މި އަހަރުގެ ރަމަޟާންމަހުގެ ފަހު 10އެއްގައި ސަރުކާރުގެ އޮފީސްތައް ބަންދުވާނެކަމަށް ރައީސް އޮފީހުން ބުނެފިއެވެ.
ރައީސް އޮފީހުން އާންމުކޮށްފައިވާގޮތުން މިހިނގާ މާޗު މަހުގެ 20 ވާ ބުރާސްފަތި ދުވަހުން ފެށިގެން ފަހުދިހައެއްގެ ގޮތުގައި ގުނާ ދުވަސްތައް ސަރުކާރު އޮފީސްތައް ހުންނާނީ ބަންދުކޮށްފައިކަމަށެވެ. މިގޮތަށް އަމަލުކުރުމަށް ނިންމާފައިވަނީ 1445ވަނަ އަހަރުގެ ރަމަޟާން މަހުން ފެށިގެން، ކޮންމެ އަހަރެއްގެ ރަމަޟާން މަހުގެ 20ވަނަ ދުވަހުން ފެށިގެން އެމަހުގެ ނިޔަލަށް ހިނގާ ދުވަސްތަކަކީ، ސަރުކާރު ބަންދު ދުވަސްތަކެއް ކަމަށް ރައީސުލްޖުމްހޫރިއްޔާގެ އޮފީހުން ކަނޑައަޅާފައިވުމާއި ގުޅިގެންނެވެ. އެ ނިންމުމުގެ މައުލޫމާތު ނިމިދިޔަ ފެބްރުއަރީ މަހުގެ 4 ވަނަ ދުވަހު އާންމުކޮށްފައިވެއެވެ.
ރައީސް އޮފީހުގެ މި ނިންމުމަކީ ދިވެހި މުޖުތަމައުގައި އިސްލާމީ އުސޫލުތައް ގާއިމުކުރެއްވުމަށާއި، ދީނީ ކަންކަމަށް ރައްޔިތުން ލޯބި ޖެއްސުމާއި، ދީނީ ކަންކަމަށް އިސްކަން ދިނުމަށް ފުރުސަތު ދެއްވުމުގެ ގޮތުން އަޅާފައިވާ ފިޔަވަޅެކެވެ. އެހެންކަމުން ފަހުދިހައަކާ ގުޅިގެން ސަރުކާރު ބަންދުވާ ދުވަސްތަކުގައި، އެކިއެކި މުއައްސަސާތަކުން ރައްޔިތުންނަށް ކޮންމެހެން ދެއްވަންޖެހޭ ޚިދުމަތްތައް، އެ މުއައްސަސާތަކުން ކަނޑައަޅުއްވާ ގޮތެއްގެ މަތިން ދެއްވުމުގެ އިންތިޒާމު، އެ މުއައްސަސާއަކުން ހަމަޖެއްސެވުމަށްވެސް ރައީސުލްޖުމްހޫރިއްޔާގެ އޮފީހުން އަންގާފައިވާނެކަންވެސް ހާމަކޮށްފައިވެއެވެ.
