ތެލެސީމިއާއަށް ފަރުވާ ހޯދަމުންދާ ބަލިމީހުންނާ މެދު އެހާ ބޮޑަށް ފަރުވާ ކުޑަކުރުމަކީ ސަރުކާރުގެ ބޮޑު އިހުމާލެއް ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.
އެކްސްގައި ޕޯސްޓެއް ހިއްސާކުރައްވާ ފައްޔާޒް ވިދާޅުވީ ހާއްސަ އަހަންމިއްޔަތުކަމެއް ދީގެން ބަލަހައްޓަން ޖެހޭ ކަމެއް ސަރުކާރުގެ ނާގާބިލުކަމުގެ ސަބަބުން ބޮއްސުންލައި ގޮސް އެތައް ފުރާނައެއް ނުރައްކަލަށް ހުށަހެޅުމުގެ ޒިންމާ ސަރުކާރުން ނަގަން ޖެހޭ ކަމަށެވެ. އަދި މިފަދަ ހާލަތެއް ތަކުރާރު ނުވާނެކަން ސަރުކާރުން ކަށަވަރު ކުރަން ޖެހޭ ކަމަށްވެސް ފައްޔާޒް ވަނީ ވިދާޅުވެފައެވެ.
މި މައްސަލައާއި ގުޅިގެން އެކްސްގައި ޝާހިދު ހިއްސާ ކުރެއްވި ޕޯސްޓެއްގައި ވިދާޅުވީ ތެލެސީމިޔާގެ ފަރުވާ ގެ ބޭނުން ޖެހިފައިވާ ކުޑަކުދީންނާއި މީހުންނަކީ ދައުލަތުން ޚާއްސަ ގޮތެއްގައި އެހީ ފޯރުކޮށްދޭންޖެހޭ ބައެއް ކަަމަށާއި އަދި އެފަރާތްތަކަށް ބޭނުންވާ ފުރިހަމަ އެހީތެރިކަން ފޯރުކޮށް ދިނުމަކީ ދައުލަތުގެ މައްޗަށް ލާޒިމު ކަމެއް ކަމަށްވެސް ވިދާޅުވިއެވެ.
ޝާހިދު ވިދާޅުވީ ރައްޔިތުންގެ އެއްވެސް ޙައްޤަކަށް ހުރުމަތްތެރިކޮށް ހިތުމުގެ ކުޑަވެސް ވިސްނުމެއް މިސަރުކާރުގައި ނެތްކަން ދަނީ އެނގި ކަށަވަރު ވަމުންކަމަށެވެ. ޝާހިދު ވިދާޅުވީ ރައްޔިތުން ކޮންމެ ދުވަހަކުމެ ނުކުމެ ތިބެންމިޖެހެނީ ކޮންމެވެސް ޙައްގެއް ހޯދުމަށް އެދި އާދޭސް ކުރުމުގައި ކަމަށެވެ.
މި މައްސަލައިގައި އެމްބީއެސްގެ ވެރިންގެ އިސްތިއުފާއަށް ގޮވާލައި، އެމްބީއެސް ކުރިމަތީގައި މުޒާހަރާކޮށްފައި ވަނީ ހޮނިހިރު ދުވަހުގެރޭގެ ވަގުތެއްގައެވެ. މި މުޒާހަރާގައި އެތަނުގެ ވެރިންގެ އިސްތިއުފާއަށް ވަނީ ގޮވާލާފައެވެ. އަދި މި މުޒާހަރާގައި ތެލެސީމިއާއަށް ފަރުވާ ހޯދާ މީހުންނާއި އެމީހުންގެ އާއިލާތައް ހިމެނޭއިރު، އެމްބީއެސްއިން ލިބެންޖެހޭ ހިދުމަތްތައް އެންމެ އެކަށީގެންވާ ގޮތަށް ނުލިބޭ ކަމަށް ވަނީ ބުނެފައެވެ.
މިއަދު ހެނދުނު ރައީސް އެ ސެންޓަރަށް ވަޑައިގެން ވަނީ ހުރިހާ ޑިޕާޓްމަންޓްތަކެއްގެ ހާލަތު ބައްލަވާލައްވައިފައެވެ. އެ ކަންބޮޑުވުންތައް ރައީސް އަޑުއެއްސެވުމަށް ފަހު އެކަންކަން ހައްލު ކުރަން ކަމާ ބެހޭ އިދާރާތަކުން ގުޅިގެން މަސައްކަތްތައް މިހާރު ފައްޓަވާފައެވެ.
