ތެލަސީމީއާ ކުދިންގެ ކަންކަމުގައި ފައިސާގެ ކަމެއް ދިމާވެގެން މައްސަލައެއް ހައްލުނުވެ ނޯންނާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ތެލަސީމިއާ ސެންޓަރަށް ޒިޔާރަތްކުރައްވާ ރައީސް ދެއްވި އިންޓަރވިއުގައި އެމަނިކުފާނު ވިދާޅުވީ ތެލަސީމިއާ ސެންޓަރަށް ވަޑައިގެން އެތަނުގެ އެކިކަންކަން ވަރަށް ތަފްސީލުކޮށް ބައްލަވާފައިވާ ކަމަށެވެ. އަދި އެތަނުގެ މެނޭޖްމެންޓާއި މުވައްޒަފުންނާއި ވެސް ބައްދަލުކުރައްވާފައިވާ ކަމަށްށާއި އަދި ހުޅުމާލޭގައި ސެންޓަރު ބަދަލުކުރަން ކަނޑައަޅާފައިވާ އިމާރާތްވެސް ބައްލަވާލައްވާފައިވާ ކަމަށް ރައީސް ވިދާޅުވިއެވެ.
މި މައްސަލައާއި ގުޅިގެން މުހިންމު ބައްދަލުވުމެއް ބާއްވާ މަޝްވަރާތަކެއް ކުރިއަށް ގެންގޮސްފައިވާ ކަމަށާއި އަދި ކަންކަން ކުރިއަށް ގެންދާނެ ގޮތުގައި ފުރިހަމަ އިންސްޓްރަކްޝަން އާއި މައުލޫމާތު ވެސް ދެއްވާފައިވާ ކަމަށް ރައީސް ވިދާޅުވިއެވެ. ރައީސް ވިދާޅުވީ ތެލެސީމިއާ ޕޭޝަންޓުންގެ ދަތިތައް ހައްލުކުރުމަށް އަވަސް ގޮތްތަކެއް ހޯދުމަށް މަޝްވަރާކުރައްވާ އެކަމާއި ގުޅިގެން ކަންކަން ކުރިއަށް ގެންދަންވީ ގޮތް ވިދާޅުވެފައިވާ ކަމަށެވެ.
“ އެތަން ހިންގަން ޑިރެކްޓަރ ޖެނެރަލްއެއް ނުލާ 2017 ވަނަ އަހަރުން ފެށިގެން އަންނަ ކަމަށް ވަނީ. އެކަން ވަގުތުން ހައްލުކުރެވޭނެ ގޮތެއް އަޅުގަނޑު ވާނީ ދަންނަވާފައި. އަދި ހަމައެއާއިއެކު ނަރުހުން މަދު ވާހަކަ، ނަރުހުން ހޯދޭނެ ގޮތް އަދި ސީނިއާ ފިޒީޝިއަނެއް ހަމަޖެއްސުމަށް، ތަނަށް ބޭނުންވާ އެކިކަހަލަ އާލާތްތައް ހޯދޭނެ ގޮތް ، ލެބޯޓްރީގައި ބޭނުންވާނެ ވަސީލަތްތަކާއި އެކިމުވައްޒަފުން، ލެބޯޓްރީ ޓެކްނޮލޮޖިސްޓުންނާއި މިހެންގޮސް ބޭނުންވާ މުވައްޒަފުން ހޯދުމާއި މަސައްކަތް ކުރާނެ ގަޑި ހޮސްޕިޓަލެއްގައި މަސައްކަތް ކުރާނެ ގޮތާއި، އައިޖީއެމްއެޗްގައި މިސާލަކަށް މަސައްކަތް ކުރާނެ ގޮތް، ދުވަސްތަކާއި ގަޑިތައް އިތުރު ކުރުމަށްޓަކައި ބޭނުންވާނެ ހިއުމަން ރިސޯސް އިތުރުކުރުމާއި، މިހުރިހާ ކަމެއް އަޅުގަނޑު މިއަދު މަޝްވަރާކޮށް މަގުފަހިކޮށްދީ ކުރިއަށް ދާންވީ ކަންކަން ވާނީ ކަނޑައަޅައި އަންގާފަ“
ރައީސް ވިދާޅުވީ ބާއްވާފައިވާ މީޓިންގ ތަކުގައި ފިނޭންސް މިނިސްޓަރުވެސް ބައިވެރި ކުރައްވާފައިވާ ކަމަށާއި، ފައިނޭންސްގެ ސައިޑުން އެއްވެސް ކަމަކަށް ފައިސާއަށް ދަތިނުވާގޮތަށް ކަންކަން ހަމަޖައްސައިދީފައިވާ ކަމަށެވެ. އަދި ކުރިއަށް ގެންދަންވީ އިންސްޓްރަކްޝަން އާއު މުހުލަތުތަކެއްވެސް ދެއްވާފައިވާނެ ކަމަށް ރައީސް ވިދާޅުވިއެވެ.
މިކަމަށް ބޭނުންވާނެ އެންމެންނާއި ބައްދަލުކުރައްވަފައިވާ ކަމަށާއި، ވަސީލަތުގެ ގޮތުންނާއި މީހުންގެ ގޮތުން ކުރިއަށް ދެވޭނެ ގޮތް ފަހިކޮށްދީފައިވާ ކަމަށް ރައީސް ވިދާޅުވިއެވެ. ރައީސް ވިދާޅުވީ ތެލަސީމިއާގެ ކަންކަން މިހާހިސާބަށް އައިއިރުވެސް އެމަނިކުފާނަށް މި ކަންކަމަށް އެއްވެސް ކުރިއެރުމެއް އައިސްފައިނުވާކަން އެނގިވަޑައިނުގަންނަވާ ކަމަށެވެ. ތެލެސީމިއާ ސެންޓަރުގެ މެނޭޖްމެންޓާއި މިދިޔަ އަހަރު ސަރުކާރުގެ އެކި ބޭފުޅުންނާއި ިއެކި ފަހަރުމަތިން ބައްދަލުކޮށް މައުލޫމާތުތައް ހިއްސާކޮށްފައިވާ ކަން މިއަދު ބެލި ބެލުމުން ސާފުވާ ކަމަށާއި އަދި ލިޔެކިޔުން ތަކުންވެސް އެކަން އެނގޭ ކަމަށް ރައީސް ވިދާޅުވއިެވެ.
ރައީސް ވިދާޅުވީ އަމަލީ އެއްވެސް ސިފައެއް ނައިސް އޮތް ކަމަށާިއ އެހެންކަމުން އިންޓާނަލީވެސް ބަދަލުތަކެއް ގެންނަން ނިންމާފައިވާ ކަމަށެވެ. ރައީސް ވިދާޅުވީ ކުރިއަށް އޮތް ދުވަސް ތަކުގައި މި ބަދަލުތައް ގެނެވޭނެ ކަމަށާއި އަދި މާލޭގެ ސެންޓަރު ހިންގަން ޖެހޭހާ ދުވަހަކު އެތަނުގެ ހިދުމަތްތައްވެސް ރަނގަޅު ކުރުމަށް ނިންމާފައިވާ ކަމަށް ރައީސް ވިދާޅުވިއެވެ.
ހުޅުމާލެއަށް ހިދުމަތްތައް ބަދަލުކުރުމަށްޓަކައި ކުރެވޭ މަސައްކަތްތައްވެސް ބައްލަވާލައްވާފައިވާ ކަމަށާއި މަސައްކަތް ހަވާލުކޮށްފައިވާ ފަރާތުން މަސައްކަތް ކަރަމުންދާ ގޮތާއި މަސައްކަތް ހަލުވި ކުރުމަށްޓަކައިވެސް ކަންކަން ބައްލަވައި ކަނޑައަޅާފައިވާ ކަމަށް ވިދާޅުވިއެވެ. މިހާރު ހުޅުމާލޭގެ ސެންޓަރަކީ ނުވަތަ އިމާރާތަކީ ޖާގައިގެ ގޮތުން ތަނަވަސް ތަނެއް ކަމަށްށާއި އެތަނަށް ބަދަލުވާއިރު ގިނަ ވަސީލަތްތައްވެސް އިތުރު ކުރައްވާނެ ކަމަށް ވިދާޅުވިއެވެ.
ހުޅުމާލެއަށް ހިދުމަތްތައް ބަދަލުވުމާއި ގުޅިގެން ދަތުރުފަތުރަށްވެސް އުނދަގޫތަކެއް ހުންނާނެ ކަމަށާއި އެހެންނަމަވެސް އެކަމަށްވެސް ހައްލުތަކެއް ގެނެސްދެއްވާނެ ކަމަށް ރައީސް ވިދާޅުވިއެވެ. މީގެއިތުރުން ރައީސް ވިދާޅުވީ ފައިސާގެ ކަމެއް ދިމާވެގެން މައްސަލައެއް ހައްލުނުވެ ނޯންނާނެ ކަމަށާއި އެއީ ދޭ ޔަގީން ކަމެއް ކަމަށެވެ. އަދި ތެލެސީމިއާ ޕޭޝަންޓުންނަށް ދިމާވާ ކަންކަމުގައި ރައިސްގެ ބެއްލެވުމުގެ ދަށުން ކަންކަން ކުރިއަށް ގެންދަވާނެ ކަމަށް ރައީސް ވިދާޅުވއިެވެ.
