މިދިޔަ އަހަރު ވުޖޫދަށް ގެނެވުނު ޑެވެލޮޕްމެންޓް ބޭންކް އޮފް މޯލްޑިވެސް ލިމިޓެޑް (ޑީބީއެމް)ގެ މެނޭޖިންގ ޑިރެކްޓަރު އަދި ޗީފް އެގްޒެކަޓިވް އޮފިސަރުގެ ހައިސިއްޔަތް ފުރިހަމަ ކުރެއްވި މރ. ނޮއެލް ގްރެގަރ ޕެޓަރސަން-ޖޯންސް އިސްތިއުފާދެއްވައިފިއެވެ.
ޑީބީއެމް ގާއިމުކުރެވުނީ 2024 ވަނަ އަހަރު މޭ 24 ވަނަ ދުވަހުގައެވެ. އެގޮތުން، ޑީބީއެމް އުފެދުނީ ދިވެހިރާއްޖޭގައި ފައިނޭންސިންގ ފުޅާކޮށް، ކޮމާޝަލް ބޭންކިން ދާއިރާއާއި ޑެވެލޮޕްމެންޓް ފައިނޭންސް އިންޓިޓުޝަން (ޑީއެފްއައި) އަދި އެހެނިހެން އަމިއްލަ ރައުސުލްމާލް ފޯރޮކޮށްދޭ މީހުންނާއި ގުޅިގެން މަސައްކަތްކޮށް، ގައުމީ މާލީ އިކޯސިސްޓަމް ވަރުގަދަ ކުރުމުގެ ނިޔަތުގައެވެ.
ޕީސީބީއިން އެކްސްގައި ކުރި ޕޯސްޓްގައި ނޮއެލް އިސްތިއުފާދެއްވި ސަބަބެއް ހާމަކޮށްފައެއް ނުއެވެ. އެހެންނަމަވެސް، ނޮއެލް އަދާކުރަމުންދިޔަ މަގާމަށް އިސްތިއުފާ ދެއްވުމަށް ހުށަހަޅައިފައިވާތީ، އެބޭފުޅާވަނީ އެމަގާމުން ވަކި ކޮށްފައި ކަމަށް ޕީސީބީއިން ބުނިއެވެ.
ނޮއެލްއަކީ ގްރީން އިންވެސްޓްމެންޓްގެ އިތުރުން ސައުދީ އަރަބިއްޔާގެ ނޭޝަނަލް އިންފްރާސްޓްރަކްޗާ ފަންޑުގެ ޗީފް އިންވެސްޓްމަންޓް އޮފިސަރާއި އިލެކްޓްރިކް ވެހިކަލް އެފްރިކާ ފަންޑުގެ ޗެއާޕާސަން އަދި އިރުމަތީ ދެކުނު އޭޝިއާގެ ސާފު ހަކަތަ މަޝްރޫއުތަކުގެ މެނޭޖަރުގެ މަގާމުތައް ވަނީ ފުރިހަމަކުރައްވައިފައެވެ.
ޑީބީއެމްއަކީ ކުންފުނިތަކާއިބެހޭ ( ގާނޫނު ނަންބަރު 7/2023) ގެ 15 ވަނަ މާއްދާގެ ދަށުން ރައީސް އަށް ލިބިގެންވާ ބާރުގެ ދަށުން އުފެދުނު ދައުލަތުގެ ކުންފުނިތަކުގެ ދަށުން އަންނަ ބޭންކްއެކެވެ. އެގޮތުން، މި ބޭންކް އަކީ ސަރުކާރުގެ 100 އިންސައްތަ ހިއްސާ އޮންނަ ބޭންކްއެވެ. މި ބޭންކްއަކީ، ހަކަތައާއި ކާބޯތަކެތީގެ ރައްކާތެރިކަމާއި ތަކެތީގެ އަގު ފޯރޭވަރުގައި ބެހެއްޓުމާއި ދެމެހެއްޓެނިވި ސިޓީތަކާއި ލުއިފަސޭހަކަމާއި އެކު މީހުން ދިރިއުޅޭނެ ތަންތަން ގާއިމުކުރުމާއި ތިމާވެށި ހިމާޔަތްކުރުމާއި، ޓޫރިޒަމް އަދި އޭވިއޭޝަން ފުޅާކުރުމުގެ އިތުރުން ކަންޑުގެ ޒަރިއްޔާއިން ދިވެހިރާއްޖޭގައި އޮތް ހިއްސާ ތަރައްގީކުރުމުގައި ބޮޑު ރޯލެއް އަދާ ކުރާ އިދާރާއެކެވެ.
