ފުވައްމުލަކުގައި ފުޅާ ދާއިރާއެއްގައި މަސްތުވާތަކެތި ވިއްކައި، ވިޔަފާރި ކުރަމުން ދިޔަކަމުގެ ތުހުމަތަށް ހައްޔަރު ކުރި އިސް ދެ މީހުންގެ މައްޗަށް މަނީ ލޯންޑްރިންގެ ކުށުގެ ދައުވާކޮށްފި އެވެ.
މިއީ މިދިޔަ އަހަރުގެ ޑިސެމްބަރު މަހުގެ ތެރޭގައި ފުލުހުން ކުރިޔަށް ގެންދިޔަ އޮޕަރޭޝަނެއްގައި އަތުލައިގަތް ނެޓްވޯކެކެވެ. އެ ރަށުން ފުލުހުން ހައްޔަރު ކުރީ ދޫޑިގަން، ކަރަންކާވިލާ އަހުމަދު ނިއުޝާދާއި، ދޫޑިގަން، ޒަމާނީ ވިލާ ހަސަން އާޒިމެވެ.
ޕްރޮސެކިއުޓަރ ޖެނެރަލްގެ އޮފީހުން ބުނީ ފުލުހުންގެ ތަހުގީގަށް އެނގޭ ގޮތުން އާޒިމް އިސްވެ ހުރެ ނިއުޝާދާއި ދެ މީހުން ވެގެން މަސްތުވާތަކެތި ވިއްކުމަށްޓަކައި ނެޓްވޯކެއް ގާއިމުކޮށްފައިވާކަމަށެވެ. އަދި އެ މީހުންގެ ބައިވެރިންނަށް މުސާރަ ދީގެން މަސްތުވާތަކެތި ވިއްކައި ފައިސާ ހޯދަމުން ދިޔަކަމަށެވެ.
މައްސަލައިގައި ފުލުހުންގެ ތަހުގީގަށް ފާހަގަކުރެވުނު އިތުރު ކަމެއްގެ ގޮތުގައި ވަނީ، ކްރެޑިޓަށް މަސްތުވާތަކެތި ދޫކޮށް އޭގެ ހިސާބުތައް ބަކި ތަރުތީބެއްގެ ދަށުން ބަލަހައްޓަމުން ދިއުމެވެ.
މި މައްސަލައިގައި ދެ މީހުންގެ މައްޗަށް ކުށް ކުރާ ޖަމާއަތެއްގައި ބައިވެރިވުމުގެ ކުށުގެ ދައުވާ ވެސް ވަނީ އުފުލާފަ އެވެ.
އެހެންވެ އެ ދެ މީހުންގެ މައްޗަށް ކުށްކުރާ ޖަމާއަތެއްގައި ބައިވެރިވުމުގެ ކުށުގެ ދައުވާކޮށްފައި ވެ އެވެ. އަދި މަނީ ލޯންޑްރިންގ އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ކުށުގެ ދައުވާ އުފުލާފައި ވެއެވެ.
މި ދައުވާ އުފުލާފައި ވަނީ، ޖުލައި 1، 2019 އިން ފެށިގެން އޮގަސްޓު 1، 2024 ދެމެދު މަސްތުވާތަކެއްޗާއި ގުޅުން ހުރި އެކި ފަރާތްތަކުން އާޒިމްގެ އެކައުންޓަށް 5.9 މިލިއަން ރުފިޔާ ޖަމާކޮށްފައިވާތީ އެވެ. އަދި އެއީ ކޫށްކޮށްގެން ހޯދާފައިވާ ފައިސާކަމަށް ޝައްކު ކުރެވޭ ހާލަތުގައި އެ ފައިސާ އޭނާގެ އަތުގައި ބަހައްޓައި ބޭނުންކޮށްފައިވާކަމަށް ދައުވާގައި ވެއެވެ.
ނިއުޝާދުގެ މައްޗަށް މަނީ ލޯންޑްރިންގެ ދައުވާ އުފުލާފައި ވަނީ، އެ މުއްދަތުގެ ތެރޭގައި އޭނާގެ އެކައުންޓަށް މަސްތުވާތަކެތީގެ ވިޔަފާރިކޮށްގެން 21.8 މިލިއަން ރުފިޔާ ޖަމާކޮށްފައި ވާތީ އެވެ.
މީގެއިތުރުން ކުށް ކޮށްގެން ހޯދާފައިވާކަމަށް ދައުވާގައި ބަޔާންކޮށްފައިވާ ފައިސާއިން މުދަލުގެ މިލްކުވެރިކަމާއި، އަތުގެ ވެރިކަމާއި، ތަސައްރަފު ކުރުމުގެ ހައްގު ހޯދައި، ކުށްކޮށްގެން ހޯދާފައިވާ މުދަލާއި ފައިސާއިން ހާސިލުކޮށްފައިވާ ނަތީޖާއެއްކަމަށް ވީތީ ފައިސާއާއި މުދާ ދައުލަތަށް ނަގައިދިނުމަށް އެދިފައި ވެއެވެ.
ހިފެހެއްޓި ތަކެތީގެ ތެރޭގައި ހިމެނެނީ 1.1 މިލިއަން ރުފިޔާ، 4 ސައިކަލު، 5 ކާރު، 2 ޕިކަޕު، 1 ކަނޑު އުޅަނދާއި، 29 ސަންކޮނުއަރ ގުރާގެ އިތުރުން 9 ރިންގް ނެކް ގުރާ އެވެ.
