ރައީސުލްޖުމްހޫރިއްޔާ ޑރ. މުހައްމަދު މުއިއްޒު މޯލްޑިވިއަން ބްލަޑް ސާވިސް (އެމްބީއެސް) އާއި އަދި ތެލެސީމިއާ ސެންޓަރުގެ ހާލަތު ބައްލަވާ ލެއްވުމަށް ވަޑައިގެންފި އެވެ.
އެމްބީއެސްގެ ވެރިންގެ އިސްތިއުފާއަށް ގޮވާލައި، އެމްބީއެސް ކުރިމަތީގައި މުޒާހަރާކޮށްފައި ވަނީ ހޮނިހިރު ދުވަހުގެރޭގެ ވަގުތެއްގައެވެ. މި މުޒާހަރާގައި އެތަނުގެ ވެރިންގެ އިސްތިއުފާއަށް ވަނީ ގޮވާލާފައެވެ. އަދި މި މުޒާހަރާގައި ތެލެސީމިއާއަށް ފަރުވާ ހޯދާ މީހުންނާއި އެމީހުންގެ އާއިލާތައް ހިމެނޭއިރު، އެމްބީއެސްއިން ލިބެންޖެހޭ ހިދުމަތްތައް އެންމެ އެކަށީގެންވާ ގޮތަށް ނުލިބޭ ކަމަށް ވަނީ ބުނެފައެވެ.
މި މައްސަލައަކީ އެމްބީއެސްއިން ލިބެންޖެހޭ ބޭސް ނުލިބުމާއި، ލޭ ހޯދުން އުނދަގުވެފައިވާއިރުވެސް، ފިލްޓަރުތައް ހަލާކުވެ ލޭ ޕެކެޓު އުކާލަން ޖެހުންމެވެ. އަދި މިމައްސަލައާއި ގުޅިގެން އާއްމުންދަނީ ސޯޝަލް މީޑިއާގައިވެސް އެމީހުންގެ ކަންބޮޑުވުންތައް ފާޅުކުރަމުންނެވެ. އެމްބީސީއެއްގައި ދިމާވާ މައްސަލަތަކާއި ގުޅޭގޮތުން ބައެއް މީހުންނާއިއެކު އެތަނުގެ މެނޭޖްމެންޓުން މަޝްވަރާ ބައްދަލުވުމެއްވެސް ވަނީ ބާއްވާފައެވެ. އެ ބައްދަލުވުމުގައިވެސް އާއްމުން ދިޔައީ ވެރިންގެ އިސްތިއުފާއަށް ގޮވަމުންނެވެ.
މިއަދު ހެނދުނު ރައީސް އެ ސެންޓަރަށް ވަޑައިގެން ވަނީ ހުރިހާ ޑިޕާޓްމަންޓްތަކެއްގެ ހާލަތު ބައްލަވާލައްވައިފައެވެ. އެ ކަންބޮޑުވުންތައް ރައީސް އަޑުއެއްސެވުމަށް ފަހު އެކަންކަން ހައްލު ކުރަން ކަމާ ބެހޭ އިދާރާތަކުން ގުޅިގެން މަސައްކަތްތައް މިހާރު ފައްޓަވާފައެވެ. އަދި އެ ވަގުތު އެ ސެންޓަރުން ފަރުވާ ހޯދަމުން ދިޔަ މީހުންނާއި އެ މީހުންގެ އާއިލާތަކާ ބައްދަލު ކުރައްވައި އެ މީހުންގެ ކަންބޮޑުވުންތައް ވެސް ވަނީ އަޑު އައްސަވާފައެވެ. ރައީސްގެ އަރިހުގައި ހެލްތު މިނިސްޓަރު އަބްދުﷲ ނާޒިމާއި ފިނޭންސް މިނިސްޓަރު މޫސާ ޒަމީރުގެ އިތުރުން އެމްބީއެސްގެ ވެރިންވެސް ވަނީ ބައިވެރިވެވަޑައިގެންފައެވެ.
ތެލަސީމިއާގެ ފަރުވާއާ ގުޅޭ ކަންކަމަށް މި ސަރުކާރުން ބޮޑެތި ބަދަލުތަކެއް ގެނެސް، ކުރިއަށް ވުރެ ލުއި ގޮތްތަކެއް ފަހިކޮށްދިނުމަށް ރާވާފައިވެއެވެ. 2024 ވަނަ އަހަރުގެ ފެބްރުއަރީ މަހުގެ ތެރޭގައި ތެލަސީމިއާ ކުދިންނާއި މީހުންނަށް ޑެސްފަރަލް އާއި އެ ނޫން ވެސް ބޭސް ތެލަސީމިއާ ސެންޓަރުން ދޫކުރުމުގެ ބަދަލުގައި ފާމަސީތަކުން ލިބޭނެ ގޮތަށް މި ސަރުކާރުން ވަނީ ބަދަލު ގެނެސްފައެވެ.
