ކޮވިޑްގެ ހާލަތު މި ދައުރުގައި ދިމާވިނަމަ ސަރުކާރު އަމިއްލައަށް އިސްތިއުފާ ދޭނެކަމަށް ގަބޫލުކުރައްވާކަމަށް ރައްޔިތުންގެ މަޖިލީހުގެ
ކޮވިޑްގެ ހާލަތާއި ގުޅޭގޮތުން ސަންގުޓީވީގެ ހަބަރަށްފަހު ޕްރޮގްރާމްގައި ވާހަކަދައްކަވަމުން މެމްބަރު އަމީން ވިދާޅުވީ، އެމްޑީޕީގެ ސަރުކާރުގައި ކުރިމަތިވެގެންދިޔަ ހާލަތު މި ދައުރުގައި ދިމާވިނަމަ މި ސަރުކާރު ވެރިކަމުގައި ނުތިބޭނެކަމަށެވެ. މެމްބަރު ވިދާޅުވީ، ޕީއެންސީގެ ސަރުކާރު އަމިއްލައަށް އިސްތިއުފާ ދޭނެކަމަށާއި ތިބޭނީ ގޭގައިކަމަށް ގަބޫލުކުރައްވާކަމަށެވެ.
މެމްބަރު ވިދާޅުވީ، ހުރިހާ ގައުމަކަށް ހުއްޓުން އައިއިރު ރާއްޖޭގައި އެއްވެސް ސިވިލް ސާވަންޓަކު މަގާމުން ވަކިކޮށްފައިނުވާނެކަމަށާއި އެއްވެސް ސިވިލް ސާވަންޓެއްގެ މުސާރަވެސް އުނިކޮށްފައިނުވާކަމަށެވެ. އަމީން ވިދާޅުވީ، އެ ދުވަސްވަރު ރިސޯޓުތަކުން ވަކިކޮށްލި މީހުންނަށް އަނިޔާތްތައް ދެމުންގެންދިޔަކަމަށާއި ހުރިހާ ރިސޯޓުތަކަށް ވިޔަފާރި އިތުރަށް ފުޅާކުރުމަށްޓަކައި ލޯނު ދިނުމުގެ މަސައްކަތްތައްވެސް ކުރެވިފައިވާކަމަށެވެ. އަދި އެސްއެމްއީތަށްވެސް ލޯނު ދިނުމުގެ މަސައްކަތްތައް ކުރެވިފައިވާއިރު އެހުރިހާކަމެއް އެމްޑީޕީއަކީ 2 އަހަރު ދުވަހު މުޅި ދުނިޔެ ހުއްޓުނުއިރު އެހުރިހާ ކަމެއް މެނޭޖުކުރި ޕާޓީއެއްކަމަށް ފާހަގަކުރެއްވިއެވެ.
އަމީން ވިދާޅުވީ، އެދުވަސްވަރު ކުރެވުނު ބައެއް ކަންކަން މިހާރު ޖޯކު ކަންކަމަށްވުން އެކަށީގެންވާކަމަށެވެ. ނަމަވެސް އެފަދަ ކަންކަމަކީ އޭރު އޮތް ބިރުވެރި ހާލަތުގައި ކުރަން މަޖުބޫރުވި ކަންކަން ކަމަށެވެ. މެމްބަރު ވިދާޅުވީ، އިގްތިސާދީ ހާލަތު މެނޭޖުކުރުމަށާއި ދަރަނިން ސަލާމަތްވުމަށްޓަކައި ވޯޓުލުމާއި ގާތަށް ގޮސްފައިވަނިކޮށް ޓެކްސް ބޮޑުކުރިކަމަށާއި ސިޔާސީ ގޮތުން އަމިއްލަ މަންފާއަށް ބަލާނަމަ އެއީ ބަޔަކު ކުރާނެ ކަމެއް ނޫންކަމަށެވެ.
މެމްބަރު ވިދާޅުވީ، ރިޔާސީ ވޯޓާއި ގާތްވެފައިވަނިކޮށް އެމްޑީޕީން ޓެކްސް ބޮޑުކޮށްގެން އިގްތިސާދު ސަލާމަތްކުރުމަށްޓަކައި މަސައްކަތްތަކެއް ކުރަމުންދިޔަކަމަށެވެ. އަދި ދަރަނިތަކެއް ހުރިނަމަވެސް ދަރަނި ނަގާފައިވަނީ ހަމައެކަނި އެމްޑީޕީގެ ވެރިކަމުގައި ނޫންކަމަށް ފާހަގަކުރެއްވިއެވެ. މެމްބަރު ވިދާޅުވީ، ފެށުނީއްސުރެވެސް ދަރަނިތައް ހުރިކަމަށާއި އެމްޑީޕީގެ ދައުރުގައި ތަފާތުވެގެންދިޔައީ މިންވަރުކަމަށެވެ.
އަމީން ވިދާޅުވީ، ރައީސް ޔާމީންގެ ވެރިކަމުގައި ނެގި ދަރަނި ދެއްކީ އެމްޑީޕީގެ ވެރިކަމުގައިކަމަށާއި އެމްޑީޕީގެ ދައުރުގެ ދަރަނިތައް ދައްކާނީ އެއަށްފަހު އައި ބަޔަކުކަމަށެވެ. މެމްބަރު ވިދާޅުވީ، ވެރިކަން ދީގެން އުޅެނީ މަޖުބޫރަކުން ނޫންކަމަށާއި ޕީއެންސީ ވެރިކަމަށް އައީ މެނިފެސްޓޯއެއް އޮވެ ގާބިލުކަންވެސް ހުރެ ފެހި ސިގްނަލްތައް ލިބެމުންދާކަމަށްވެސް ބުނެކަމަށެވެ. އެހެންވުމުން ދަރަނިތައް ދެއްކެންޖެހޭނެކަމަށާއި ރައީސް ކެމްޕެއިންގައި ދެއްކެވި ވާހަކަފުޅުތަކުގައި އިތުބާރު ހިފެންޖެހޭނެކަމަށެވެ.
