އެމްއެމްއޭގެ ޑެޕިއުޓީ ގަވަނަރު އަހުމަދު އިމާދް ވަކިކުރުމަށް ފޮނުވި ސިޓީގައި ވަކި ސަބަބެއް ނުވަތަ ކުރެވިފައިވާ ކުށެއް ބަޔާންކޮށްފައިނުވާކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެމްބަރު ޑރ އަހުމަދު ޝަމްހީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މާލިއްޔާތު ކޮމިޓީގައި ވާހަކަދައްކަވަމުން މެމްބަރު ޝަމްހީދު ވިދާޅުވީ، އެމްއެމްއޭގެ ޑެޕިއުޓީ ގަވަނަރު އަހުމަދު އިމާދް ވަކި ކުރުމަށް ފޮނުވި ސިޓީގައި ވަކި ސަބަބެއް ބަޔާންކޮށްފައި ނެތްކަމަށެވެ. މެމްބަރު ވިދާޅުވީ، އިމާދު ހިންގާފައިވާ ކުށެއް ކޮށްފައިވާކަމަށް ސިޓީން ފެންނަން ނެތްކަމަށާއި ހަމައެކަނި ބަޔާންކޮށްފައިވަނީ ކުރީގެ ގަވަނަރު އަލީ ހާޝިމްވެސް ވަކިކުރިކަމަށްވުމުން އިމާދުވެސް ވަކިކުރަންޖެހޭނެ ވާހަކަ ކަމަށެވެ. ޝަމްހީދު ވިދާޅުވީ، ސިޓީ އިބާރާތްކޮށްފައިވަނީ އެގޮތަށްކަމަށާއި އިމާދު އެއްވެސް ވަރަކަށް އެމްއެމްއޭގެ އުސޫލަކާއި ހިލާފުވި ވާހަކަ ނުވަތަ ކުށެއްކުރި ވާހަކައެއްވެސް ބަޔާންކޮށްފައި ނެތްކަމަށެވެ.
ނަމަވެސް އެއަށްވުރެ ކަންބޮޑުވާންޖެހެނީ ރާއްޖޭގެ އެކި މުއައްސަސާތަކަށް ރާއްޖޭގެ ރައީސުލްޖުމުހޫރިއްޔާ އިސްވެ ހުންނަވައިގެން ”ހަމަލާ“ ތަކެއް ދީގެން ބާރުކަނޑުވާލަމުންދިއުމާއިމެދުކަމަށެވެ. މެމްބަރު ވިދާޅުވީ، ގައުމެއްގެ ގޮތުގައި ދެމިއޮތުމަށްޓަކައި އެންމެންވެސް މިކަމާއި ދެކޮޅު ހަދަންޖެހޭކަމަށެވެ. ޝަމްހީދު ވިދާޅުވީ، އެމްއެމްއޭއަކީ ސަމާސަކުރަންޖެހޭ ފަދަ ތަނެއް ނޫންކަމަށާއި އެމްއެމްއޭގައި ވިގަތުހުރި ފައިސާއާއި އެއް އަދަދަކަށް ފައިސާ ޕްރިންޓް ކޮށްފި ހާލަތެއްގައި އަތުގައި އޮތް ސަތޭކަ ރުފިޔާ ފަންސާސް ރުފިޔާއަށް ބަދަލުވެގެންދާނެކަމަށެވެ.
މެމްބަރު ވިދާޅުވީ، އެއީ އެމްއެމްއޭގެ ގަވަނަރާއި ބޯޑަށްވެސް އޮތް އިހުތިޔާރެއް ނޫންކަމަށެވެ. އޭނާ ވިދާޅުވީ، މަޖިލީހުން އެމްއެމްއޭއަށް ދީފައިވަނީ އާމްދަނީއަށް ބެލުމަށްފަހު 2.5 އިންސައްތަ ޗާޕުކުރުމުގެ އިހުތިޔާރުކަމަށާއި ރައީސް ޑރ މުއިއްޒު ފައިސާ ޗާޕުނުކުރާނެކަމަށް ވިދާޅުވެފައިވުމުން ސަރުކާރުން މަޖިލީހަށް ހުށަނާޅާ އެމްއެމްއޭގެ ގަވަނަރު މެދުވެރިކޮށް އެ މަސައްކަތްތައް ކުރަން އުޅުން ނަމަވެސް މިއީ ރައީސް ކުރައްވާ މަސައްކަތަކަށް ނުވެ ނުދާނެކަމަށެވެ. އޭނާ ވިދާޅުވީ، ދެކެވެމުންދަނީ ރައީސްގެ އެދިވަޑައިގަތުމަކަށް ޕްރިންޓުކުރުމަށް ކަނޑައެޅިފައިވާ 15 ބިލިއަން ނުވަތަ 20 ބިލިއަން ރުފިޔާގެ ވާހަކަކަމަށެވެ.
