ރަމަޟާން މަހުގެ މިހާތަނަށް މަލޭގެ ސަރަހައްދުގައި 48،000 އަށް ވުރެ ގިނަ ގޭބިސީތަކަށް ރޯދަ ހަދިޔާ ފޯރުކޮށްދެވިފައިވާކަމަށް ލޯކަލް ގަވަމަންޓް މިނިސްޓަރ އާދަމް ޝަރީފް އުމަރު ވިދާޅުވެއްޖެ އެވެ.
ދިވެހި ރައްޔިތުންނަށް ދޭ ރޯދަ ހަދިޔާއެއްގެ ގޮތުން ސަރުކާރުން މި އަހަރު ނިންމާފައި ވަނީ ކޮންމެ ގޭބިސީއަކަށް މަސްދަޅު ކޭހެއް ދިނުމަށާއި ކަރަންޓާއި ފެން ބިލުން ޑިސްކައުންޓު ދިނުމަށެވެ.
ހޯމަ ދުވަހުގެ ނިޔަލަށް ވަކި ހާއްސަ ސަރަހައްދުތަކުން މަސްދަޅު ކޭސްތައް ދޫކުރުމަށް ފަހު، މިހާރު އެ އިންތިޒާމުތައް ހަމަޖައްސާފައި ވަނީ މިފްކޯގެ ފިހާރަތަކުންނެވެ.
މިނިސްޓަރ އާދަމް ޝަރީފް މިއަދު ކުރެއްވި ޕޯސްޓެއްގައި ވިދާޅުވީ ރޯދަ ހަދިޔާ ދޫކުރުމަށް ހަމަޖެއްސި 13 މަރުކަޒުން މާދަމާ ރެއާއި ހަމައަށް މަސްދަޅު ކޭސް ދޫކުރާނެ އެވެ. އަދި އެއަށް ފަހު އެ މަރުކަޒުތައް ބަންދުވާނެކަމަށް މިނިސްޓަރ ވިދާޅުވި އެވެ.
މިނިސްޓަރ ވިދަޅުވީ ރޯދަ ހަދިޔާއަށް އެދެވޭނީ، މިހާރު ވެސް އޮތް އުސޫލުގެ ތެރެއިން ޕޯޓަލް މެދުވެރިކޮށް ކަމަށެވެ.
ރޯދަ ހަދިޔާއަކީ ރައީސުލްޖުމްހޫރިއްޔާ ޑރ، މުޙައްމަދު މުޢިއްޒުގެ ދިވެހި ރައްޔިތުންނަށް ކޮންމެ ރަމަޟާން މަހަކު ދެއްވަމުން އަންނަ ހަދިޔާއެކެވެ.
