ކުރިއަށް އޮތް ދެ ދުވަހު މާލެއަށް ވިއްސާރަކުރާނެކަމަށް ލަފާކުރެވޭތީ އެކަމުގެ ސަބަބުން ރައްޔިތުންނާއި މުއްދަލަށް ލިބިދާނެ ގެއްލުމަކުން ރައްކައުތެރިކުރުމަށްޓަކައި މަސައްކަތްތައް ފަށާފައިވާކަމަށް އެމްއެންޑީއެފްއިން ބުނެފިއެވެ.
އެމްއެންޑީއެފްއިން އާންމުކޮށްފައިވާގޮތުން އެ މުއައްސަސާއަކީ ރައްޔިތުންގެ ސަލާމަތާއި ރައްކައުތެރިކަމަށްޓަކައި އަޅަންޖެހޭ ކޮންމެ ފިޔަވަޅެއް އެޅުމަށް އަބަދުވެސް ތައްޔާރަށް އޮންނަ ބައެކެވެ. އެހެންކަމުން ކުރިއަށް އޮތް ދެ ދުވަހު މާލެއަށް ވިއްސާރަކުރާނެކަމަށް ލަފާކުރެވިފައިވާކަން އެނގުމާއިއެކު ސިފައިންވަނީ އެކަމުން ރައްޔިތުން ރައްކައުތެރިކޮށްދިނުމަށްޓަކައި މަސައްކަތްތައް ފަށާފައިކަމަށް ބުނެފައިވެއެވެ.
އެމްއެންޑީއެފްއިން ބުނެފައިވާގޮތުން އެ މުއައްސަސާއިންވަނީ އާންމުކޮށް ފެންބޮޑުވާ ހިސާބުތަކުގައި ޕަމްޕުތައް ބަހައްޓަައި ފެންހިނދުމުގެ މަސައްކަތްތަކަށް ތައްޔާރުވެފައެވެ. އެގޮތުން މާލޭގެ 3 ސަރަހައްދެއްގައި ޕަމްޕު ބަހައްޓައިގެން ފެންހިންދުމުގެ މަސައްކަތް ކުރަމުންދާކަމަށާއި މީގެ ތެރޭގައި އައިޖީއެމްއެޗް ސަރަހައްދު، ވެސްޓްޕާރކް ސަރަހައްދު އަދި މާފަންނު ފެރީ ޓާރމިނަލް ހިމެނޭކަން ހާމަކޮށްފައިވެއެވެ.
އެ މުއައްސަސާއިންވަނީ ޢާންމުން ދިރިއުޅޭ ގެތަކަށާއި އެހެނިހެން އިމާރާތްތަކަށް ފެންވަދެ ލިބިދާނެ ގެއްލުމަކުން ރައްކާތެރި ކޮށްދިނުމަށްޓަކައި ވެލިބަސްތާ ޖެހުމުގެ މަސައްކަތްތައްވެސް ކުރިއަށް ގެންގޮސްފައެވެ. އެމްއެންޑީއެފްއިން ބުނެފައިވާގޮތުން މާލެއަށް ވާރޭވެހި ފެންބޮޑުވާ ކޮންމެ ފަހަރަކު ރޭޔެއް ދުވާލެއް ބެލުމެއް ނެތި ސިފައިން ފޯރުކޮށްދޭ ގައުމީ ހިދުމަތްތަކަކީ ޝުކުރު ހައްގު ހިދުމަތްތަކެއްކަމަށެވެ. އަދި މި މަސައްކަތްތައް މެދުވެރިކޮށް ރައްޔިތުންގެ އެތައް މުދަލެއް ރައްކާތެރި ކުރެވިގެންދާކަން ފާހަގަކުރަންޖެހޭކަމަށްވެސް ބުނެފައިވެއެވެ.
