރި އެވެ.
ފުލުހުން ރޭ ދެން މީހަކު ހައްޔަރު ކުރީ، ހުޅުމާލެ ފޭސް ދޭއެއްގެ ވިނަރެސް ފްލެޓުންނެވެ. އެ ސަރަހައްދުގައި ވެސް ޕާކުކޮށްފައި އޮތް ވޭނެއް ބަލައި ފާސްކޮށް އެ ވޭން ވެސް ސްކްރންކޮށްފައި ވެއެވެ.
މައްސަލައިގައި ފުލުހުން ބުނި ގޮތުގައި ތިން މީހަކު ހައްޔަރު ކުރި އެވެ. އެކަމަކު ނޫސްވެރިން އެކި ގޮތްގޮތުން އެއްކުރި މައުލޫމާތުތަކުން އެނގުނު ގޮތުން ފަސް މީހަކު ފުލުހުންގެ ވެހިކަލްގައި ގެންދިޔަ އެވެ. މި މައްސަލައިގައި ބަލައި ފާސްކުރީ ފުލުހުން ބުނި ގޮތުގައި ހައްޔަރު ކުރި މީހުންނާއި ގުޅުން ހުރި ތަންތަނެވެ.
އެގޮތުން ބަލައި ފާސްކުރި ބައެއް ސަރަހައްދުތަކުގެ ތެރޭގައި ރާޅުގަނޑު ސަރަހައްދުގައި ހުރި ގެޔަކާއި، ހެންވޭރު ދަނޑު ކައިރީ ގެއެއްގެ އިތުރުން، ސެނެހިޔާ ގޯޅީގައި ހުރި ގަރާޖެއް އަދި ޝަބްނަމް ގޯޅީގައި ހުރި ގެއެއް ބަލައި ފާސްކުރި އެވެ. މީގެއިތުރުން ހުޅުމާލެއިން ފުލުހުން ބަލައި ފާސްކުރީ ވިނަރެސް ފްލެޓަކާއި، ފަރުކޮޅުފުށި ސަރަހައްދެވެ.
ރޭގެ އޮޕަރޭޝަނުގައި ހުޅުމާލޭގެ އެކި ސަރަހައްދުތަކުން ދުއްވާފައި ދިޔަ އުޅަނދުތައް ވެސް ބަލައި ފާސްކުރި އެވެ.
މި މައްސަލައިގައި މިހާތަނަށް ފުލުހުންގެ ފަރާތުން އެއްވެސް މައުލޫމާތެއް ހިއްސާކޮށްފައި ނުވާއިރު ކައުންޓަރ ޓެރަރިޒަމްގެ އޮޕަރޭޝަނެއް ފަށައި އާންމު ކުރި ބަޔާން ފުލުހުން ވަނީ ގިނައިރުތަކެއް ނުވެ ސޯޝަލް މީޑީއާގެ އެކައުންޓުތަކުން ނަގާފަ އެވެ. ބަޔާން ނެގި ސަބަބެއްކަމަށް ފުލުހުން ބުނީ، ވެރިފައި ކުރަން ޖެހޭ ބައެއް މައުލޫމާތުތަކެއް ވެރިފައި ކުރުމެވެ.
މީގެކުރިން ވެސް ފުލުހުންނާއި، ސިފައިން ގުޅިގެން މާލޭގައި މިފަދަ އެކި އޮޕަރޭޝަންތައް ކުރިޔަށް ގެންގޮސް ތުހުމަތު ކުރެވޭ މީހުން ހައްޔަރުކޮށްފައި ވެއެވެ.
